بدايةً أحب أبارك لكم إنكم دخلتوا بالطبّ "الصجي". إي نعم، سنة أولى ما كانت طب كلش، اعتبروا نفسكم الحين سنة أولى! وابدوا العدّ (1/6) مو مثل ما تسوّون.
سنة ثانية.. اه من سنة ثانية، چم واحد فيكم سمع الكبار يتحلطمون عنها؟ چم واحد فيكم شاف انهيارات الدفعة اللي اكبر منكم وهم فيها؟ چم واحد منكم خايف منها من قبل ما يدشالكلية أصلًا؟ وماراح أسأل چم واحد منكم خايف منها لأن أدري ومتأكدة الجواب بيكون: كلكم.
بعد نجاح تدوينتي اللي سويتها لدفعتكم حق سنة أولى، عدد كبير منكم طالبني أسوي شبيهة لها حق سنة ثانية، وأتفق معاكم نوعًا ما، سنة ثانية غير تمامًا عن كل شي سويتوهبحياتكم، ف تستاهل أتعب عليها بتدوينة مثل ما تعبت على تدوينة سنة أولى، ولأني وايد أحب دفعتكم، وايد. وايد أحب طيبتكم وكلامكم الحلو، تستاهلون كل خير، مو بس تدوينة.❤️
وايد ترددت بالبداية، لإني كلش ما كنت قدوة فيها، صارت لي فيها ظروف أدت إلى الاهمال وبالتالي الى نزول مستواي، بس بنفس الوقت قلت لنفسي، دام إني عرفت شنو أغلاطيبالضبط ف راح أنصحكم بالعكس، وأعطيكم شغلات تمنيت لو إني سويتها، بس الحمدلله دايمًا✨
سنة ثانية شيء غير عن كل اللي درستوه بحياتكم، وهالجانب منها حلو حق اللي سنة أولى ما مشت معاه مثل ما كان يبي، هالسنة يقدر يعوض ويسوي زين. لإنها غير، ومعاكمالكم للقراءة بعطيكم نصايح دراسية لكل مادة، شنو المصادر اللي تفيد وشنو طريقة الدراسة المثالية لها، إذا اتبعتوها باذن الله بتسوون وايد زين بهالسنة.. وترفعون نفسكم.
لكن، لكل واحد تجربته الخاصة، مثل ما قلت لكم أنا تجربتي بسنة ثانية ما كانت مثالية أبدًا وأنا ما أعتبر نفسي قدوة فيها، وأنتو بيكون لكم تجربتكم الخاصة فيها بعد.. لذلك انتوبنفسكم عيشوا التجربة وشوفوا شنو يناسبكم واكتشفوا طريقة دراستكم وطريقة تنظيم وقتكم بنفسكم❤️
راح أختصر هالتدوينة كثر ما أقدر، أدري كلكم خايفين وتبون شيء يطمنكم مو أحد يسولف عليكم!😂 قلت "بحاول" بس مشكلتي ما أعرف أختصر😂 نشوف شلون بتصير معاستمراري فيها..
أتمنى هالتدوينة تنفعكم، وتغير نظرتكم عن سنة ثانية وتزيل خوفكم -أو عالأقل جزء كبير منه- وأبي أقولكم الجملة اللي حرفيًا الكل يقولها:”مثل ما إحنا واللي قبلنا عدينا، أنتو بعدبتعدون“. بعد هالتدوينة بإذن الله كل شيء بيكون واضح لكم وكل الجوانب تقريبًا، ولو في جانب معيّن لو شنو كان صغير وودكم تعرفون عنه أكيد تدرون إن تقدرون تسئلوني بأيوقت وأي مكان. وماراح أقصّر مع أحد منكم❤️
خلوني ما أطولها أكثر، and let's get started!
شنو سـالفة سنة ثانية بالضبط؟ شنو فايدتها بالحياة وشنو موقعها من الإعراب بين كل سنين الطبّ؟ سنة ثانية باختصار موجودة عشان تعرفون تدرسون بباقي سنين الكلية، عشانتعرفون شلون صج توفقون بين مسؤولياتكم وحياتكم، عشان تتعلمون أساسيات الطب وأهم المعلومات والمصطلحات اللي بتفيدكم بالسنين الياية، بسنة ثانية راح تدرسون FB1 and FB2 إلى جانب أول موديول لكم infection and immunity (i&i), تدرون FB اختصار حق شنو؟
FB = Foundation block.
وأنتو راح تدرسون فاونديشن بلوك 1، و2. كل واحد من هالبلوكات فيه مواد من المواد العلوم الطبية الأساسية اللي راح تعتمد دراستكم بموديولات السستمز عليهم، راح تدرسوناناتومي، فيسيولوجي، بيوكمستري، باثولوجي، مايكروبيولوجي، فارماكولوجي، سايكولوجي، ميدكل ديموقرافي وميدكل سوسيولوجي، وغيرهم. أسامي صعبة صح؟ بتعرفون شنومعناهم بعد شويّتين.
كل هالمواد بينشرح لكم فيهم الأساسيات بس على هيئة نوت كبيرة ومفصلة، أهم المصطلحات، بيعطونكم من كل بستان زهرة لحد ما بسنة ثالثة إن شاء الله تستكشفون البساتينكلهم، يعني اللي أنا بسويه هالسنة إن شاء الله لول😂. بيعطونكم أهم الـconcepts عشان لما تدرسون بتفصيل يكون الأساس بمخكم، لذلك، إذا درستوا عدل وبنيتوا أساسكم عدلبسنة ثانية، باقي السنين بتكون حلوة عليكم وسهلة، هذي الرسالة اللي صج أحس ودي أوصلها لكم من كل هالتدوينة. أساس صح يساوي بناء صح. لا تهمكم القريدات وايد بسنةثانية.. مابي تخلون لا تكون القريدات أكبر همكم، خلوا أكبر همكم شلون تستفيدون من هالسنة كثر ما تقدرون وشلون تخلون أساسكم قوي والقريدات الزينة بتيي على أساسهالشيء وحتى لو ما يت، لا تهتمون. وجوابًا على سؤال تكرر وايد، إي، الدرجات العالية مقدووور عليها.
تـنـبـيه ودي أقوله قبل ما أبدي، قالولي إن في شغلات على دفعتكم احتمال تتغير بما إن د.نصرة اللي كانت تشرح مادة الـSDHI بـFB1 تقاعدت، فماندري شنو بيصير وشلونبتتقسم عليكم المواد.
لذلك, راح يكون الكلام شرح عن اللي صار بدفعتي، والدفع اللي قبلي، أخذوا القدر اللي يفيدكم وهو المعلومات ومع الوقت بتعرفون شلون بيكون الوضع على دفعتكم، بكل الأحوالما أحس بتفرق وايد، دام عندكم المعلومات مو مهم شلون المعلومات تتوزع، وإلا؟
مـلاحـظـة// يمكن أثناء التدوينة أذكر جم اسم لجم كتاب، هذا رابط فيه كل صور الكتب اللي ذكرتهم، وهم راح أعيد أحطه بالنهاية❤️ فلا تحاتون هالجزء كلّش..
آوتلاين التدوينة
عشان تعرفون شنو يايكم بالضبط، وعشان تعرفون ترتيبها بحيث لو ودكم تطوفون جزء:
1-الآيباد
2-محتوى سنة ثانية، نظامها، ومعدّل سنة ثانية شلون ينحسب
3-foundation block 1 أو المعروف بـFB1 ومواده
4-foundation block 2 أو المعروف بـFB2 ومواده
5-infection and immunity module أو المعروف بـi&i
6-اختبار الفاينل
7-PBLs, شنو أهما؟
8-clinical skills, أول دليل حيّ انكم طلبة طب💓
9-نصائح دراسيّة عامـة.
10-خاتمة لطيفة
لكن للأسف موقع قوقل بلوقر اللي تشتغل عليه مدونتي ما خلاني أحط كل أقسام تدوينتي مع بعض.. لذلك اضطريت أقسمهم لبارتين..
هذا بيكون البارت الأول وراح يتضمن:
1-الآيباد
2-محتوى سنة ثانية، نظامها، ومعدّل سنة ثانية شلون ينحسب
3-foundation block 1 أو المعروف بـFB1 ومواده
4-foundation block 2 أو المعروف بـFB2 ومواده
والمدونة الثانية بتكون هذي محتوياتها:
1-infection and immunity module أو المعروف بـi&i
2-اختبار الفاينل
3-PBLs, شنو أهما؟
4-clinical skills, أول دليل حيّ انكم طلبة طب💓
5-نصائح دراسيّة عامـة.
6-خاتمة لطيفة
وتقدرون تنتقلون لها من خلال هذا الرابط دليلك إلى السنة الثانية من كلية الطبّ-جامعة الكويت ~ الجزء الثاني
الآيباد وأهميته بسنة ثانية ~
عدد كبير منكم بدأ باستخدامه بسنة أولى، هؤلاء يسوون سكيب لهذا الپارت ويروحون للي بعده.
اللي ما بدوا يستخدمونه، أو مو مقتنعين، اقتنعوا بليز😂 بليز بليز. والله اختراع الآيباد نعمة، بيفيدكم حيل، فوايده وايد، بيختصر عليكم الطباعة ووايد أشياء لإن النوت حيل حيلبتصير وايد، حيييل. ومرات، النوت ما تنزل إلى قبل اللكجر بدقايق، وتتوهقون. بس اللي عندهم آيباد يقدرون يسحبون النوتة بفلاش معين "أنصحكم فيه بالمناسبة، تلقونه بـxcite،يصير طرف منه USB والطرف الثاني مدخل للآيباد" من الكمبيوتر ويدزونه حق بعض airdrop, قمة السهولة! غير جذي، برامج النوت بالآيباد ترتب نوتكم أكثر حسب المادةوغيره، ماراح تضيع منكم نوتة لا سمح الله، وفي خيار الباك آب تقدرون تفعلونه من البداية بحيث ما تتوهقون لو صار شيء بالآيباد.
إذا درستوا بالآيباد ماراح تستغنون عن الدفاتر نهائيًا، ستل في شغلات وايد بتسوونها عالأوراق مثل تلاخيصكم وغيره، سئلوا اللي عندهم آيباد بدفعتكم عن نظامهم وبتشوفون شكثرمرتاحين!
لا تخافون من التغيير، خصوصًا لو كان هالتغير لصالحكم ١٠٠٪. هالتغيير بيخدمكم حييل وبيسهل عليكم وايد أشياء. اشتروه بالبداية وتعودوا عليه وعلى ما تتعودون عليه تقدرونترا تطبعون نوتكم وتدمجون دراستكم بين الورق والآيباد.. ماراح تتحسفون والله.🙏🏼💕
محتوى سة ثانية، نظامها، ومعدّل سنة ثانية شلون ينحسب ~
وايد منكم يلقى هالجانب من سنة ثانية معقد، شنو بندرس فيها بالضبط؟ جم امتحان فيها؟ شلون نظامهم؟ إنزين سنة ثانية بكبرها، شلون نحسب معدلها؟ الحين بقولكم كلّ شيءتحتاجون تعرفونه وشغلات حتى أنا ما عرفتها إلا لما خلصت سنة ثانية أصلًا😂
بسنة ثانية راح تدرسون ٣ شغلات
١-FB1 عليه ٢٠٪ من السنة
٢-FB2 عليه ١٢.٥٪ من السنة
٣-i&i عليه ٧.٥٪ من السنة
والفاينل عليه ٦٠٪ من السنة..
بالنسبة لمعدل سنة ثانية وشلون ينحسب
سنة ثانية عليها ٢٩ كريدت من معدل كلية الطب، والانقلش عليه ٥ كريدت (ينزل بروحه بالمعدل العام لإن الانقلس قسم بروحه). وبالمناسبة.. مادة إنقلش 183 كتبت عنها أيضًا في تدوينة منفصلة وتحصلون كلامي عنها هني مادة English 183 ~ لطلبة مركز العلوم الطبية-سنة ثانية
قريد سنة ثانية راح ينحسب لكم وينزل بالمعدل العام ومعدل ثاني اسمه MGPA أو ميدكل gpa, هذا يمشي معاكم لين تتخرجون إلى جانب المعدل العام، تقدرون تقولون كل سنينالطب ما عدا سنة اولى، يعني كأنه معدل التخصص..
يعني، المعدل العام راح ينجمع فيه معدل سنة اولى وسنة ثانية وأيضًا انقلش 183 وكل شي راح تاخذونه مستقبلًا بالسنوات الياية
المعدل الطبي (معدل التخصص) بس راح يحتوي معدل سنة ثانية ومعدلات سنين الطب اليايين.
أتمنى فهمتوا قصدي وسوري إذا طولتها🙈❤️
الحين بنبلّش نتكلم عن الجد، شنو راح تدرسون بالضبط، وأهم بارت من التدوينة كلها..
Foundation block 1 - FB1 ~
ومواده.. أناتومي، بيوكمستري، فيسيولوجي، sdhi
أناتومي Anatomy ~
أناتومي، أو مادة "التشريح"، المادة اللي وايد منكم دشوا طب وما يعرفون غيرها😂💕 ومتشوقين يدرسونها، وإيه، شوقكم بمحله، لإنها أكثر مادة شواقة بالدنيا. هالمادة بتعلمكمالتركيب "المادي" لجسمكم، هيأتكم اللي الله سبحانه وتعالى خلقكم فيها من شنو تتكون؟ شنو أنتو بالضبط وشلون الله سواكم؟ بتنصدمون من كمية هندسة جسمكم من أكبر عضلاتهلين أبسط شعيراته الدموية.. نوقف فلسفة شوي؟😂🙊 ونتكلم عن شنو بتدرسون فيها بالضبط؟
الله يسلمكم هالمادة بيشرحون لكم عن تركيب جسم الانسان بثلاثة مستويات، وهم:
١-مستوى علم الاجنة/embryology, من التلقيح، لحد تكون الـthree germ layers، الأغشية اللي تغطي الجنين، إلى آخره. كله خذيتوه لما كنتوا بأولى، والحين مع إضافاتبسييطة جدًا. اللي درسوا إمبريولوجي عدل بأولى راح يستانسون الحين.
طريقة دراسة الإمبريولوجي مثل ما قلت لكم "الخيااال"، كل شيء تتخيلونه. شوفوا فيديوات يوتيوب وايد، وتخيلوا البروسِس اللي يصير، مرات التفريغ يفيد وايد وطريقة شرحالدكتور تفسّر الرسومات اللي بالسلايدة.
هذي قناة يوتيوب حلوة ومفيدة للإمبريولوجي، على سبيل المثال لا الحصر. اليوتيوب مليان اختاروا أي ڤيديو تفهمون منه.. وهالكلام حق كل المواد❤️
وكلّش ما تحتاجون كتب حقه..
٢- الأنسجة Histology, أبسط لڤل بجسم الانسان، يتكلم عن الخلايا، أنواعهم، ترتيبهم، تصنيفهم، شنو الأنسجة وشنو أنواعهم، شلون تتعرفون عليهم وشالفروقات بين الأنواعالمختلفة..
راح يكون على كل نوتة تقريبًا لاب تحت، تشوفون الشرايح تحت المايكروسكوب وتتعرفون عليهم، وداشين بالامتحان. نصيحة: درسوا النوت قبل كل لاب، واقروا الورقة اللييعطونكم اياها قبل اللاب وأخذوا فكرة عن محتوى اللاب وشنو تتوقعون تشوفون بسلايدات لاب اليوم؛ اللاب يمكن حوسة وشوي ممل بس والله ركزوا وإنتو اللي بترتاحون وقتدراسة الأوسبي ومو بس جذي! حتى معلومات النظري اللي بالنوت بتثبت لما تفهمون اللي شفتوه باللاب.
راح ينصحونكم بكتاب حق اللاب، بس لا ما أنصح.. لإنه بسيط حيل وخلوا وقتكم اللي تستغلونه بقراءة كتاب لشيء ما يسوى حق شيء أهم.. التنويت بالمحاضرة "وإذا ما مداكم،فرغوا"، الشغلات اللي يعطونكم إياهم باللاب، كافين لبارت الهيستولوجي.
٣-gross anatomy, ماعرف شنو ترجمته بالعربي صراحة😂 بس يعني، أهو الجزء اللي تشوفونه فعلًا من جسم الانسان، الأعضاء والعضلات والأجهزة. وأونس جزء! لإنهفعلًا يحسسكم إنكم قام تدرسون طب😂❤️ بالبداية بتحسونه مليان، لإنه فعلًا شيء يديد وكبير نوعًا ما، ماراح أحقره، لا، يعتبر فعلًا كبير. بس هذا الطبّ، صح؟❤️المحاضرات بتحسون وقتها إنكم ضايعين، بتفهمون شي وماراح تثبتون مليون شيء، وايد مصطلحات يديدة.. راح تدرسون عن اجزاء جسم الانسان، الصدر وتشريحه بعدين البطنوتشريحه بعدين الحوض وتشريحه بعدين الرأس والرقبة وتشريحهم، من العضلات لين الاوعية الدموية والاغشية اللي تغطي هالجزء وووو.. وايد سوالف.
خل أقولكم شتسوون، وهالـ٣ خطوات يعتبرون المفتاح لاتقان مادة الاناتومي! وتمنيت لو احد يقولهم لي قبل ما ادش ثانية..
*الخطوة الأولى: أثناء المحاضرة نفسها، ركزوا بالشرح وحرصوا تعرفون الدكتور شنو يبي من كل سلايدة، مرات الدكاترة يتكلمون وايد بس آخر شيء يقولون just remember this and this/the most important thing to know is.. هذولا حطوا عليهم هايلايت أو علامات.. وبس، لا تنوتون وايد! ركزوا معاه وحاولوا تثبتونشسالفة.
*الخطوة الثانية: بعد المحاضرة، هني إيي جهدكم ويبين منو الشاطر فيكم بالضبط، فرغوا النوتة، يعني سمعوا المحاضرة وفرغوا شنو يقول الدكتور. ودرسوها وحفظوها، رسمواالرسومات وحفظوا المعلومات. بعدين، بطلوا كتاب. شوفوا دكاتركم شنو يستخدمون مرجع، أهما كتابين زينين للأناتومي
١-moore clinically oriented anatomy
٢-grey's anatomy
الأول هذا المرجع حق قسم الاناتومي بالكلية عندنا، بس الثاني جبّار بعد وأعرف ناس يستخدمونه وفعلًا شرحه ورسوماته وايد زينة. شوفوا شنو يناسبكم واخذوه. إذا د. محمدالعنيزي بيشرح لكم، أنصحكم بالثاني لإنه يستخدم هالكتاب وأهو اللي قالنا عنه، إذا لا، اشتروا الثاني. كلهم زينين. شوفوا شنو يناسبكم❤️
الأول تحصلونه بشويخ بس غالبًا مخلص للأسف، تحصلونه بعد بمحل الجمعية الطبية وبمكتبة جرير وغيرهم.
اقروا من الكتب وتخيلوا الشرح وحفظوا أهم المعلومات والمصطلحات..
أنصحكم بعد بموقع عجييب للأناتومي، كلمة جبّار شوية عليه.. يشرحون فيه تتوريالات حق كل بارت من الجسم، اشتراكه شهري والدفع عن طريف الڤيزا، تقدرون انتو وقروبربعكم تسوون حساب واحد وتتشاركون فيه❤️
حرصوا تدرسون قبل المشرحة، ولا تراكمون نوت القروس! ودرسوهم شوي شوي، عادي يومين على نوتة، لا تستعيلون. أهم شيء فهموا هموا وعرفوا كل المعلومات.
*الخطوة الثالثة: المشرحة. راح تدخلون المشرحة وراح يشرحون لكم فيها شنو يبون منكم بامتحان الاوسبي بالضبط، بيورونكم عينات عن اللي درستوه بالنظري، إذا أنتو شطارودارسين قبلها بتستفيدون حيييل وبتثبّتون حفظكم وتستانسون، إذا ما صرتوا شطار بتكرهون حياتكم وتشوفون كل شيء ينقال جدامكم طلاسم وبتضيعون، معاكم وحدة كل مشرحةكان يصير فيها جذي😂.. لو ما قدرتوا تسوون وايد شغلات، عالاقل اقروا المحاضرة وفرغوها وحفظوا اهم المصطلحات. واقروا ورقة اللاب قبل ما يبدي، شوفوا شنوبيشرحون لكم بالضبط عشان تثبتون..
عشان ألخص طرق الدراسة
~امبريولوجي تفريغ، ماله داعي كتب
~هيستولوجي مو ضروري تفريغ التنويت كافي، ركزوا باللابات واقروا ورقة اللاب قبل ما يبدي
~قروس يبيله جهد شوي بس كل كا تعطونه جهد اكبر بدراسته اول مرة كل ما ترتاحون بالمراجعة وتصير مادة ما تاخذ منكم وقت بالعكس.. المصادر النوت، والتفريغ، والكتابيناللي قلت لكم عنهم اختاروا منهم واحد، موقع KenHub
امتحان الاوسبي OSPE
-شنو امتحان الاوسبي؟
امتحان الاوسبي هو امتحان المشرحة، ينقسم لقسمين:
١-هيستولوجي (سلايدات مايكروسكوب)
٢-قروس (جثث أو مجسمات)
الامتحان يكون بالمشرحة تحت، يكون عبارة عن محطات stations, كل محطة او station فيه عينة، تتعرفون عليها، ويكون السؤال عليها شنو هالعينة او شنو وظيفتها أو عطيأمثلة عن وين موجودة وهكذا، سهل لو دارسين عدل وطلاسم لو مو دارسين عدل😂🙈. الامتحان يونس حيل ويضحك، لإن كل ستيشن توقفون عليه دقيقة بس وبعدها يرنالجرس وتسوون شِفت لاماكنكم على جنب عشان تروحون للسؤال اللي وراه، ما راح تحسون بالوقت لإن كل شيء بسرعة بسرعة😂. وفي ستيشنات ما يكون فيها عينة Rest station بس جذي ترتاحون فيها وتكملون اجاباتكم وتفكرون شنو تشيرون وشنو تألفون، لا لا أتغشمر😂. طبعًا دايمًا يقولون إن سيء الحظ اهو اللي يبدي بستيشن رِست وطبعًاما يحتاج أقولكم منو بأول امتحان اوسبي صارلتله هالسالفة😭😂، ليش مو حلو؟ لإن مثل ما قلت لكم هالستيشن تستغلونه بان تكملون اجاباتكم وتتذكرون شغلات وووو..عرفتوا؟ وبس والله😂🙆🏽 وعادي ترا ما يركزون على السبلنق وجذي، فلاتحاتون.
-من وين ندرس الأوسبي؟
١-نوتكم. درسوا نوتكم عدل جنكم تدرسون حق امتحان نظري!
٢-اوراق اللاب اللي يعطونكم اياهم، واااايد مهمين.
٣-أطلس netter's atlas of human anatomy فيه كل شي بالجسم مرسوم بوضوح عشان تشوفونه، مافيه معلومات وجذي كلش، بس تطالعون. هذا ضروري يكون عندكم.
٤-أطلس فيه صور جثث، اسم الكتاب clinical atlas of human anatomy
بحط لكم صور كل الكتب فلا تحاتون..
٥-دورات كومسا اللي يسوونها بالمشرحة، يشرحون لكم على العينات وهالشي يساعدكم تراجعون قبل الامتحان وتشوفون شنو راح اييلكم. وايضًا يسوون دورات حقالهيستولوجي، مهميييييين.
-نظام دكاترة الاناتومي، سمحين حيل وغالبًا غالبًا ما يطلعون من نوتهم، لا تخلون الاساتذة اللي باللابات يزعلون من دفعتكم بسبب التأخير وجذي، ولا تخلون الدكاترة يحطونعليكم بسبب حضوركم القليل، أهما قسم دلّوع شوي وكيووت اهتموا فيه وراح يحبونكم😂❤️
-الأسئلة القديمة مهمة للأناتومي وتتكرر شغلات وااايد.، اهتموا فيهم.
-كتب الاناتومي
-Moore clinically oriented anatony OR grey's anatomy
-Netter's atlas of human anatomy
-Clinical atlas of human anatomy
وبس تقريبًا هذا كل شيء عن هالمادة🙏🏼
بيوكمستري Biochemistry ~
مادة الكيمياء الحيوية، من أكثر الأشياء اللي يخوفونكم منها بسنة ثانية، أحد منكم فكر إنزين ليش الناس ما تحبه هالكثر؟
لإنه بكل اختصار.. فهم. لازم تفهمونه، ومو بس تفهمونه من النوتة، لازم من الدكتور (التفريغ مهم)، تفهمون من الكتاب (كتاب lippincott's), وهم تفهمون من اليوتيوب وغيرهممن المراجع.
المادة تتكلم عن الكيمياء اللي داخلنا، كمستري بس بنكهة طبية، أكثر مادة فيها تفكير وخيال بالدنيا😂❤️ لو تفهمونها؟ بتكون بالنسبة لكم عسسل مثل ما كانت بالنسبة لي. إي نعم،البيوكمستري مادتي المفضلة بسنة ثانية كلها✨
المادة تنقسم حق ٤ أقسام، محاضرات "نوت"، ليرننق توبكس (مهمين جدًا بالامتحان لازم منهم أسئلة حتى بالفاينل)، سيمنارات "أيضًا مهمين وما ينقطون وفوق هذا سهليين"،وأخيرًا لاب براكتكل "مرات إيي بالامتحان، بسيط حيل.."
لازم كثر ما تقدرون تخلون صورة الشي اللي تدرسونه بهالمادة واضحة جدامكم، طبعًا هالكلام مو حق كل النوت، الحين بتكلم عن الدكاترة وكل واحد شنو نظام نوته وشلونتدرسونها..
- ببدي بدكتوري المفضل، د.بينوڤ. ليش دكتوري المفضل؟ لأنه غير تقليدي أبدًا. يحب يفكر ويقدر الطلبة اللي يفكرون ويفهمون مو بس يحفظون السلايدات. أسئلته بالامتحاناتصعبة نوعًا ما لكن تنحل لو فاهمين عدل شنو قال بالمحاضرات+تتكرر بعض الأفكار من الامتحانات القديمة.. التفريغ معاه مهم جدًا، مهم ومهم. درسوا نوته من كتابlippincott's, أيضًا درسوا من يوتيوب.
- د. مي مغربي، تينن، كلش ما تحتاج تفريغ لكن تحتاج تكونون حاضرين عشان تفهمون أكثر. نوتها خفيفة لطيفة وعمرها أسئلتها ما طلعت من النوتة والسلايدات، بس تبيكمتفهمون ولا ولا تحاتون معاها الامتحان كلش. الكتاب ممكن يفيد بمحاضراتها خصوصًا إن مرات الصور بالسلايدات تكون صغيرة فكنت أستخدم الكتاب مع شرحه عشان أفهمهم.
- د.جيمس مثل ما تعودتوا عليه بسنة أولى، نوته سهلة وحلوة وواضحة، ما يحتاج تفريغ كلّش بس لو حضرتوا معاها ونوتوا معاه كاافي، النوت والهاند آوتس يكفون وزياادة.
- د.اسلام خان، نوته فاضية تقريبًا لذلك التفريغ معاه مهم جدًا. شرحه حلو أنصحكم تحضرون معاه، وحتى لو حضرتوا حرصوا على التفريغ. ماراح يفيدكم كتاب lippincott'sلأنه يستخم مرجع ثاني وكلش ما تحتاجونه، التفريغ كافي+حرصوا على الفهم ودرسوا السلايدات بتركيييييز.
- د.فاروق نوته عبارة عن حفظxحفظ، مليانة معلومات وتفاصيل بس سهلة لأن كلها حفظ.. الحضور معاه مفيد لأنه يلمح شنو راح إييب بالامتحان وجذي.. التفريغ كلش مو مهم.
نوت الميدتيرم حيل سهلين وواضحين، التريك بنوت الإندتيرم (تبدي من نوت بينوڤ)، بتحسونهم نقلة كبيرة. بتحسونهم غير عن كل شيء درستوه، بنفس الوقت أمتع شيء راحتدرسونه على الاطلاق، هالكلام لو شديتوا حيلكم طبعًا!
مراجع المادة والشغلات اللي فادتني فيها:
-كتاب lippincott's حق نوت د.بينوڤ ود.مي، والباقي تقريبًا ما يحتاجون.
-التفريغ والأسئلة القديمة.
-ڤيديوات يوتيوب، وهذي لستة بالقنوات اللي فادتني:
*قناة khan academy الغنية عن التعريف، فادتني بكمية الميدتيرم أكثر شيء.
*قناة shamu's biology, واحد هندي يشرح شغلات وايد من ضمنهم البيوكم. ڤيديواته يمكن سوي طويلة لكن تفهم حيل. يمكن تفيدكم حق نوت د.اسلام خان👏🏼
*قناة armando hasudungan
بتفيدكم حق نوت د.بينوڤ وااايد، الشرح حيل حلو ويبين لكم البروسس شلون تصير، بيخفف تعيد النوت حيل، خصوصًا نوت mitochondria راح تفيدكم هالقناة وايد وحق باقينوت بينوڤ وفاروق بعد.
*قناة hand written tutorials
توضح لكم الpathways ملوت التفاعلات وتحط لكم الانزيمات ومل شيء، بتفيدكم خق نوت د.بينوڤ واااايد، وحق أي نوتة تلقون فيها pathways. وأي شيء بهالقناة تحسونهمتعلق بنوتكم شوفوه.
*قناة ninja nerd science
مفييدة حييل، حق كمية الإندتيرم كل شيء تقريبًا فيها مفيد، الڤيديوات طوييلة لكن فهم بضميير.
الطريقة المثالية للدراسة حق البيوكمستري هي إن يكون عندكم "دفتر" وتكتبون فيه الشغلات المهمة اللي تقرونها من الكتاب، وتنقلون منها الرسومات والمعلومات من فيديواتيوتيوب، وتسوون تلاخيص لنفسكم. الدفتر حيل مفيد، لدرجة إني وقت المراجعة أكتفي فيه بس، صج بياهذ منكم جهد ووقت لو بتسوونه بس يبقى عندكم وتستفيدون منه ليي بعدين.
أسئلة البيوكمستري بالامتحانات تقريبًا تكون أصعب شيء، لأن مرة ثانية أكرر، فهم. وأكبر عدد أسئلة بـfb1 يكون من نصيب البيوكمستري، لذلك احرصوا على هالمادة عدل،المادة حلوة وتنحب لا تسمعون كلام الناس عنها.
وتقريبًا هذا كل شيء يخص المادة الحلوة هذي❤️
فيسيولوجي physiology ~
مادة علم الوظائف الحيوية، تتكلم عن "شلون يشتغل الجسم"، شلون الماي ينتقل، شلون المواد تتوزع، شلون المواد تسوي مفعولها بالجسم، مستقبلات وهالسوالف، شلون العضلاتتتحرك، شلون المسجات تنتقل..
سوالف وايد تونس، هالمادة فهم وفيها جزء كبير حفظ، ما يحتاج لها كتاب لكن لو تحبون ف أنصحكم بكتاب guyton، لكن جد جد ما يحتاج. المادة مالها وايد مراجع لأن النوتواضحة حيل والتفاريغ تكفي وتوفي.
هالمادة تتكون من قسمين، محاضرات "نوت"، وتتوريالات"مسائل" حق بعض النوت.
التفريغ مهم لأغلب نوت الفيسيولوجي، الحين ببدي أتكلم عن الدكاترة واحد واحد، وكل واحد شلون تدرسون نوته..
-د. حميد الصراف، تذكرونه؟❤️ الحين رجع لكم بسنة ثانية. يعطيكم أول جم نوتة من الفيسيولوجي. نوته سهلة جدًا، والتفريغ فيها أساسي. الحضور مهم لأن شرحه جبّار ويفهم،أسئلة التتوريال مالته وايد مهمين وإيون بالامتحان وااايد. ويسوي رڤيو قبل الامتحان "كلموه قبلها يسويها لكم" والرڤيو وايد منها إيي بالامتحان👏🏼
- د. هنكل، حيل طيّب، نوته سهلة وبسيطة، أسئلته بالامتحان واضحة، ما يحتاج تفريغ كلش التنويت كافي
- د.تورچاني، مهم التفريغ معاه، وحضروله يمكن تفهمون، نوتوا اللي تقدرون عليه، وحاولوا تفهمون أكثر مما تحفظون لأن اسئلته فهم..
- د. فوزي، واايد عجيب ومحاضراته تونس! التنويت معاه مهم والتفريغ بعد، أسئلته بالامتحان وايد منها حفظ ف حرصوا عليه.
- د. الهام غضنفر، واايد عجيبة، ما تحتاج تفريغ التنويت كافي، الحضور معاها يساعد عالفهم، محاضراتها تفاعلية وكل جم سلايدة تسوي كويز وتخلينا نحرك عقولنا شوي😂🙈.. وايد عجيبة. لكن نوتها مليااانة حفظ، ف حفظووهم عدل.
-د.سلاڤا، بتعطيكم نوتة وحدة بس، التفريغ مهم👌🏼
طريقة الدراسة المثالية للفيسيولوجي هي الحضور والتنويت، بعدين تفريغ لو الدكتور لازم يتفرغ له مثل د.حميد، بعدين حل أسئلة التتوريالات، وأيضًا حل أسئلة قديمة.. وبجذيتسوون وايد زين بالمادة ووايد راح تحبونها❤️
SDHI ~
مادة SDHI, الملقبة بـ"سِدحي"😂
إهي اختصار لـSociodemographics of health and illness, أوله يا طول الاسم😂😂 انزين خنزكز شوي وحبة حبة.. شفتوا أول كلمة من الاسم؟Sociodemographics
معناها المادة تنقسم حق قسمين، الأول medical sociology, والثاني demography.
هالمادة بأجزاءها كانت تشرحها دكتورة اسمها د.نصرة الله يطول بعمرها، تينن، والله انسانة عبقرية! تخلي الطلبة يحترمونها غصب، كليتنا كانت محظوظة إن فيها أساتذة مثلها،مادري إذا بتكمل تدرسكم أو لا، بس إذا درستكم بتكونون محظوظيين جدًا.
جنه قالولي على دفعتكم راح تكون هالمادة بالكورس الثاني، مادري صراحةً مو متأكدة، بس أنا مثل ما ذكرت لكم بالبداية بتكلم عن شلون كان السستم على دفعتي والدفع اللي قبلي.
المادة تنقسم حق محاضرات "نوت"، وليرننق توبكس "مهمّييييييييين!!!!"
المادة عبارة عن جزئين مثل ما قلت لكم، وهم:
١- ديموقرافي demography عبارة عن قياس العوامل اللي تأثر على حجم المجتمع، مثل عمليات الولادة والوفاة والهجرة وغيرهم، ونعرف شنو العوامل، وشلون نحسبهم الزيادةاو النقصان، وجم شغلة ثانية. فيها رياضيات وراح تستخدمون الآلة الحاسبة وايد فيها😂🙈 بس تونسس.
كتابها كانت تسويه د.نصرة؛ الكتاب مهم ويوضح النوت، يحطونه لكم بe-learning عند النوت، وكل سنة تسوي نسخة يديدة عن السنة اللي قبلها. والتفريغ مهمّ جدًا.
٢- سوسيولوجي sociology, هالمادة أدبية بس طبية، تونس! ممتعة جدًا! مواضيعها متنوعة، كأنه علم اجتماع بس تركيزه طبي بحت، يعني مثلًا طبقات المجتمع وشكثر تصنيفالشخص بالمجتمع يأثر على صحته، في نوتة كانت تتكلم عن صحة المرأة بدول العالم والمشاكل، في نوتة كانت تتكلم عن الموت الرحيم! في نوتة كانت تتكلم عن الطب البديلوأنواعه، جد ما تحسون إنكم تدرسون شيء غثيث كلّش بالعكس شيء حيل خفيف ويونس.. المادة هذي لها كتاب حاطة لكم صورته تحت.. د.نصرة كانت توصي عليه وايد، لأنهابكل نهاية نوتة سوسيولوجي كانت تحط أسئلة سلف ستدي وتحط وين موجودين بالكتاب وانتو تطلعون الاجابات، بس حتى القوائم يطلعونهم لكم ويعطونكم الاجابات جاهزة فكلش لا تحاتون❤️
حق البارتين التفريغ مهم جدًا، وأنصحكم بالحضور. خصوصًا نوت السوسيولوجي، وايد بتفرق معاكم لو تحضرون. النوت عددها قليل جدًا مقارنة بباقي المواد وأيضًا نصيبالمادة من الأسئلة بالامتحانات قليل.
طريقة الدراسة المثالية هي الحضور والتنويت، التفريغ لو حسيتوا تنويتكم مو كافي، وأخيرًا حل الأسئلة القديمة. لا تنسون تحفظون القوانين وتحلون المسائل اللي ينزلونهم لكم حقالديموقرافي. وبس تقريبًا💖
أقين، مادري شنو بيصير على دفعتكم، لكن لو مهما صار المادة سهلة وحلوة وخفيفة وبتقدرون عليها❤️
الحين خلصنا تكلمنا عن المواد، ف ابي اكلمهكم عن بارت الامتحانات..
امتحانات FB1:
راح يكون فيه امتحانين
أولًا ميدتيرم (بنص الكورس) عليه ١٠٪ من سنة ثانية
ثانيًا إندتيرم (بنهاية الكورس) عليه ١٠٪ من سنة ثانية
كل امتحان منهم فيه ٣ اقسام، بيبر١، بيبر٢، وأوسبي ospe أو امتحان مشرحة.
كل بيبر فيها عدد معين من المواد (مادتين على دفعتي واللي قبلي، دفعتكم مو متأكدة والله لإن شالوا الـsdhi).
غالبًا يكونون: بيبر١ فيسيولوجي وأناتومي، بيبر ٢ بيوكمستري وsdhi.
بس من ناحية الدرجات، عندكم ٢ اوسبي واحد بالمدتيرم وواحد بالإيندتيرم، تمام؟ كل واحد منهم عليه ١٪ من سنة ثانية كلها. أولا حصه شوية يعني ما ندرسهم مو لازم؟ لا، لاتستانسون وايد😂
صح كل واحد منهم عليه ١٪ من سنة، بس هم كل واحد منهم عليه ١٠٪ من درجة الميدتيرم ودرجة الاندتيرم😂
أتوقع أنتو شطار بالرياضيات، ١٠٪ من ١٠٪ هي ١٪ من الـ١٠٠٪ الكاملة، يارب ما تعقدتوا😂😂.
فـ تو سَم آپ، كل امتحان (ميدتيرم/إندتيرم) عليه ١٠٪ من قريد سنة ثانية وبس هذا اللي لازم تعرفونه ليلحين💕
كل الأسئلة mcqs, بس امتحان المشرحة ospe تكتبون كتابة.
Foundation block 2 -FB1 ~
هذا اللي الكل يخرعكم منه من كنتوا بسنة أولى😂
اللي حرفيًا كل الكلية مسوية منه فلم رعب وكأنه شيء مستحيل وغير مقدور عليه نهائيًا، بس هم أظن عقب سنة كاملة بكليتنا الجميلة استوعبتوا شكثر الناس عندنا يبالغوون! واللهالعظيم، حيل حيل يبالغون.
إنزين هل هذا يعني إن fb2 سهل؟ إي. والله العظيم، والله، والله، المحتوى جدًا سهل وبيسك، مو مثل fb1 فيه حوسة وتفاصيل وجذي لا بالعكس كل شيء واضح وكل شيء مقدورعلى دراسته ولا تحتاجون فيه دورات كللش من كثر ما أهو سهل. فوق هذا مواده جدًا انترستنق وتهم واايد طلبة منكم منهم مادة السايكولوجي او علم النفس💕
هل كلامج معناه إن fb2 سهل من كللل النواحي؟ لا. أهو صعب من ناحية وحدة بس، وهي الـكـمـيـة. الكمية تبچي يا جماعة. أكثر من ١٢٠ نوتة، مقسمين عالمواد طبعًا. بس العددمو هيّن. كل يوم تاخذون ٤ محاضرات لمدة ٨ أسابيع تقريبًا، وعليكم الحسبة. يبيله دراسة أول بأول، من تراكمون اسبوع خلاص كل شيء يتكود. انزين شلون كل هذا بندرسه!والله سهلين النوت، من كثر ما أهما سهلين ورب الكعبة عادي تطقون طقة أولى فوق الـ٤ نوت😂 تخيلوا!!! إي لهالدرجة النوت واضحين وبيسك، بس يبيلهم مراجعة ودراسة أولبأول..
وأنصحكم بالحضور، وايد طلبة بيقلون لكم لا تحضرونه لأنه كله حفظ ف درسوا بروحكم أحسن.. بس حضروا. اذا النوتة بدون حضور تخلصونها بساعة، مع الحضور بتخلصمعاكم بنص ساعة او ٢٠ دقيقة! بيسهل عليكم وبتعرفون الدكتور وين يركز بالضبط🙏🏼
مواد FB2وهي مايكرو، باثو، فارما، سايك، هيلث إيديوكيشن، وبيوكمذ الحين بتكلم عن مواد FB2 وحدة وحدة..
مايكروبيولوجي Microbiology ~
علم الأحياء الدقيقة، مادة حفظ بحتة، حفظوا وحفظوا، وردوا حفظوا، وبتنسون شكثر، بس عادي، حفظوا مرة ثانية😂 إي والله، حفظوووووا.
راح تاخذون ٤ شغلات من الأحياء الدقيقة،
بكيتريا: اهم شي بالمايكرو واسئلة الامتحانات غالبيتهم عنها.
ڤايروسات: بسيطين حيل بس يلخبطون شوييي، لكن اسئلتهم بالامتخانات حيل بسيطة وواضحة.
طفيليات: أميبا، ديدان، تذكرون الدودة الشريطية؟ تدكرون البهاريسيا؟ كل هالشغلات بتدرسونها بالطفيليات😂❤️ انا عن نفسي كنت وايد احب هالبارت.. لانه صج بتنصدمونشكثر هالكائنات ذكية وشلون تنجو بجسم الانسان وشنو تسبب له😂🙈 لكن في عيب واحد، وهو ان الدكتور نوته اللي يعطيكم اياها فاااااااااااضية. حاولنا معاه يعطينا نوتهالكاملة اللي يشرح عليهم ويحط فيهم كلام وصور ورسومات بس مارضى، لذلك شنو كنا نسوي؟ كنا نصور السلايدات الزايدة وأنا كممثلة للدفعة سويت نوت يديدة وأضفتالسلايدات الزايدة على نوتنا اللي اهو معطينا اياهم وبجذي صار عندنا نوت كاملة. وهمن التفريغ معاه وااايد مهم. الدكتور حبوب واسئلته حلوة حييل، بتعرفونه وبتحبونه💕
فطريات: يتكلمون عن مملكة الفطريات "حسيت أيام المتوسط لول😭" وبيكونون اخر جم من المايكرو، عشان جذي اغلبية الطلبة يقطونهم يعني ما يدرسونهم، بس درسوهم لوعندكم وقت😂🙏🏼
شلون ندخل كل هذا بمخنا وشلون نحفظ؟
كل واحد وطريقته بالحفظ، في ناس تحب تحفظ كل شي مثل ما اهو وفي ناس تحب شي يساعدها تتذكر مثلا رسومات وقصص وغيره، بقولكم طرق الحفظ
-قصص، يعني تألفون قصة عن بكتيريا وتتخيلونها وكل خاصية من خواصها تحطونها بالقصة، ولو ماعندكم ابداع قصصي ف يسوون معاكم قروب وتساب جم بنت كبيرةويدزولكم قصص دفعتكم.. وهم أنتو بينكم وبين بعض ألفوا قصص وسيناريوات، جذي بتحفظون واايد
-موقع sketchyMicro, يلخصون لكم البكتيريا وخواصها بفيديو واحد فيه كل شيء، وايد يحفظكم والله العظيم جد شيء جبااار، ينفع ويدخل المعلومات بذاكرتكم بطريقة خيااالية،اشتراكه غالي نوعًا ما ف مثل ما قلت لكم عن KenHub مال الأناتومي انتو وربعكم سووا اكاونت واحد وكلكم استخدموه مع بعض وتقاططوا عليه. بس والله أنصح فيه وبشدّة.
باثولوجي pathology ~
مادة علم الأمراض، المادة حيل حيل انترستنق، تتكلم عن شلون يصير الجسم مريض، شنو يتغير؟ تتكلم عن شلون الانسجة تلتهب وجذي، حيل تونس المادة💕
عيبها الوحيد وهالشيء حتى ممثلين دفعتكم راح يتعبون منه، وهو إن النوت ما تنعطى إلا وقت المحاضرة😭 وعيزنا منهم، كلمنا الكل، يقولون القسم رافض اصلًا استخدام نظامالe-learning من اول ما حطوه فمانقدر نناقشهم. سالفتهم سالفة أدري😂
مادة الباثولوجي هذي هي أساس لشغلات باثولوجي بتدرسونها بالموديولز اليايين بثالثة ورابعة، لذلك مهم يكون اساسكم قوي..
شلون يصير اساسكم قوي؟
١-درسوا النوت عدل، حضروا المحاضرات حتى لو النوت مو معاكم ونوتوا معاهم بدفتر او اي شيء
٢-درسوا من كتب، كتابين مهمين حيل، أول كتاب اسمه robbin's هذا اقروا منه، بياخذ منكم وقت بس اقروا وبتستفيدون حييل💕 ثاني كتاب اسمه باثوما pathoma تحصلونهبشويخ، في معاه سيديّات داخلهم شرح للكتاب، الكتاب جدًا عجييييب❤️ وبدال باثوما تقدرون تستخدمون كتاب rapid review pathology هم وااايد زين.
٣-لخصوا، وسووا مخططات
٤-وحضروا لابات الباثو، مو لاب لاب، مثل جذي محاضرة ويعرضون فيها حالات لناس مرضى وجذي، يونس بتحسون انكم دكاااترة صج!😂❤️❤️❤️❤️ ولاء، لاباتالباثو ما يدشون بالامتحان فلا تحاتون، بس عشان يفهمونكم النوت زيادة حضروهم🙏🏼
فارماكولوجي pharmacology ~
مادة علم الأدوية، أخييرًا بندرس عن الأدوية! هالمادة حيل سهلة وواضحة وبسيطة. تتكلم عن شلون الدواء يأثر على جسمنا وشلون جسمنا يأثر عالدواء، تتكلم عن أنواع معينة منالأدوية، خواصهم، تفاعلاتهم مع بعض، أعراضهم الجانبية، فيها حفظ كبيير بس الحفظ منطقي وحلوو❤️
المادة خفييفة، والمحاضرات أخف وأخف، الدكاترة كلهم زينين بالشرح💕 وايد بترتاحون وبتحسون الوضع بسييط وسهل.
هل هذا يعني إن نحفظ كل دوّا بكل نوتة؟ لاا كلش. راح يعطونكم شغلة اسمها Drug List, فيها أسماء أدوية معينة، هذولا بس اللي تحفظونهم وتعرفون كل شيء يخصهم، وغالبًاالقوائم يتكفلون يجمعون كل هالمعلومات لكم ويعطونكم إياها جاهزة💕 يعني الموضوع حييل بسيط ولا تحاتونه كلش.
أسئلة الامتحانات سهلة وبسيطة وواضحة جدًا، درسوا النوت+حفظوا الدرق لست وراح تفولونهم💯
سايكولوجي psychology ~
مادة علم النفس، أكثر مادة ممتعة بـFB2 بدون مبالغة. بتعلمكم شغلات وايد، بتخليكم تشوفون الحياة وشخصيات الناس بطريقة مختلفة تماامًا، المحاضرات ممتعة جدًا وهي منالشغلات القليلة اللي ما ودكم تفوتونها😂❤️
راح يشرحونها لكم دكتورين
الأولى د. ريم الصباح، نوتها سهلين وواضحين، أسئلتها ما تطلع من النوت كلش، والتفريغ معاها مهم لإنها تحب امثلتها وتييب منهم.
الثاني د. نايف المطوع، شرحه عجييب، النوتة اللي يعطيكم اياها مو كلها معاكم! يعطي منها أجزاء بسيطة، مهم التفريغ معاه حييل والحضور بصراحة كافي يدخل النوتة بمخكم😂❤️ يعطي أمثلة عجيييبة، محاضراته تحسونها تثقيفية مو تدريسية.
أسئلة القديمة مهمة وااايد للسايك وااايد، تتكررر حييل، لا تنسونهم بلييز وحرصوا علييهم🙏🏼.
الحضور مهم، والتفريغ مهم، لا تنوتون وايد أثناء المحاضرة حرصوا إن تفهمون شرح الدكتور أكثر شيء. بيقولون لكم عن كتاب بس كلش كلش كلش مو مهم ماراح تحتاجونه،الشغلات اللي قلت لكم عنها (حضور، تفريغ، اسئلة قديمة) تكفي وتوفي👌🏼
Health education and health promotion - HE& HP ~
مادة تتكلم عن الصحة بشكل عام وشبون نحافظ عليها نعززها.. أقص عليكم والله مادري عن شنو تتكلم😭😂 إهي عبارة عن ٦ محاضرات، يشرحهم دكتور كبير شوي بالعمربس طيّب حييل، اذا شافكم ملتزمين بحضوركم بالمحاضرات وتشاركون معاه (بليز بليز بليز حضروواااا بلييييز) راح يعطيكم مراجعة حق الامتحان وغالبًا الامتحان ٩٩٪ منه منمراجعته، لدرجة ما تحتاجون تدرسون النوت. عليكم بالالتزام والحضور وتصير المادة بمخباتكم❤️
Biochemistry-nutrition بيوكمستري ~
قالولي إن هالمادة راح تنضاف حق بيوكمستري FB1, مادري صراحةً. بس يعني اذا صار ترا وااايد زين ووايد سهلة. تخيلوا المادة ٥ نوت وسيمنار واحد، النوت تتكلم عن الموادالغذائية، كاربوهيدرات بروتينات ڤيتامينات معادن، غن الوزن المثالي، عن الحمية الغذائية، تخيلوا السهوولة يعني، والله حيل حيل سهلة. إحنا دفعتنا شرحت لنا المادة دكتورة اسمها د.عايشة الجارالله عسل أنا حبيتها حيل بس شديدة شوي وتقدر الالتزام حييل، طيبة وتجاوب عالأسئلة بكل صدر رحب وتعيد للي مو فاهم ونوتها مرتبة وحلوة، المادة حييل سهلة لاتشييلون همها كلللش حتى لو انضافت حق fb1 من مصلحتكم لانها تافهة والله😂
امتحان FB2 ينقسم حق بيبر ١ وبيبر ٢، وعليه ١٢.٥٪ من السنة كلها. وكل بيبر كان فيها ٣ مواد. أول بيبر مواد community medicine اللي اهما سايك وهيلث اديوكيشنإضافةً إلى فارما، وثاني بيبر مايكروبيولوجي وباثولوجي وبيوكمستري ، بس أقين، مادري شنو بيصير على دفعتكم.. وشلون بتكون التقسيمة..
وكل الامتحانات mcqs🙏🏼
بجذي خلصنا البارت الأول بالتدوينة.. البارت الثاني منها تقدرون تنتقلون له من خلال هذا الرابط: دليلك إلى السنة الثانية من كلية الطبّ-جامعة الكويت ~ الجزء الثاني
أعتذر مجددًا على هذا الخطأ التقني الغير مقصود❤️
ليست هناك تعليقات:
إرسال تعليق