السلام عليكم حبايبي دفعة ٢٠١٧، أول شي بقولكم مبروك تخرجكم الأول وعقبال الثاني ياربّ. أبيكم تكونون فخورين باللي أنجزتوهوصدقوني اللي مريتوا فيه ما كان سهل بس كنتوا قدها، وعديتوها.
كلينكل ييرز، وايد كنا نسمع عنها ونحسها شي "واو" وبعيد، بس تخيلوا؟ أنتو وصلتوا لها.
يمكن سمعتوا إن كلينكل ييرز أسهل، بس لا، مو بالضبط. لكن بعد مو أصعب من بري كلينكل.
ويمكن سمعتوا إنها صعبة، لكن لا. حيل doable ومقدور عليها بالاجتهاد.
من خلال هذي التدوينة بنقل لكم تجربتي ونصايحي الشخصية، اللي عادي جدًا ما تنطبق على بعض منكم، لكنها من القلب للقلب مثلالتدوينات اللي سبقتها، وكلي أمل إنها تساعدكم أو عالأقل تخفف عنكم سترس البداية.
هالتدوينة، بعد هالمقدمة، بتكون أقسامها كالتالي
-شالفرق بين دراسة كلينكل وبري كلينكل؟
-سنة خامسة وتقسيمتها؟ والروتيشنات؟
-المستشفى؟
-أول روتيشن: كوميونتي مدسن/طب المجتمع
-ثاني روتيشن: مدسن/ الباطنية
-ثالث روتيشن: سيرجري/الجراحة
-فاينل سنة خامسة
-لنك امتحانات كلينكل كاملين
-خاتمة
بچذي تنتهي المقدمة، ومثل ما قلت لكم كل هالكلام من القلب لي القلب فماراح أتكلف كلش واخذوها سوالف أكثر من إنها نصايح. D:
_________________________________________
-شالفرق بين دراسة كلينكل وبري كلينكل؟
الفرق حيل واضح. ببري كلينكل كنتوا تعتمدون عالنوت ١٠٠٪, بكلينكل المصادر متنوعة، مافي مصدر مثالي، كل شي يكمل بعض، الكتبمصدر، النت مصدر ثاني، وحتى المستشفى اللي تداومون فيه مصدر. تركيزكم لازم يكون متوزع، وكل ماكان متوزع أكثر كل ما اكتسبتواخبرة أكثر.
الحين المواد اللي بتدرسونها نفسها اللي خذيتوا عنها موديولات، لكن— الحين الدراسة اكلينيكية اكثر، بحيث تدرسونها من ناحية الأمراض،البرزنتيشن حق كل مرض، العلاج، إلى آخره. ربط المعلومات مهم جدًا بكلينكل، والفهم العميق مطلوب، عمركم لا تحفظون، فهموا:: لأن كلمعلومة بتحتاجونها بسادسة، وبسابعة، ف درسوا عدل من البداية عشان يتكون عندكم أساس قوي، حتى لو نسيتوا بعض الأشياء لكنالأساس القوي بيساعدكم تتذكرون بوقت مراجعة قصير جدًا.
_________________________________________
-سنة خامسة وتقسيمتها؟ والروتيشنات؟MSDs؟
سنة خامسة فيها ٣ روتيشنات، و٣ قروبات A B C
~كوميوتتي مدسن
~الكتڤ "عقب كوميونتي مدسن، ماعليه قريد بس pass or no pass—اللستة تتغير كل سنة وكل قروب. مدته شهر تقريبًا. ماراح أتكلم عنهأكثر لأنه بيكون شي وايد بسيط إن شاء الله.
~مدسن
~سيرجري
ترتيب الروتيشنات، والله، والله، والله، مو مهم. أدري بعضكم يمكن كانت بباله خطة معينة أو انحط بروتيشن ما يبيه، بس والله ماتفرق ولا ١٪. بالنهاية بالفاينل الكل بيأذي نفس الأداء، وبتكونون متساويين. وصدقوني، صدقوني، كل شي بيكون تمام والموضوع بيكون سلس فوق ماتتوقعون، بنهاية السنة الكل بيقول: "اوه لو ماكنت بهالروتيشن ماكنت ادري شنو بسوي"
إهي جذي الخيرة من الله.
~غير الروتيشنات في MSDs.
هذولا محاضرات وايد، وايد. تنعطى بيوم كامل عادي ٥ محاضرات. صج overwhelming ف لازم تنتقون شنو تدرسون. وتفريغهم مهم. أوتنويت عالأقل.
MSDs سيرجري مهمين جدًا. خصوصًا اورثو ويورو. لا تقطون MSD سيرجري. مدسن عادي بصراحة ماتفرق، لأن مع الدراسة بتعرفونكل شي تقريبًا، مااا عدا، وأكرر، ماااا عدا، MSD نفرو ونيورو. هذولا يندرسون عدل مع التفريغ.
كوميونتي مدسن MSDs هذولا أهم من حياتكم. نص الفاينل منهم، مهمييين.
_________________________________________
-المستشفى؟ "شنسوي؟"
~دوام المستشفى يختلف حسب إذا سيرجري ولا مدسن، بس بشكل عام يتكون من راوند، وسشن بعد الراوند.
~كل قسم "مدسن وسيرجري" راح يعطونكم لوق بوك، هذا تخلون كل دكتور يمر عليكم يوقع لكم. مثلًا راوند؟ يوقع. كلينكل سشن؟ يوقع، إلىآخره.
~الاثكس: تذكروا قسم الطبيب. اللي تشوفونه المستشفى حاولوا ما تقصونه للي برا مع تفاصيل ممكن تكشف هوية الشخص. لما تفحصونمريض حافظوا على his dignity استأذنوا منه بأدب، خلكم رقيقين وسئلوا عن الألم، وآخر شي غطوا المريض وشكروه وادعوله بالشفاء. هالتفاصيل هذي مهمة لأنها أشياء بديهية لكن للأسف ما نشوفها دايمًا، حطوا بالكم على هالأشياء عشان تصيرون دكاترة عجيبين ومراعين،وأنا متأكدة بتكونون جذي بإذن الله.
~اللبس: سكربز بأي لون عادي، لابكوت، نيم تاق مهم و الid, تقريبًا هذا أهم شي. وتقدرون تلبسون بدلة وفوقها لابكوت، بعد عادي. اكسسوارات حاولوا تقللونها. نوتة صغيرة وقلم.
~التوقيع: مدسن وبعض مستشفيات سيرجري لازم توقعون الصبح مبجر. مدسن ٧:٣٠ تنشال الورقة، بالكثير ٧:٤٥. سيرجري جنه بسالفروانية فيه توقيع، وتنشال الورقة ٨ تقريبًا. التوقيع مهم طبعًا -غير اللوق بوك- ولا راح تنحسبون غياب.
~الغياب: سيريس مو نفس بري كلينكل، تقريبًا لكم يوم واحد بس بالروتيشن تغيبون أو ٢ بس مو متأكدة، ف ضروري تحرصون علىهالشيء وما تتهاونون. ولو صار عندكم غيابات وايد ماراح يخلونكم تحضرون الامتحان.
_________________________________________
-أول روتيشن: كوميونتي مدسن/طب المجتمع
كوميونتي مدسن أهو طب المجتمع، يمكن البعض قالوا لكم إنه نفس BBE بس لا، جد جد لاء.
الروتيشن ينقسم إلى قسمين مهمين
~الريسيرچ: تتوزعون بقروبات تختارونها أنتو، ف حرصوا تختارون ناس نفس جوكم يعني، عشان إذا التيم كان حلو بتصيرون زينين معبعض والشغل يكون سلس. الريسيرچ يمكن بالنسبة لكم يكون شوية معقد بس ترا كل قروب له supervisor وassistant والأثنين يساعدونكمبكل خطوة، راح تجابلون قروبكم اكثر مما تجابلون أهلكم، وراح يكون في اجتماعات وااايد بينكم، وصدقوني كل شي خطوة بخطوة منliterature review لي writing the paper بيساعدونكم فيه، محد يتوقع منكم تكونون واو وعارفين كل شي. فمابيكم تحاتونه كلش كلش. بيكون الموضوع سلس وحلو ومن أحلى التجارب بالكلية والله. راح تتقسم المهام على الأسابيع، بس في بعض الدكاترة ماراح يلتزمونويسبقون، بس مثلًا يكون في timeframe حق الداتا كولكشن مثلًا. وأغلب الشغل بيكون عقب امتحان الروتيشن. بنهاية الروتيشن راحيخلونكم تسوون برزنتيشن للدفعة عن الريسيرچ مالكم، تقدرون تقسمون بينكم، والبرزنتيشن ما يتعدى ١٠-١٥ دقيقة. وعقبها تقريبًا ٥-٧دقايق أسئلة لكم. سهالات وتجربة حلوة حييل ومختلفة، والله.
~المواد النظرية/متيريال الامتحان: بشكل عام لكل المواد، نصيحة نصيحة نصيحة، الحضور مهم. التفريغ مهم. بليز لحد يقولكم هالدكتورممل أو هذا ما منه فايدة لا كلهم لهم فايدة وعادي جملة عشوائية يقولونها تكون سؤال امتحان. والدراسة المبكرة مهمة بعد، والتكرار مهم. ليش؟ لأن الامتحان بويك ٤، وبيكون كتابة مو مثل ما كنا متعودين قبل، ف يبيلها مجهود الدراسة، شدوا حيلكم كلها ٤ أسابيع وبعدها بتهونالأمور بالريسيرچ وايد.
المواد كالتالي:
*بيوستات: من أسهل المواد دراسةً، بس محتاجة ربط معلومات قوي، ف حاولوا عقب كل نوتة تسوون سمري بو صفحة وحدة او map لأهمالقوانين، بيسهل عليكم المراجعة، همن الجداول مهمين—مهم تعرفون وين تطالعون بالجدول أي خانة وجذي، عشان جذي أقولكم حضروا! عشان تعرفون عن شنو الدكتور قام يتكلم بالضبط
*EBM: مادة ثقيلة شوي، بس مهمة. يبيلها فهم وحفظ مع بعض::محاضراتها طويييلة، والسمنارز أطول. بس كله مهم. أدري شوي متعبوملل، بس ميخالف، كله يسوى. وكله داش بالامتحان صدقوني.
*مواد public health/epidemiology: حفظ بالدرجة الأولى. تذكرون الاجتماعيات؟ نفسه بالضبط. جذي حطوا النوتة وحفظوا تعريفتعريف؛ نقطة نقطة، حتى الرسومات حفظوهم وعرفوا شلون ترسمونهم لأنهم أسئلة امتحان والله مو قام امزح، تقدرون تشوفونالامتحانات القديمة عشان تتأكدون لول. في نوت ثقيلة حيل مثل نوتة economics/surveillance وبعض الMSDs ف هالنوت سئلواالدكاترة هل الأسئلة بتكون MCQs؟ وبالأغلب إي. لأن هالنوت حچي وايد حتى لو حاولتوا تحفظون كل شي بيدش ببعضه، عوار راس. فسئلوا الدكتور عن طريقة الأسئلة عشان توجهون دراستكم صح.
*مادة ethics: لحد يقول ندرسها وما تيي، أنا بروتيشني يالنا جدول كامل وجم سؤال، حضروا محاضرات دكتورة منال، المحاضرات حلوةوتحفظون المهم منها، سووا ملخص بسيط لأهم النقاط والتواريخ ووزعوه بينكم، وإذا عطتكم assignments أو قالتلكم اقروا عن موضوعحرصوا تقرونه، لأن عادي يكون سؤال امتحان.
تقسيمة الدرجات:
End of rotation: 20% exam, 10% research paper.
Final exam: 25% written, 25% MCQs, 20% research paper.
كوميونتي مدسن أهو الوحيد اللي له أورال للي يحتاج، وأغلب النقاش بالأورال إذا مو كله عن الريسيرچ بيبر، ف لازم تحرصون عليهاوتكونون فاهمينها عدل.
ملخص لأهم النصايح:
-بلشوا دراسة مبچر حيل، وكرروا الحفظ، وحفظوا عدل لأن الامتحان كتابة مو MCQs وحفظوا كل حرف حتى عنوان السلايدة.
-التفريغ والحضور مهمين.
-حلوا امتحانات قديمة مبجر مو قبل الامتحان بيوم عشان تعرفون شنو تراجعون.
-عطوا الريسيرچ بيبر حقها لأن كل ما تتعبون فيها كل ما تكون قوية.
بچذي نكون خلصنا كلامنا عن كوميونتي مدسن.
_________________________________________
-ثاني روتيشن: مدسن/ الباطنية
الباطنية أساس الطب، وأصعب شيء فيه لإنه بحر بحر. مستحيل أحد يختمه ويخلصه:: عشان چذي الشطارة بإنك تعرف شنو المهم، تحددأولوياتك، وتختار المصادر (((اللي تناسبك))) حتى لو كانت تختلف عن نصايح غيرك. طرق التوصيل كثيرة، بس المعلومات وحدة. ف بالنهايةالموضوع شخصي جدًا.
مدسن ينقسم إلى general medicine and subs.
جنرال مدسن:
-cardio
-neuro
-nephro
-gi
-derma
سبز:
-rheumatology
-hematology
-endocrine and diabetes
-respiratory
تلخيص للمصادر المهمة ومميزات كل واحد منهم:
أولًا الكتب
-بيبي كومار: يوزعونه كمسا، أهو مصدر الكلية الرسمي. ف يفضل تعتمدون عليه أو تخلونه أولوية.
-step up to medicine: كتاب حلو والله، وواضح، بس ما يمدي تمرون على مليون مصدر، لذلك بالنسبة لي استخدمته حق روما وهيما بسلإن فيهم تفاصيل وايد وحسيته بكومار حوسة شوي؛ وصج صج فادني، وماأنصح بغيره حق هالتخصصين. وفي ناس يعتمدون عليه حق كلالتخصصات، وهمن عادي. مثل ما قلت لكم بالبداية الموضوع شخصي جدًا! يعني بالنهاية شوفوا شنو اللي يخلي المعلومة تدش أسرع،واعتمدوه.
-تورونتو: أهو يعتبر review book وحق لڤل عالي يعني ألريدي تكونون عارفين التوبك ف هذا بس يرتب الأفكار، لذلك ماأنصح فيه كبداية،لكن مثلًا لو حسيتوا شغلات مو واضحة، رجعوله، ممكن يفيدكم.
-كتاب essential examination حيل مهم حق physical examination، وينفع وقت الأوسكي وmini cex.
ثانيًا، وبالنسبة لي وللكل أهم شي بالدنيا، medicine survival by 6ebeya. جد جد. يعني مادري شقول، بس هذا راح ينقذ حياتكم. فعلًااسم على مسمى. بالنسبة لي كنت أدرس التوبك من كذا مصدر—بعدين ابطله من سرڤايڤل وأقراه، وأكمل المعلومات أو أضيف أشياءاكسترا، وخلاص هذا يصير مكان المراجعة. هالطريقة بتفيدكم وايد للفاينل. جربوها وادعولي.
ثالثًا: مواقع تعليمية
-المصدر الأساسي والموثوق دايمًا UpToDate، كل ما اختلفتوا على معلومة ارجعوله. ولو المعلومة مكتوبة بالكتاب شي وuptodate شيثاني تمشون عليه. حاولوا تراجعونه حق سوالف management خصوصًا ريسب مثلًا asthma وباقي المواضيع لان الـguidelines تتغيردايمًا
-يوتيوب قناة paul bolin بس أنا استثقله بصراحة محاضراته طوييلة وتخليني أمل، لكن اللي نظامه يحب يسمع ويبي أحد يشرحله ممتازجدًا.
-موقع online meded هذا عاد، جد جد، المفضل عندي على الاطلاق؛ من بري كلينكل وأنا اعتمد عليه بترتيب أفكاري، يمكن ما يعطيكم كلشي ١٠٠٪ لكن يعطي نبذة لا بأس بها عن الموضوع، كنت أبدي فيه "أشوف فيديو" وبعدين أبلش قراءة واستكشاف.
-موقع Amboss بعد أحبه واستخدمه من أيام بري كلينكل. يعرض المواضيع على هيئة articles وجداول وغيره، استخدمه اذا بغيت أقرا عنشي عالسريع أو اراجعه بسرعة.
-مواقع webMD and medscape ينفعونكم وقت الراوند اذا ودكم تقرون عالسريع عن اللي تشوفونه، ومتوفر لهم ابليكيشنات حق الفونوأنصح تحملونهم.
الحين بتكلم عن الدوام وشنو يصير فيه بالضبط:
-morning session أحيانًا يسوونها الصبح، كل جم يوم وحدة، ويتناقشون بموضوع معين، مدتها ٤٠-٦٠ دقيقة مو أكثر، وتكونinteractive مو لكچر.
-rounds: تمرون مع اليونت على المرضى، ويصير نقاشات عن أهم الupdates وخطة العلاج، فتحوا اذونكم عددل! دايمًا الحالة الليتشوفونها وتسمعون عنها عمركم ما تنسونها:: استغلوا الراوند عدل مو بس ساعتين تضيع من حياتكم وأنتو سرحانين. حرام جد. جدًا مفيدينوالله.
-clinical session تكون آخر شي بالدوام، بالغالب يعلمونكم على examinations ويخلونكم تتدربون، استفيدوا منهم مهمين وايد. وهذيفرصتكم الوحيدة للتعلم لأن بالراوند ما يمدي تسوون فحص.
-pbl: كل اسبوع في كيس وتاسكات، نفس بري كلينكل، بس كل اسبوع دكتور غير. حرصوا تاخذون تاسك لأن في evaluation والدكاترةيركزون بأسامي منو شارك ومنو لاء.
-امتحانات miniCEX: اهو امتحان، يبدي من ويك ٤، كل واحد يسوي ٣— ١ هستري، و٢ فيزكل اقزام. شنو الحالات؟ انتو وحظكم. حسبشنو في حالات بالجناح. ماعليه درجات بس عليه pass and no pass. في حالة احد ما عداه، لازم يعيده. شلون تتجهزون له؟ بس تدربوا. على الفحص والهستوي، وخلاص أموركم بتكون تمام ان شاء الله.
-clinical note: هذي مطلوب منهم تسوون ٣، ٢ خلال جنرال ووحدة خلال سبز. اهي بيسكلي تمسكون مريض وتاخذون منه هستريوتسوون له فحص؛ وكل شي تكتبونه بفايل word وتطبعونه وتسلمونه لدكتوركم المسؤول. مهم حيل حيل تسوونهم. ونصيحة صغيرة، من اوليوم دوام او اول اسبوع اختاروا الكيسز واشتغلوا عليهم، سئلوا دكاترة اليونت شنو في كيس مناسبة نسوي لها clinical note وراحيعطونكم. لا تخلون الموضوع حق آخر شي وتتوهقون.
مهارات لازم ما تخلصون الروتيشن إلا وأنتو تعرفونها:
-شلون تاخذون هستري عدل
-شلون تسوون فحص بالخطوات، وشلون تصيدون الfindings
-شلون تقرون xray, ecg, and endoscopic findings
محد راح يطلب منهم لڤل أدڤانسد. بس مهم عالاقل تعرفون الاشياء الي تخص بعض الامراض.
الامتحانات وتقسيمة الدرجات
-end of rotation: eloops based 30%
-final exam:
theory 2 papers MCQs, 35%
OSCE: history, Physical examination, and eloops, 35%
ملاحظة للفاينل، في حالة الرسوب بالاوسكي بس الطالب ياخذ ريست، وحتى لو بالثيري بس. هذا العيب بكلينكل، الموضوع مو مجموع 70% وخلاص!، كل امتحان يتعامل بروحه. اذا رسب الشخص بامتحان واحد بس ريست. هالمعلومة مو وايد ناس يعرفونها ف حطوا بالكم ودرسواحق كل امتحان عدل.
نصايح للامتحانات:
امتحان end of rotation
درسوا eloops من وقت مبجر. وين تحلصونهم؟ بحط لكم لنك تحت فيه all clinical years exams. درسوا ملوت كل السنين، أحيانًا يتكرروأحيانًا غالبًا لا، بس عرفوا طريقة الأسئلة وجوهم.
امتحان الفاينل: حلوا امتحانات قديمة وعرفوا ليش كل اجابة تم اختيارها/استبعادها. يعني درسوهم دراسة مو بس حل.
امتحان الاوسكي:
هذا عاد قصة ثانية،
-اول قسم الفحص physical examination
توزيعة الدرجات كالآتي
10% your introduction to the patient.
30% your steps and techniques.
40%!!!!! On positive findings that you should pick up (all are real patients. There must be something positive. Repeat the exam until you find it. Take your time!)
20% for discussion and differential diagnoses of the condition.
الستيشن ٨ دقايق تقريبًا، ٥ دقايق فحص و٣ دقايق مناقشة. خلوا الفحص مالكم focused. واغلب وقتكم اقضوه بانكم تصيدونالfindings. مو تضيعون ٣ دقايق على inspection!!!! لا. مشوا مشوا، عالسريع، لين توصلون للفحص الصجي واستغلوا وقتكم فيه.
مثلًا: كارديو: اغلب وقتكم خلوه auscultation عشان تصيدون الmurmurs
ابدمن: اغلب الوقت palpation
نيورو: اغلب الوقت حاولوا تصيدون فيه upper vs lower motor neuron lesion.
لا تعطون وايد من وقتهم للinspection. مايسوى جد.
بعد كل اقزامنيشن راح يسألكم الدكتور ان تسوون summary on your findings وكونوا واثقين، يمكن يربكونكم، انا مثلًا لما قلت له عنmurmur قالي بس اللي قبلج كلهم قالوا نورمال شمعنى انتي صدتيها؟ المهم انا كنت صح، بس مرات يحبون يوهقونكم
وهمن مرات الدكاترة يكونون حيل طيبين ويساعدونكم ويوجهونكم صح. ومرات للأسف يكونون يعني قاسيين شوي، انتو اهم شي لا تراددونولا تدافعون! كل شي يقولونه تم وحاضر وان شاء الله، حتى لو غلطوكم بشي انتو واثقين منه، عمركم لا تجادلون بامتحان الاوسكي.
الهستري والeloops ما يبيلهم شي تقريبًا، بس تدربوا. وeloops بالغالب يكونون xray and ecg بس، وتأكدوا من القسم قبل امتحانكم.
أهم النصايح حق مدسن:
-الفهم قبل الحفظ
-خلوا أساسكم فيه قوي، راح يفيدكم بكل شي
-استغلوا كل لحظة تعليمية بالمستشفى
-اذا في سؤال ببالكم دايمًا سئلوه ولا تستحون
-لما تداومون خلوا الكرامة على جنب وتقبلوا الزف والنصايح بصدر رحب
-الالتزام مهم جدًا وعمركم لا تتأخرون
-لا تحطون ببالكم ان تختمون مدسن لانه باختصار مستحيل ينختم. لا تحطون نفسكم بهالضغط. بس رتبوا اولوياتكم بأهم المواضيع وعادياذا ما مشيتوا على كل شي لا تحسون بتقصير او غيره.
وهذا تقريبًا أهم شي لمدسن. يمكن أكثر روتيشن متعب بس أكثر روتيشن ممتع وانترستنق. مستحيل تملون منه.
_________________________________________
-ثالث روتيشن: سيرجري/الجراحة
سيرجري دراسته أبسط بكثير من مدسن. بتحسون بالفرق بنفسكم.
سيرجري يتضمن الآتي، وكل واحد منهم بكتب من وين تدرسونه لإن كل واحد منهم غير تمامًا عن الثاني:
-general surgery: درسوه من first aid and surgical recall. يفضل الاثنين مع بعض.
جنرال سيرجري يتضمن
All GI
Endocrine
Breast
And some other stuff
-subs orthopedic surgery: درسوه من بوكلت د. عبدالرحمن الاشقر، من MSDs, من الclinical sessions, بوكلت د. علي جراغ، ومنالدوام. يمكن اكثر تخصص overwhelming لكثرة المصادر، بس ضروري تغطونهم كلهم والله مو غشمرة، حيل ضروري.
-subs urology: درسوه من تورونتو، ومن MSDs. التخصص حيل ألطف من اورثو.
كلهم طريقة دراستهم تتضمن المراجع اللي ذكرتهم لكم، حل الأسئلة القديمة بتركيز وانتباه، وخبرة المستشفى.
دوام سيرجري:
-دوام المستشفى
راوند وكلينكل سشنز، حيل أخف من مدسن مو شوية، الراوند اذا طول ياخذ ربع ساعة بس🤣
-clinical skills lab
مهمين حيل، وايون بامتحان الاوسكي، بيعلمونكم جم مهارة مثل DRE, insertions of foly’s, IV line placement, etc. ركزوا فيهم.
-PBL
بالاسبوع فيه ٢-٣، كل واحد يتكلم عن موضوع غير بالتفصيل، ومافي تاسكات بس المشاركة مهمة، وشوي يطول اكثر من مدسن لهالسبب.
امتحانات سيرجري
بصراحة ماادري شلون بيكون النظام حق دفعتكم بالنسبة للاوسكي. احنا والدفعة اللي قبلنا بسبب كورونا صار eloops only بوثالروتيشن والفاينل، ف انتو من بداية السنة مهم تسئلون القسم عن طريقته.
وبالنسبة للثيري نفس مدسن، paper 1&2 كلهم MCQS
ونفس مدسن، الرسوب باوسكي او ثيري يعني الرسوب بالروتيشن كله. مافي درجة تشيل الثانية مع الاسف.
سيرجري بتحسون كلامي عنه بسيط بس أهو صج هذا أهو. بسيط حيل مقارنةً بمدسن، وأظن لاحظتوا لول. دوامه اخف، ودراسته بعد نوعًاما اخف، لكن مؤخرًا امتحاناته قامت تصير صعبة، فلا تتهاونون.
اهم النصايح حق سيرجري:
-حاولوا تغطون سبز خلال روتيشنات السبز يعني مثلًا تداومون يورو، حاولوا تخلصون يورو.
-اورثو شدوا حيلكم فيه لانه واااايد ف لا تراكمونه للفاينل وتتأزمون
-حق جنرال سيرجري ابدوا دراسة من first aid وبعدين ثبتوا بrecall وكتبوا عليه الناقص وخلوه مصدر الدراسة للفاينل، جذي اسهل لكم.
وهذا تقريبًا كل شي يخص سيرجري
_________________________________________
-فاينل سنة خامسة
يمكن هذي اصعب فترة بالسنة، واصعب شي بكلينكل ييرز، ٣ روتيشنات، واوسكي، وكل امتحان جوه غير، والامتحانات نفسها متعبة يعنيبيبر ١و٢. مو قام اقولكم جذي عشان تخترعون ولو ان الخرعة زينة مرات، بس قام انبهكم عشان لا تراكمون الاشياء "وقت الفاينل ادرسهم" لاء، ماراح يمدي. اعطيكم اياها من الآخر ماراح يمدي. عشان جذي خلال الروتيشن سووا كل شي تقدرون عليه عشان تغطون اكثر كميةممكنة. وقبل الفاينل تصير مراجعة مركزة وامتحانات. التزامكم خلال السنة بيساعدكم وايد وايد وايد بهالفترة الصعبة. واحس اذا بطلع منهالبلوق بنصيحة وحدة مهمة فهذي هي النصيحة.
_________________________________________
-لنك امتحانات clinical years
https://drive.google.com/drive/folders/1hwEke6hmA3Ph9fxKoCH1sUTjIlV88tmX
هذا اللنك بيكون أهم شي بالسنة. كنز كبيير. بكل روتيشن استكشفوه، وبتلقون فيه وايد اشياء تفيدكم.
_________________________________________
-خاتمة
حاولت أنقل لكم تجربتي بأكثر عفوية ممكنة، كلامي ونصايحي مو فرض ولا شرط تلتزمون فيها، بس أتمنى تفيدكم أو تعطيكم نبذة عن الليالمفروض تسوونه. أهم شي خلوا بالكم طوييل لأن السنة يبيلها طولة بال جد. ولا تتحبطون من شي. كل يوم بيكون بداية يديدة، وهالسنةبكبرها بداية يديدة لكم تقدرون تفتحون صفحة بيضاء عقب خراب بري كلينكل لول. وبري كلينكل ما يحدد شنو بيكون مستواكم بكلينكل.
أتمنى لكم كل التوفيق أحباب قلبي، وأي سؤال بخاطركم أنا موجودة. ♥️ curiouscat.qa/Hissamoeba
-حصّه
