وانتهى الكورس الأول بسلام، رغم كل الصدمات اللي فيه، العثرات، الصعوبات، لحظات التعب والسهر وضغط الدورات، لكنه انتهى، وهالحقيقة بس لازم تريحكم لي ١٠٠٠ سنة جدام. وعشان أكون صادقة معاكم، الكورس الأول من سنة أولى هو بالنسبة لي ولغيري أكثر كورس ثقيل عالقلب من النواحي اللي ذكرتها فوق وأكثر، لكنه مر. اللي سوّا زين الحمدلله، هنيئًا له، والله يديم عليه هالنعمة والقدرة على الاجتهاد والعطاء ويزيده خير. واللي قدر وعدى لكن ما ياب نتايج ترضيه هم الحمدلله، وعمره ما كان الوقت متأخر لبداية منعشة وجديدة. هالتدوينة هذي مثل ما تدرون إنها بتكون عن الكورس الثاني من السنة التمهيدية اللي إهي سنة أولى. بيختلف فيها عدة أشياء عن التدوينة الأولى، وهم:
١-إن هالتدوينة أوضح وأكثر سلاسة
٢-إن غرض هالتدوينة هو الاستفادة بس دون النسخ المطلق. بمعنى، إنتو خضتوا تجربة الكورس الأول وعشتوا الجو واكيد كل واحد كون له منظور معين يشوف فيه نظامه بالكلية منه، وكل واحد منكم خاض تجارب مختلفة ومر بظروف غير فبالتالي كل واحد كون وجهة نظر بخصوص دراسته غير عن الثاني، لذلك تدوينتي هذي ماراح تكون ارشادية والزامية بحتة "بقدر ما تبدو" كثر ماراح تكون "مساعدة" لفهم وجهة نظركم اكثر وتوجهيها بطريقة سليمة. كلام صعب، مو؟😂❤️
ما علينا..
واهم شغلة:
٣- هالتدوينة أحلى لسبب واحد وهو، إن الكورس الثاني بسنة أولى أحلى كورس ممكن يمر عليكم بدراستكم الجامعية💓
الله. حصه قالت إن الكورس الثاني أحلى كورس، بنفلها يعني وبنستانس طول الوقت، لالا. أنا ما قلت جذي، اهو صح حلو، صح لطيف، صح يفتح النفس، لكن أغلبه يحتاج "مجهود مضاعف" عن الكورس الأول، عشان تحصلون عالنتيجة المطلوبة. وعشان تستانسون فيها صج. التوازن وايد مطلوب، وأنا قلت لكم إنه سهل لإني شخصيًا وغيري شفنا نتايج زينة فيه، پلس عشان أرفع معنوياتكم عقب الكورس الأول.
ماعلينا، الحين بقولكم هالتدوينة هذي تنقسم حق جم قسم، وكل واحد شنو بتكلم فيه.
١-مدة الكورس
٢-نبذة تعريفية عن مواد الكورس "بشكل عام"
٣-حديث مطول ومفصّل عن مواد الكورس
٤-توصيات دراسية عامة
٥-دروس أنقلها لكم "من القلب إلى القلب"💓
٦-مفاجأة صغيرة مني لكم، أول مرة أسويها صراحةً ما سويتها المرة اللي فاتت، وأتمنى تفيدكم معنويًا🙏🏼
هالمرة مثل ما تشوفون ماراح أتكلم عن القرطاسية، ولا عن باقي الأشياء! لإن كل واحد فيكم عرف شنو جوه بالترتيب، اللي قام يدرس على آيباد واللي فضّل الورق، فماراح أتكلم عن هالموضوع اختصارًا لجهدكم في القراءة ولوقتي اللي لازم أدرس فيه حق الإندتيرم -مكافحة بسنة ثانية😭- دعواتكم😂❤️.
أولًا: مدة الكورس:
الكورس هذا بتصير فيه وايد احداث، مع ذلك قصير ويمر بخفة كبيرة. مدته من نهاية شهر ١ إلى نص أو نهاية شهر ٥. إنزين شنو فايدة هالمعلومة؟ هذي الله يسلمكم عشان تعرفون إن زيادة على إن هالكورس أحلى واخف، أيضًا عشان تستوعبون فاكت إن ما بقى على سنة أولى كثر ما مضى! بقى وقت قليل، و٤ شهور بالكثير. لذلك استغلوهم عدل ووازنوا بين الدراسة والوناسة💓
ثانيًا: نبذة تعريفية عن مواد الكورس، والحديث عنهم بشكل عام:
هالكورس راح تدرسون فيه ٤ مواد، إي ٤ مواد مو خمسة🙊 وهالشي بروحه كفيل إن يخليكم تستانسون للأبد😂❤️ مواد أقل يعني هم أقل يعني تركيز عالشغلات المهمة أكثر يعني راحة أكبر وبالتالي تحصيل دراسي أكبر✔️
هالأربع مواد هم:
1-English 182 - 5 credits
2-biology - 4 credits
3-BBE - 3 credits
4- elective - 3 credits
ومجموع وحدات هالكورس ١٥ وحدة، نفس الكورس اللي فات، عيل شاللي فرق؟ إن شالوا الكمبيوتر "الحححمممدلللله" وحطوا الكريدت ماله مع البيولوجي، فصارت مادة ٤ كريدتس. وهالشيء أحسن شيء سووه بالعالم🙏🏼❤️❤️. المهم، راح أتكلم عن كل مادة بالتفصيل الملم الممل إن شاء الله بالقسم الثاني.
ثالثًا: حديث مطول ومفصل عن مواد الكورس الثاني:
هالقسم راح يكون نفس اللي بالتدوينة اللي فاتت، تقريبًا زبدة الكورس الثاني إذا مو أكثر بتكون فيه، أتمنى تقرونه بوقت تكونون رايقين فيه عشان ما تتعبون وأنتو تقرون وتسجلون النقاط المهمة، وبس. يلا نبدي!❤️❤️
أول مادة: English 182:
ماكو خلاص من الإنقلش إلا عقب سنة😂 كالعادة، عليها 5 credits. يعني ستل لازم تشدون حيلكم، وستل لازم تدورون الدرجات بأبسط الأشياء.
بهالمادة راح يقسمونكم لكلاسات بعد، ولكن كلاسات أصغر. ليش؟ لإن مدرسين 181 ومدرسين 183 كلهم بيكونون مفترغين لكم، عشان جذي في ناس منكم عندهم احتمالية إن يطيحون عند الأثنين، ومافي شي يخوف. الدكاترة بـ182 يكونون أكثر تسامحًا مو مثل 181لإن يكونون في طول تعليمكم فلازم يتصفون بالشدة. لكن أهم شي اتبعوا القواعد اللي يقولها مدرسكم اليديد بغض النظر هل يوافق الدكتور اللي أسسكم بـ181 أو لا.
وديروبالكم تتناقشون معاهم نقاش إن دكتورنا القديم قالنا كذا كذا ف أنا بمشي عليه لإن جذي جنكم تحسسونهم إنهم ما يعرفون وبيزعلون صج! وعاد صج كلش ولا زعلهم😂😂.
-أقسام المادة:
1-Vocabulary (10%, 5% each!)
الفوكب بهالمادة وايد احلى وله فايدة كبييرة والله، على الرغم من إن كميته كبيرة واكبر بواايد من الكورس اللي فات إنه سهل حرفيًا. حيل سهل ونظامه يكرر المعلومة ف يثبت معاكم كل شيء، ومع حل الامتحانات القديمة هالمرة صج يتفول. ليش؟ لإن ماراح يكون عندكم general vocab! بشارة صح؟😂👏🏼 بالتالي بس راح تركزون على هالكتاب، وايد حلو. راح تستمتعون حيل وأنتو تحلونه، كأنه لعبة وكأنه أحد قاعد يسولف معاكم، إذا مسكتوه راح تفهمون قصدي ولا يخوفكم حجمه بليييز. لإن محتواه سهل وسلس👌🏼. أهم شي بلشوا فيه مبجر عشان تراجعونه كذا مرة. وبس أموركم تصير تمام❤️ وراح تمتحنون امتحانين كل واحد عليه ٥٪ من المادة.
2-Writing (35%)
الرايتنق هالمرة عليه جزء كبير من المادة. بالتالي حيل مهم. شنو مواضيع الرايتنق؟ نفس 181 بالضبط:
1-procedure, 10%
نفس اللي خذيتوه بالكورس الأول "وأتمنى انكم ما قطيتوا أوراقكم وكتبكم". الاختلاف إن بالكورس الأول كنتوا تكتبون فقرة وحدة من الفقرات كلهم إما preparation or actual procedure or post procedure care. أما هالمرة راح يعطونكم بالامتحان موضوع وأوتلاين على هالموضوع وراح تكتبونهم كلهم إضافةً إلى فقرة الـintroduction. بس لا تحاتون، بتكونون متدربين اكثر، وكمية الكلام اللي بالفقرة الوحدة بتكون أقل من اللي كانوا يعطونكم إياهم بـ١٨١. ومع التدريب مثل ما قلت لكم وكل شي بيمديكم تحلون بالامتحان، وكتابة الفقرات كلها يمشي على كل اللي تحت. اللهم إن بأول امتحانين ما عليكم تكتبون conclusion وبآخر واحد لازم تكتبونه.
2-definition, 10%:
بهذا الامتحان راح يخلونكم تكتبون فقرة introduction اضافةً إلى ٣ فقرات ديفينيشن (ممكن يكونون causes-symptoms-diagnosis-treatment methods) عاد أهما يختارون. الـrisk factors لغوها على دفعتنا ومادري عن دفعتكم صراحةً بس أتوقع نفسنا🤔 أهم شي فتدربوا عليهم كلهم عشان تكونون مستعدين للامتحان.
3-compare and contrast, 15%:
بهذا الرايتنق راح يعطونكم مرضين وتقارنون الdefinitions ملوتهم، خذيتوه بالكورس الأول وتعرفون فكرته، وأيضًا هني بيخلونكم تكتبون فقرة introduction و٣ فقرات غيرها وعقبهم لازم تكتبون conclusion. وحسب علمي إن يزيدون وقت الامتحان شوي لإنه مثل ما تشوفون صار أطول.
مثل ما تشوفون إن امتحانات الرايتنق صارت أطول، مع إن الدرجات إنتو متعودين عليها. يعني already امتحان الـdefinition مالكم كان ١٠٪ شنو اختلف الحين؟ قبل الله يسلمكم كان ١٠٪ حق "فقرة وحدة" وأغلاطكم فيها بس. اما الحين الـ١٠٪ تشمل اغلاطكم بـ٤ فقرات فبتالي نسب الخطأ والنقصان يزيدون. ركزوا ركزوا ركزوا وتدربوا عدل!!! مثل ما تشوفون ٣٥٪ من المادة على الرايتنق مو شوية كلش.
3-Midterm and final (55%)
هذولا مثل ما أنتو متعودين عليهم,
-Midterm; 15%
راح يكون فيه reading & listening مثل ما أنتو متعودين بالضبط، مافي اختلاف كلش.
-Final, 40%
راح يكون فيه reading and listening مثل ما أنتو متعودين بعد، وأيضًا راح يكون بنهاية الامتحان ١٠ اسئلة قرامر نفس اللي متعودين عليهم يدربونكم عليهم قبل الامتحان بعد في حال نسيتوهم، وبس🙊.
مثل ما تلاحظون الحين بانقلش ١٨٢ ماعندكم امتحان قرامر، اللهم بالفاينل بس. وماعندكم general vocab كلش. وهالشي بصالحكم عشان تركزون على باجي المادة💓.
أهم شي شدوا حيلكم، واتبعوا شنو مدرسينكم يقولون، وسئلوهم عن كل شي لإن ماتدرون يمكن شي أنتو تعودتوا عليه بـ١٨١ إن عادي "خصوصًا لو كان مدرسكم بـ١٨١ مو شديد" راح تنصدمون إن اليديد يحاسب عليها، تصير وايد. أما اللي طاحوا عند مدرسين شديدين حيل بانقلش ١٨١ راح يرتاحون رااااحة😂😂 الفايدة طلعت الحين👏🏼.
وشغلة إيجابية تصير بأغلب الدفعة، إن درجاتكم بـ١٨٢ ترتفع عمومًا عن ١٨١ لعدة أسباب، ف استغلوا هالشغلة وبتلقون نتيجة❤️.
ثاني مادة: Biology, 4 credits:
هالمادة بالنسبة لي أحلى مادة بسنة أولى بجانب الكمستري، صج صج ممتعة وحلوة، وكثير منها متكرر. واللي مو متكرر وايد interesting! ومثل ماتشوفون عليها كريدتس وايد وأهميتها تقريبًا مثل أهمية الإنقلش. وفوق كل هذا، أنا عن نفسي أعتبرها مادة A🙊. طبعًا الـA مستحيل تيي بالساهل، يعني مو تبطلون النوت قبل الامتحان باسبوع وتبون A! مستحيل.
الـA سهلة لما تدرسون المادة أول بأول وتطقون النوت أكثر من طقتين، ويمديكم! وايد راح يمديكم، لإنكم من تخلصون نوت البيولوجي ملوت الميدتيرم راح يوقفون تدريس البيولوجي لين تخلصون امتحانكم وبعدين يبدون معاكم تدرسين نوت الفاينل مو نفس الكورس الأول، وهالشي وايد مريح صراحةً ويعطيكم وقت وما يخلي النوت تتراكم عليكم ولا يخليكم تتشتتون.
راح أتكلم عن أقسام هالمادة:
1-lecture & notes:
هذي النوت اللي راح تاخذونها على هيئة محاضرات.
أولًا-ميدتيرم:
راح تدرسون ٢٣ نوتة تقريبًا. العدد يخوفكم يمكن بس حدهم سهلين وعجيبين.
راح يدرسونكم الدكاترة التاليين:
١-د.أبوسالم
أنا عن نفسي وايد أحب شرحه لإنه يفهم بدون ما يعقد، واهو خوش دكتور والله. نوتة يمكن شوي طويلة بس سهلة، وركزوا عالحفظ. ما يكرر أسئلة وايد لذلك حفظوا نوته كثر ما تقدرون. يعطي تتوريال، وتتوريالاته مهمة لإنهم عبارة عن mcqs يطلب منكم تحلونهم (ونصيحة حلوهم قبل التتوريال وكونوا دارسين النوت) ويستقبل اسئلة ويجاوب بضمير بعد.
٢-د. حميد الصراف
من اعجب الدكاترة اللي راح يمرون عليكم بحياتكم. جماعة الطب والأسنان راح يدرسكم فيسيولوجي بسنة ثانية بعد إن شاء الله. شرحه عجيب، اسئلته بالامتحان فهم مو حفظ! يركز على الأفكار اللي يعطيهم بالتتوريال (راح يعطيكم قبل التتوريال ماله مجموعة مسائل وأفكار حلوهم قبل التتوريال واهو بيعلمكم الطريقة لما يشرحه). نوته فهم أكثر من إنها حفظ
٣-د. مي مغربي
شرحها حلو. ما ترضى بسالفة الموبايلات كلش وعادي تفشل احد بس لإنه ماسك فونه، كلش كلش ماتحب. ولا تحب سوالف التسجيل ولا تحب سوالف القومة من اللكجر. راح تشرح نوتة وحدة ونوتتها بالنسبة لي تعتبر من أصعب نوت الميدتيرم "مع إنها ٩ صفحات😂" بس مع ذلك تييب اسئلتها سهلة ومباشرة حيل مو شوية، ف حفظوها عدل وفهموها وبتضمنون الأسئلة، نوتوا معاها مو لإن التنويت مهم بس عشان تعرفون شسالفة من السلايدة.
٤-د. هنادي العمودي
من أقوى الناس اللي يشرحون. شديييدة راح تحسون باللكجر كأنكم مدرسة😂 ممنوع أحد يطلع من اللكجر وإهي تشرح. راح تعطيكم نوت عن الخلية والانقسام وموت الخلية وهالسوالف، التنويت معاها مهم مهم مهم أتعب وأنا أقول مهم. بالامتحان تقريبًا اصعب اسئلة هي اسئلتها. مو صعبة يعني ما تنحل! بس صعبة يعني يبيلها أحد فاهم نوتها عدل، وهالفهم مو معجزة يعني تقدرون تفهمون لما تحضرون معاها وتفرغون وتحلون اسئلة قديمة عشان تشوفون طريقة تفكيرها بالاسئلة.
٤-د.سهيل
راح يعطيكم أساسيات المايكروبيولوجي تقريبًا ٦ محاضرات. شرحه زين بس أنا مادري شنو كان يتسلط علي بلكجراته كله كنت أتعب وأدوخ ولا انوت شي وكان عبالي إن خلاص ماراح أفهمه! بس والله لما قريت نوته تنفهم وسهلة حيل. راح يعطيكم لكجرات عن البكتيريا والفيروسات والفطريات والطفيليات. يكرر اسئلة واااااااااااااااااااااااايد!!!! والله بدون مبالغة لو يحط ١٠ اسئلة بالامتحان ٧ منهم مكررين، والله. كل نوته سهلين اللهم نوتة من نوت الفيروسات هه يبيلها شوي ف فهموها.
ثانيًا-الفاينل:
الفاينل النوت بيكونون أقل لكن فيهم صعوبة شوي شوي شوي إذا قارناهم بنوت الميدتيرم. راح يشرحون لكم:
١-د.اسلام خان
أنا شخصيًا أحب شرحه، راح يعطيكم عن الوراثة والأليلات ومادري شنو كللله تكرار من الثانوي مافي شي يديد إلا شغلة أو شغلتين. أسئلته بالامتحان عادية، بس درسولهم عدل.
٢-د.فاروق
أسرع دكتور يتكلم بالدنيا ماراح يمديكم تكتبون معاه ولا حرف😂 بس عادي لإن كل شي يقوله مكتوب بنوته. نوته سهلين ومفهومين وأهو خوش دكتور واسئلته بالامتحان زينة.
٣-د. مي البدر
راح تعطيكم محاضرات عن الهرمونات والتكاثر وأنواعه وو.. هالسوالف. تقريبًا ٣ محاضرات، مهم الحضور معاها والتنويت عشان تفهمون شسالفة، شرحها عجييب، واسئلتها بالامتحان زينة للي دارس نوتها عدل.
٤-د.سامباث
راح يعطيكم نوت عن الـembryology أو علم الأجنة، راح تدرسون فيه شلون الجنين يتكون من أول يوم وكل أسبوع شيصير فيه، نصيحة درسوه عدل وحضروا معاه ونوتوا وشوفوا فيديوات يوتيوب يساعدكم عالتخيل، ودرسوه عدل لإن بتدرون تعيدونه بسنة ثانية بتفاصيل أكثر ف فهموه من سنة أولى وخشوا نوتكم❤️👏🏼.
٤-د. هنادي العمودي
مرة ثانية راح تشرح لكم، هالمرة المواضيع راح تنتقل من الكلام الممل والخلايا ومادري شنو إلى البيئة وسلوك الحيوان، محاضراتها هذي ممتعة ممتعة ممتعة وكلها أمثلة وسوالف وقصص حتى دراستهم سهلة لإن راح تتذكرون السالفة وتدرسون😍.
٥-د.تشينق -may he Rest In Peace-
كان يعطينا آخر محاضرة بالبيولوجي، الحين مادري منو راح يمسك شرح النوتة، حطيت لكم اسمه رغم انه ماراح يشرح لكم كشكر له لإنه دكتور عظيم ما قصر علينا بشيء لدرجة أذكر إنه عاد لنا هالمحاضرة عشان نفهم زيادة❤️
2-tutorials:
هذا كلاس يحطونه لكم بالجدول ويسويه الدكتور -إذا كان يبي- عشان يراجع لكم للاشياء المهمة، يحطلكم اسئلة ويجاوبها معاكم، واكيد يستقبل اسئلتكم. في تتوريلات يستقبلون اسئلة بس مثل تتوريال د.هنادي، ما تعطي اسئلة عشان تحلونهم وجذي كلش، ف احرصوا ان تدرسون النوت قبل ما تحضرون اي تتوريال، وحطوا علامات صوب اسئلتكم عشان ما تنسون. أنا بفضل التتوريالات ما اضطريت ان اروح واتنعى مكاتب الدكاترة عشان اسألهم باللي مو فاهمته. المشكلة إن في دكاترة ما يسوون تتوريال.
3-practicals
مثل طقة الوورك شوب بس تكونون بالكلية، في مرات راح تروحون المختبر وجذي تشوفون المايكروسكوب ومادري شنو، وفي مرة راح تتعلمون عن الطرد المركزي باللاب centrifuge وهالسوالف، لازم لابكوتات👩🏽⚕️👨🏽⚕️
4-workshops
مادري شلون أشرحهم والله😂 بس يعني أهما شغلات يكونون شوي برا اطار الدراسة بالكلية، يعني في وورك شوب يودونكم بنك الدم💉 وفي وورك شوب يودونكم مستشفى مبارك تشوفون المختبر. وايد حلوين ويغيرون جوكم❤️ ولازم تلبسون لابكوت فيهم👩🏽⚕️👨🏽⚕️.
الحضور مهم وايد لكل شيء يخص البيولوجي. الفهم بروحه مو كافي بس لازم تحفظون عدل حتى عناوين السلايدات عادي جدًا يسئلون فيهم وحرام تضيعون درجات بس لإن مو حافظين شيء سهل! التنويت بعد مهم جدًا عشان تستوعبون الماتيريال وتسهل عليكم دراستكم. كورس البيولوجي من احلى الكورسات اللي راح تدرسونها💓.
بالنسبة للكتاب، برايي النوت تكفي وزيادة، لو ودكم تشترونه عشان تريحون ضميركم ما يضر✨.
وإذا في شي مو واضح بخصوص هالمادة سئلوني❤️.
ثالث مادة: BBE, 3 credits:
بمشي فيها حبة حبة.
-أول شيء الاسم:
BBE= biostatistics and basic epidemiology.
مثل ما تشوفون من الإسم، المادة عبارة عن قسمين: بيوستات+ابديميولوجي
بيوستات يعني علم الاحصاء الحيوي، تذكرون الاحصاء مال الثانوي، بيسكلي نفس مبادئهم.
ايبديميولوجي: علم الأوبئة والامراض وانتشارها.
-ثاني شيء، شلون راح تتقسم دراستهم؟
بالميدتيرم راح تاخذون ٤ نوت بيوستات، وعقبهم و٦ نوت ايبديميولوجي
والفاينل نفس الشيء👏🏼
-ثالث شيء، بتكلم الحين عن كل مادة بروح، شنو اهي ومنو دكاترتها، ونظامها، وشلون تدرسون لهم، بسم الله:
أولًا- البيوستات:
مثل ما قلت لكم إهي مادة احصاء حيوي، مادة فهم من الدرجة الاولى، يبيلها أحد فاهم ومتشرب القوانين والنوتة مو بس حافظهم، بالامتحان عادي اييلكم سؤال يجمع بين قوانين من اول النوتة لي آخرها، الاسئلة القديمة مهمين حتى لو صعبين بس حلوهم وايد مهمين مو شوية. حضرولهم دورات لا تعتمدون هالمحاضرات بس.
راح يشرح لكم دكتور واحد بس، حق كل المقرر، اسمه د. أحمد البطينة. شرحه عجيب عجيب عجيييب. حضروا معاه يفهم وايد، أحيانًا على دفعتي كان في TA "المجرن اذا تعرفونه"، لإن الدكتور ساعات ما يكون فاضي وجدوله مضغوط.
تنقسم المادة لكمية ميدتيرم وفاينل
~الميدتيرم: راح تاخذون ٤ نوت، "بعض" أفكارهم نفس أفكار احصاء الثانوي تقريبًا مو حيل يعني.
أول نوتة إهي أهم وأصعب نوتة يمكن، بالشرح بتشوفونها سههلة لكن ما خفي أعظم😂😂 شدوا حيلكم فيها وبترتاحون بباقي الدراسة لإن إهي الاساس.
ثاني نوتة عن توزيعات الـvariables هم يبيلها شوي جهد.
ثالث نوتة عن الـestimation وهالامور، مستواها نفس ثاني نوتة.
رابع نوتة عن الاحتمالات ومادري شنو تذكرون فضاء العينة😂😂 نفسه بالضبط مع زيادة أفكار بس النوتة تعتبر اسهل وحدة بين نوت البيوستات.
طريقة الدراسة: حضروا المحاضرة نوتوا عشان تفهمون الكونسبت والأفكار وتصيدون جو الدكتور، بعدين حضروا دورة (دورات سلمان العتيبي حق البيوستات أحسن شيء!)، وعقب ما تخلصون الدورة درسوا النوتة وحلو الاسئلة اللي يوزعونها، وبس. وحاولوا تبدون تحلون اسئلة قديمة asap مو قبل الامتحان بجم يوم تكفوووووون!! لان والله المسائل وايد والافكار صعبة ويبيلها، وصج خافوا من هالمادة، لإنها اصعب مادة بسنة أولى يمكن، كانت سبب لطرد طلبة وايد على الدفع القديمة وعلى الدكتور القديم قبل ما ايي دكتورنا هذا، لكن دكتورنا هذا مازال يستخدم افكار هذاك الدكتور. خافوا، لإن من خاف سلم، وشد حيله😂👏🏼.
~الفاينل: راح يشرحلكم نفس الدكتور، تتكلم النوت عن الفرضيات ومادري شنو، صعب اشرح هالشيء والله، المهم طبيعي تحضرون المحاضرة ما تفهمون الكونسبت، بس حضروا دورات وبتفهمونهم، أنا كنت احضر حق (عبدالعزيز عكرمة) وايد حلو شرحه، وحلو اسئلة قديمة بعد.
معلومة أخيرة عن البيوستات: الدكتور بيعطيكم هوموركات "يحطهم بالموقع" فيهم مسائل حق كل نوتة، حلوهم لإن بعض المرات تيي منهم اسئلة بالامتحان، اهتموا بالمادة عدل واخذوا معلومات من كل صوب، والكتاب كلش كلش مو مهم.
الحين صج صج آخر شي😂: بالبيوستات بعد في جزء براكتكل تنزلون الـpc labs تحت وتتعلمون على برنامج وجذي صراحةًما منه اي فايدة بالحياة وما عليه اسئلة بالامتحانات بس مهم حضروهم حق التوقيع. لان الـbbe عليه ساعات شوية ف لو تغيبون وايد فيه سهل تاخذون FA, ديروبالكم من هالسالفة بليز.
ثانيًا- الايبديميولوجي:
هالمادة حلوة وايد والله، بتحسسكم إنكم طلبة طب صج، بيعطونكم فكرة شلون تصير الابحاث والتجارب، شلون يحصرون الامراض وشنو الـmeasures اللي نستخدمهم؟، يعني هالأمور.. والدكاترة ملوت الايبديميولوجي كلهم بدون استثناء يفهمووون ١٠٠٪ ف حضروا معاهم. ونوتوا، التنويت مهم عشان تفهمون، ومهم حيل حق نوت د. عبدالله الطيار، مهم التنويت وايد وايد وايد له! ما يمديه ينوت خل يسمع التسجيل. راح تاخذون ٦ نوت بالميدتيرم و٦ بالفاينل، النوت صغار وواضحين.
~الميدتيرم:
راح تدرسون ٦ نوت مثل ما قلت لكم؛ فيهم مسائل وايد وحسابات، حضرولهم دورات وحلوا اسئلة قديمة عشان تستوعبون.
~الفاينل:
النوت اسهل واوضح، ما يحتاجون دورات كلش، فيهم جانب حفظ كبير ف درسوهم مبجر وراجعوهم اكثر من مرة. واسئلتهم بالامتحان ٩٩٪ منهم واضحين للي دارسهم عدل.
المادة الرابعة والأخيرة: المادة الاختيارية-مسؤولية قانونية
المادة حيل حلوة وممتعة، وحيل related to the medical field. راح تدرسون فيها متى يكون الطبيب غلطان ومتى ما يكون غلطان، متى يتحاسب على خطأه ومتى ما يتحاسب، وشنو السيناريوات المتوقعة وشنو مسؤولية الطبيب بكل منهم هل لازم يحاسب أو لا؟ المادة حيل حلوة وممتعة وتعطيكم تصور عن ممارستكم لمهنتكم مستقبلًا. عكس حقوق الانسان اللي كانت مادة ابعد ما يكون عن اهتمام كثير منكم إذا مو كلكم وكانت مادة ثقيلة شوي، هالمرة بترتاحون❤️.
وخلصنا الحين كلامنا عن المواد، إذا في نقطة مو واضحة بأي شيء لا تترددون تسئلوني❤️
الحين ننتقل إلى..
رابعًا: توصيات دراسية عامة:
١-الحضور مهم بهالكورس، لا تقولون دكتور ما يفهم والآكسنت ماله مو واضح هذا مو عذر والله، عودوا نفسكم عالحضور وصدقوني الناس اللي يبون مصلحتكم ما يقولون لكم سحبوا.
٢-عودوا نفسكم عالتنويت بكل المواد، التنويت مو شرط إيي منه اسئلة بالامتحان كثر ما إنه يساعدكم تستوعبون النوتة وتسرع عليكم دراستها. ولإن بسنة ثانية مهم تنوتون وتحضرون بعد، ف عودوا نفسكم من هالكورس.
٣-ركزوا تنوتون بمحاضرات د.هنادي بيولوجي ود.عبدالله الطيار ايبديميولوجي صج إييبون من كلامهم اسئلة. لو ما مداكم تنوتون سمعوا تسجيلاتهم ضروري ضروري ضروري.
٤-خلوا هدفكم بكل مادة A من البداية، عشان تشدون حيلكم وتشتغلون بضمير، استهدف القمر لتصيب المنارة🌟.
٥-طقوا نوت كل المواد أكثر من طقة، بيولوجي لا تدشون الامتحان بدون ما تطقون طقتين عالأقل!! عالأقل فاهميين؟ ضروري والله وراح تتذكرون كلامي بامتحانكم.
٦- الاسئلة القديمة، الاسئلة القديمة، الاسئلة القديمة. البيولوجي الامتحان ثلاترباعه مكرر، حلو امتحانات من ٢٠١٠ لي ٢٠١٦، حلوا لين يطيح حظكم. والـbbe بعد نفس الشيء حلوهم كلهم نصيحة نصيحة نصيحة.
٧-الـbbe مادة غدّارة، ف لا تغفلون عنها وخلكم متيقظين فيها طول الوقت. تذكروا إنها مادة حرمت ناس وايد من طموحهم وما قدروا يكلمون بهالكلية بسببها. ولإني خايفة عليكم قاعدة اوصيكم عليها للمرة المليون.
خامسًا: دروس أنقلها لكم من القلب إلى القلب❤️:
١-أول شيء، هذي بداية يديدة، لذلك استغلوها عدل. يقولون: it's never too late to start again. ابدوا مرة ثانية بنشاط وبقوة وبهمة💪🏼 خلوا هدفكم ببداية هالكورس عالي، شدرا حيلكم فيه من البداية عشان تحصدون نتايج ترضيكم بالنهاية🌟
٢-استوعبوا شنو الاشياء اللي غلطتوا فيها الكورس الأول، سجلوهم بورقة، بنوتس بفوناتكم، أو خلوهم براسكم. وعمركم لا تكررونها.
٣-قللوا من الدورات كثر ما تقدرون، برأيي هذولا الاشياء اللي تستاهل دورات بس:
-بيوستات كله (ضروري!!!)
-ايبديميولوجي ميدتيرم (مهم لإن فيه مسائل)
-بيولوجي embryology (مهم لإنه concept يديد ومتطور)
-بيولوجي نوتة د.مي مغربي مالت الميدتيرم، وmeiosis and mitosis ملوت د.هنادي، بس تقدرون تستغنون عن الدورات بيوتيوب
الباقي تلقونه بيوتيوب
٤-قنوات يوتيوب مفيدة وايد بالبيولوجي وبباقي السنين بعد: crash course- khan academy, هذولا وايد حلوين خصوصًا كراش كورس تونس!❤️❤️
٥-اخلصوا النية واحتسبوا الاجر بالجهد اللي تبذلونه وعمركم لا تيئسون❤️
٦-وأخيرًا؛ ساعدوا غيركم فبالمساعدة ولو بالأمور البسيطة بركة✨.
سادسًا، وأخيرًا وليس آخرًا، مفاجأة صغيرة مني لكم، أول مرة أسويها صراحةً ما سويتها المرة اللي فاتت، وأتمنى تفيدكم معنويًا🙏🏼:
مثل ما تعرفون أنا طول التدوينة تكلمت عن نفسي، وعن تجربتي الشخصية، وأدري مرات الواحد يحتاج اكثر من راي عشان يريحه نفسيًا. لذلك جمعت لكم آراء جم طالبة من دفعتي بخصوص الكورس الثاني -الله يعطيهم العافية- وقلت لهم يكتبون عنه باختصار، واخترت إن يكونون من دفعتي لإنهم الأقرب لكم سنًا. سألتهم شنو الاشياء السهلة فيه، شنو الأغلاط اللي سووها، وإن يتكلمون عن الكورس الثاني باختصار، وهذا كلامهم:
١-منى الرشيدي - دفعة ٢٠١٦
“2nd semester was way better than the 1st one. This is mainly because most of us got better in managing their time. Material wise, the subjects were not easier, but they were more interesting! especially biology & epidemiology. The English 182 vocab book was definitely waaaaaaaaay better than the previous one because it was more entertaining. The biggest advice I have for you is have as much fun as you can BUT don’t neglect your studies! in the 2nd semester, you’ll have plenty of free time, so use it wisely.”
٢-بتول المعاتيق- دفعة ٢٠١٦
"بالنسبة لي كان الكورس الثاني واايد أسهل من الأول لأن عرفت طريقة الدراسه المطلوبه تقريباً يعني تعلمت من أخطائي بسنة أولى أني ماكنت أحضر اللكجرات وماكنت أركز بالدورات وكنت أضيع وقت وايد في الجامعه بدون هدف ..
الكورس الثاني وايد أسهل اذا نظمتوا وقتكم، وطردتوا الأفكار السلبيه من تفكيركم
راح يكون الوقت الي تدرسون فيه وايد أقل من الوقت الي بتستانسون فيه بالكليه أو مع أهلكم
بترجعون لحياتكم الطبيعيه مع شوية دراسه
بس شي واحد ندمت عليه بأولى الكورس الثاني ، أستهنت بعطلة الفاينل ومادرست عدل على اساس بعطل ، واخترب علي تعب الكورس كله لأن نسبة امتحان الفاينل عاليه فتأثر على قريد الماده ..
تنظيم الوقت تنظييم الوقت ثم تنظيم الوقت أهو أهم خطوه تسهل الكورس الثاني عليكم
البايو مضمون من امتحانات سابقه ودراسه أول بأول ( أكثر ماده ترفع لكم المعدل ومضمونه ) فحيلكم فيها👏🏼💪🏻
الله يوفقكم دكاترة المستقبل.."
٣- رواء الغنام- دفعة ٢٠١٦
"اوكي.. ما أعرف أكون رسميه بهالسوالف ف بوصل لكم تجربتي بأسلوب بسيط عفوي😅💕
بالنسبه لي الكورس الثاني was a piece of cake
مو بس دراسياً .. نفسياً كان حيل أحسن من الكورس الأول بمراحل.. شعوركم بالضياع راح يتلاشى شوي شوي 😂
صرنا more stable & we knew how to handle it الدورات قلّت، المحاضرات صارت أبسط ومفهومه أكثر .. من جذي كنا مرتاحين و"سعيدين" أكثر بالكورس الثاني😁
تعودنا على الجو ، على الكليّه، على المواد والدراسه.. وتعودنا على بعض as a batch
هذا بالنسبه للجو الإجتماعي...
أما دراسياً :
من أفضل المواد اللي درستها بالكليه وأعتقد الغالبيه يحبها اهيا البايولوجي.. حيل حبينّاها لان somehow it's related to medicine .. ف حيل كان سهل علينّا ندرسه .. باستثناء جم نوته طبعاً😁
نصيحتي بخصوص البايولوجي حضروا المحاضرات الدكاتره شرحهم حلو ، ونوتوا معاهم، ما أقولكم درسوا يوم بيوم.. الموضوع أبسط.. لو تنظمون وقتكم وتدرسون للبايولوجي بالويكند على مايصير وقت الامتحان بتكونون مخلصين الكميّه وطاقين طقه ثانيه بعد😅
البايوستات.. ماعندي نصيحه امانةً😂😂.. اذا د.أحمد البطاينه اللي يشرح حضروا له شرحه حيل حلو، هالماده اعتمدت فيها على الدورات بشكل كااااامل والحمدالله قريدي كان حيل زين وفوق الaverage ..
الelective .. كان بريك لنا من المحاضرات.. الدكتور حدددده يونس والمحاضره كانت ضحك 😂😂.. ف حده لاتشيلون همها 💕
English 182 .. You do have to forget all the rules you have taken in 181 , Follow ur teacher's own roles .. لازم تمشون على قوانين الدكتور مالكم وتنسون ملوت 181 الا بالأشياء العامّه ..
وانا الحمدالله طلعت بـ A- لان خلاص عرفنا تقريباً كل الأشياء خصوصاً بالwriting وتعودنا .. بس once again, follow your teacher's own rules .. لأن يختلف عن دكتوركم ب 181
عشان تضمنون القريدات اللي ترضيكم💕
الفوكاب عجييييييييب ويونس!!! حيل حيل بتحسون بفرق وانتوا تدرسونه لأنه حلو والمصطلحات سهله.. وعادي بساعه تخلصون كل الكميه لأن صج سهل فـ لا تحاتونه💕💕
| هذا كان كل شيء.. موفقين يارب.. دشوا هالكورس بحماس وتفاؤل لأنه صج راح يكون كورس حلو بإذن الله🙌🏼💕
If u have any question, feel free to contact me 💕💕
رواء الغنّام - سنه ثانيه"
٤-هاجر العتيبي- دفعة ٢٠١٦
"الكورس الثاني بالنسبة لي كان حيييييل احسن من الاول. المواد كانت اسهل و احلى، و تقدرون تشوفون فيها قريدات حلوة ان شاءالله، و الشي اللي فرق معاي ان الدورات قلّت بشكل كبير، الBBE بس اهي اللي احتجت فيها دورات، اما البيولوجي يندرس بدون دورات، اعتماد كلي عالنوت و الامتحانات القديمة، و ان شاءالله تشوفون الA، هالشي يعطيكم وقت تجابلون النوت بدال لا يضيع من دورة لي دورة، و نفسيًا بتكونون مرتاحين بالدوام. الانقلش ما يتغير فيه شي، كله يعتبر براكتس للقديم بس مجرد انكم تكتبون اكثر من فقرة بدال وحدة، والدكاترة عسل لحد يأثر عليكم لما يذم.
ان شاءالله اللي ما سوا زين الكورس الاول، الكورس الثاني يرفع معدل، لا تحاتون💓"
وأخيرًا، هذا رابط سويته حق نوت دفعتي بهالكورس، لو ودكم تلقون نظرة عالنوت ونظامهم:https://app.box.com/s/j6i84y83b7fzqkathyczezzf0xa9skof
أتمنى من كل قلبي إن هالتدوينة تفيدكم. والسموحة عالتقصير والتأخير بعد، مثل ما تعرفون إني سنة ثانية وعندي امتحان قريب، كل اللي أبيه منكم بالمقابل دعوة بس لو استفدتوا من هالتدوينة لي بالتوفيق، ولدفعتي أكيد❤️.
وطبعًا لو عندكم أي سؤال كلموني شخصيًا أو بالآسك أو تويتر، وعيوني لكم💓.
موفقين ياربّ. وياربّ يكون كورس خفيف لطيف ظريف على قلوبكم✨👩🏽⚕️👨🏽⚕️.
you can contact me via
twitter: @iShiho_
ask.fm: https://ask.fm/HISSA99
