إي نعم، ليلحين ما افتكيتوا من قسم الإنقلش
راح تدرسونها الكورس الأول بس وبعدها تفتكون من هالقسم للأبد. هالمرة بيكون عليكم خفيف، والشغل كله بإيدكم ومتعمدين على نفسكم بنسبة ١٠٠٪.
كورس الانقلش هذا غير عن اللي درستوه بسنة أولى من كذا ناحية.
الناحية الأولى
هي اللي ذكرتها لكم، بتعتمدون على نفسكم بشكل تام
الناحية الثانية
قبل الرايتنق كانوا يحددون لكم يوم امتحان وتروحون تمتحنون، الحين يحددون لكم يوم تسلمون فيه الشغل بس
الناحية الثالثة
الشغل والموضوع اللي بتتكلمون عنه "أنتو تختارونه"، لكم مطلق الحرية
الناحية الرابعة
الشغل كامل عليكم، كامل قصدي إنكم بنفسكم تسوون الآوتلاين "اللي قبل كانوا يعطونكم إياه زاهب وأنتو تكتبون منه"، وتسوون المسودة إو الـrough draft, وتالي تسوون الـfinal draft. كله راح أشرحه إن شاء الله
الناحية الخامسة
راح يكون بنهاية الكورس oral presentation, تتجهزون له وتتدربون، ولاء مافي استثناءات، سواء كلاساتكم مكس أو بنات بروح أو شباب بروح، كلكم بتسوون جدام الكلاس كامل، والبرزنتيشن هم لازم يكون عن موضوع معين، تسوون له آوتلاين بالبداية، وبعدين بنهاية الكورس تقدمونه. بتكلم عنه بالتفصيل إن شاء الله..
الناحية السادسة
إن بالامتحانات midterm and final راح يكون في أسئلة تخص تشابترات الكتاب، يعني الكتاب لازم يندرس عدل لو تبون تفولون الأسئلة، بس سهلة حيل وواضحة وبيعلمونكم عليهم. لا تحاتون.
الناحية السابعة
هي إن كل الشغل لازم يكون مطبوع على ورقة A4 بمقاس معين وبنوع خط معين وبلون أسود وحتى الهوامش مقاساتها معينة ويحاسبون عليهم كلهم.
الناحية الثامنة
وهي كانت أتعس ناحية بالنسبة لي ولدفعتي ولكل الدفع السابقة واللاحقة وهي إن الكلاس الساعة ٨. من الأثنين لي الخميس الساعة ٨ الكلاس. يوم الأحد يكون أوف، الحمدلله
ويتشابه كورس الإنقلش هذا مع الكورسات اللي فاتت بإن امتحانات الـmidterm and final فيهم ريدنق ولسننق "بس عدد الأسئلة أقل، وأسهل للأمانة"، وإن الحضور إجباري، وإن لازم تسمعون كلااام مدرسييينكم. وبس تقريبًا!
الحين نبدي نتكلم صج عن محتوى المادة، المادة لها كتاب وتشترونه من شويخ، ماراح يتوزع عليكم ما أظن، إحنا ما توزع علينا. ومهم يكون عندكم، مهم. مهم. مهم.
المادة تنقسم لـ٤ أشياء:
١-امتحانات الـmidterm & final
٢-causes and effect essay
٣-research paper
٤-oral presentation
بتكلم عنهم بالتفصيل الحين، وكل واحد عليه نسبة معينة من المادة بس مو ذاكرتهم للأسف، بأول كلاس أتوقع بيوزعون عليكم ورقة فيها كل المعلومات وكل شيء جم عليه وچذي، فلا تحاتون
️
١-امتحانات الـmidterm & final
واحد نص الكورس، وواحد بنهايته. يحتوي على ريدنق ولسننق مثل ما أنتو متعودين، زيادة عليه أسئلة بتشابترات الكتاب راح يحددونها معاكم مدرسينكم ويدربونكم عليها، اقروهم وحفظوا المهم، بيكونون tricky شوي ف انتبهوا، لا تحاتونهم الحين.
٢-causes and effect essay
تختارون مرض يخص تخصصكم (إي، في بعض المدرسين يشترطون هالشيء، يعني لو كنتوا طلبة أسنان يبونكم تتكلمون عن مرض يخص طب الأسنان، ولو كنتوا صيدلة يبون تتكلمون عن شيء يخص الصيدلة، هذا شوي يشكل تحدي عالطلبة بس عادي تقدرون تسئلون الطلبة الكبار شلون كتبوا وممكن تستعيرون عناوين مواضيعهم بس لا تغشون وتاخذون موضوعهم كله! ترا إذا صادوكم بتصير مشكلة كبيرة).
وهالمرض، تكتبون عنه. واو حصه معلومة مفيدة المهم يعني، بيعلمونكم شلون تسوون وشلون ترتبونه، وطبعًا كل القواعد اللي تعلمتوها بكورسات الانقلش اللي فاتت تطبّق.
بدايةً تختارون موضوع، وفي لستة مواضيع عند قسم الانقلش ما يصير تختارون منها لانهم حيل سهلين او مكررين، فلازم تنتبهون إن موضوعكم مو منه، بعدين تسجلون موضوعكم عند استاذكم قبل ما احد من كلاسكم يختاره لان ما يصير طالبين يسوون نفس الموضوع
ثانيًا تسوون آوتلاين حق الـessay اللي تبون تكتبون عنه، هم راح يعلمونكم شلون تسونه، كلش ماراح يحيرونكم أو يطلبون منكم تسوون معجزة، وحيل سهل بالمناسبة. وتسلمونه بيوم يحددونه لكم.
ثالثًا تكتبون المسودة أو الـrough draft, هذي عليها أكبر قدر من درجات الessay، وتسلمونه أيضًا بيوم يحددونه لكم.
تتصلح المسودة وتتسلم لكم، تشوفون أغلاطكم، وتعدلون عليها، وجذي نروح عند..
رابعًا، الـfinal draft, واللي إهي بيسكلي نفس اللي كتبتوه اللهم تصلحون اغلاطكم اللي حاسبوكم عليها، وتالي تسلمونها. العموم ياخذ فيها فل مارك.
وأكيد، كل شيء تسلمونه يكون مـطـبـوع من برنامج Microsoft words. ولازم تسلمون الشغل بالوقت المحدد، الساعة ٨ يعني الساعة ٨، تتأخرون شوي ينقصونكم. حتى لو كنتوا بالكوبي سنتر ناطرين دور عشان تطبعون ماراح يتساهلون معاكم، ف خلصوا شغلكم قبلها بيوم وطبعوه مبجر عشان ما تتوهقون.
٣-research paper
تذكرون compare and contrast؟ هذا أخوه. تختارون مرضين، وتقارنون بينهم بكل النواحي اللي تقدرون عليها، causes risk factors symptoms treatment وغييرهم، هذا يعتبر أصعب شيء لإن لازم تدورون شغلات مشتركة بين المرضين وتربطون بينهم، الآوتلاين ماله لازم تكونون مركزين فيه حييل لنفس السبب، لإن لازم تربطون بچم صفة، بس كله بيعلمونكم عليه. وأيضًا إذا احترتوا شنو تختارون مرضين ممكن يتشابهون، القسم مسوي لستة فيها اقتراحات لمواضيع ممكن تختارونها، نصيحة اختاروا منها لإن بتسهل عليكم التفكييير بالموضوع.
نفس الشيء، تسوون آوتلاين، بعدين rough draft, بعدها final draft.
الـresearch paper عليها أكبر قدر درجات من المادة لإن مثل ما قلت لكم صعبة و تعتبر challenging. بس لما تخلصونها بتحسون بإنجاز كبيير. بتحسون إنكم فعلاً فاهمين شنو كتبتوا عنه من كثر ما تعمقتوا بالبحث والكتابة.
٤-oral presentation
اللي الأغلبية خايفين منه، ومتوترين، ومادري شنو. بس والله تجربة عجيبة جد️
وترا يراعون وايد، وينصحونكم تتدربون وايد عليه، وتقدرون أنتو بكلاسكم تتفقون على يوم وتتدربون جدام بعض. طبعًا الكلاس مو كله بيوم واحد بيقدم! راح يقسمونكم على أيام، كل يوم فيه عدد معين يقدمون فيه عشان الوقت ما يكفي..
لازم تختارون موضوع، وعقب تسوون آوتلاين حق الموضوع مالكم، وتسلمونه؛ وراح يصلحون لكم الآوتلاين..
بعدها بنهاية الكورس يكون البرزنتيشن، في فچة كبيييرة بين الآوتلاين والبرزنتيشن، شيء حلو ومو حلو؛ حلو إن تقدرون تبلشون شغل عليه وتتدربون مبجر، ومو حلو إن يمكن تلهون بالدراسة حيل ف تنسون موضوعكم أصلًا
لازم بوربوينت؟
لا مو لازم، بس المهم يكون في شي تشرحون عليه، مجسم، سبورة، صور طابعينها، اي شيء. بس لازم في شيء. وصراحةً أشجع البوربوينت، يكون مرتب وعشان تعرفون وين وصلتوا والحين شنو لازم تقولون، تحطون فيه صور، تحطون فيه ڤيديوات، بس بشرط السلايدات لازم ما تحتوي على جمل كاملة، وجم شرط ثاني بيقولولكم عنهم..
منو بيقيمني؟
أستاذكم الي يدرسكم راح يقيمكم، وراح يكون معاه استاذ ثاني من القسم، بس والله كلهم طيبين، وكلش ما يتصيدون عليكم، بس يعني they have to be fair بالتقييم، أنا مثلًا كان عندي غلطة سبلنق بوحدة من السلايدات ما كنت منتبهة عليها وحاسبوني عليها ونقصت بس شيء بسييط، وفي بنات شكثر سووا وايد زين وخذوا فل مارك، الأساتذة طيبين والله.
شكثر لازم أتكلم؟
وقت البرزنتيشن من ٥-١٠ دقايق، أقل راح تنقصون وأكثر هم راح تنقصون، حرصوا وأنتو تتدربون توقتون نفسكم.
أخاف أنسى وأنا أتكلم لإن معلومات وايد، شلون؟
بسييطة. تخيلوا إن من شروط البرزنتيشن وشيء عليه درجات بعد إن يكون بإيدكم cards؟ يعني جذي بطاقات تكتبون عليهم النقاط الرئيسية بحيث لو نسيتوا شغلة تطالعونهم وتتذكرون، بس مو تقرون منهم! ديروبالكم.
الأساتذة راح يسئلوني أسئلة؟ ماراح أجذب عليكم، ممكن. بس مو لإنهم يبون يأذونكم وجذي، بس لإن
they want to test you on how you handle questions and how deep you understand what's you're talking about!
وترا عادي يسئلون وتقولون لهم إن ما تعرفون الجواب، او ما بحثتوا عن هالشيء بالذات، بس لا تتفلسون تكفون.
ونصيحة صغيرة بخصوص هالموضوع، عشان تتفادون الأسئلة اللي توهق وچذي، أنتو ألفوا أسئلة وحفظوا أجوبتهم وعطوهم ٣ طلبة بالكلاس وبنهاية البرزنتيشن لما تسئلون does anyone have any questions هذولا يرفعون إيدهم ويسئلونكم وإنتو عاد عيشوا جو التمثيلية وقولوا oh this is a good question وسووا نفسكم تفكرون وتتذكرون وسولفوا وانتو تجاوبون يعني ترا إحنا مو حافظيين الجواب. هالحركة واااايد تفيد
🏼
إنزين أنا أستحي، شلون؟
بليز حاولوا تتخطون هالحياء والخجل. بيوم من الأيام بتصيرون دكاترة وفي اجتماع كل يوم الصبح تقدمون فيه الحالات وتتناقشون، كسروا حاجز الخوف هذا من الحين، تدربوا وايد بروحكم وجدام المنظرة وجدام بيتكم وجدام ربعكم، وشوي شوي بيروح الحيا وبتتشجعون️.
وبس تقريبًا بچذي خلصت كلام عن هالمادة، سوري إذا طولت عليكم
موفقين إن شاء الله!
ليست هناك تعليقات:
إرسال تعليق