دليلك للسنة التمهيدية في كليات مركز العلوم الطبية (طب بشري - طب أسنان - صيدلة) - دفعة 2018 ~ الجزء الثاني

مرحبا مرة أخرى! أشكركم على اكمالكم للقراءة, وأعتذر مجددًا على هذا الخطأ التقني الغير مقصود ❤️ في هذا الجزء راح يكون حديثنا عن:

١- القرطاسية والأدوات اللي تحتاجونها في دراستكم

٢- الآيباد، واستخدامه بالدراسة

٣- نبذة بسيطة جدًا عن الكورس الثاني

٤- رسائل من طالبات من دفعة ٢٠١٧️

٥- نصائح من القلب إلى القلب، وخاتمة

بسم الله.. لنكمل حديثنا!


القرطاسية والأدوات اللي تحتاجونها بالدراسة ~

الجامعة مرحلة جديدة بالحياة، والكل يقول إن خلاص كبرنا وما نحتاج مكتبة وسوالف يهال،  بس بالنسبة لي لااازم وشيء أساسي أتقضىمن المكتبة قبل كل ترم ببعض هالأشياء، لإن    الجامعة تظل مرحلة دراسية تحتاج جهد مضاعف وتنظيم مضاعف مو لإن محد يتابع دفاتركم   وأوراقكم أول بأول تهملون! لا. ولإني أحب أكون منظمة وأعتمد على نفسي وما أحب   أغراضي تضيع أو تكون مشتتة أو شكلهم مو مرتب وما يشجع عالدراسة وما أحتاج أستعير شيء وعشان ما أتوهق لإني أحب أعتمد على نفسي بكل شيء، أيضًا باللستة راح أكتب لكم   بعضالأدوات والأجهزة اللي راح تهمكم بالجامعة بشكل عام. ولو أنتو عادي نظامكم تقزرون بدفتر واحد طول الكورس تقدرون تسوون سكيب بسم الله نبدي: 

١- قلم ٤ ألوان، يفضل تشترون منه ٢، واحد معاكم وواحد سبير وهم إذا أنتو من النوع الي   يكتب وايد نفسي ماراح يكفيكم، وأقلام ثانية جافة أو سائلة أو جل منوعة عشان تستخدمونهم، وكوريكتر حق رايتنق الانقلش.

٢- أقلام رصاص HP2 راح تحتاجونهم بكل امتحاناتكم تقريبًا، ضروري يكون عندكم علبة خاصة فيكم عشان تستخدمونها طول السنة، أنا علبة وحدة كفتني مع إني كل امتحان آخذ قلم  جديد،  ولا تنسون المساحة، والبراية.

٣-  دفترين سلك ١٠٠ صفحة واحد حق الإنقلش وواحد حق استخدامكم العام، وأوراق مسطّرة حق الرايتنق مقاس A4, مو دفتر! لا لا، أوراق جذي تكون بروحها، بدال ما تشقون أوراق كل شوي وتصير أشكالهم معفسة. وايد راح تحتاجونهم وهذا شكلهم 

٤-أقلام هايلايت، حق الأشياء المهمة بالنوتة. 

٥-دباسة لإن وايد بتصير إن النوت تتبطّل دبابيسها. 

٦- مسطرة حق الإنقلش، المسطرة ٣٠ سم زينة حق رايتنق الإنقلش، لا تاخذون وايد قصيرة.

٧- طابعة، إذا ماعندكم أحس ضروري توفرونها لنفسكم، لإن أفضل تكون نوتكم ملونة عشان تنفتح نفسيّتكم. وبتحتاجون تطبعون شغلات بالجامعة.

٨ -لابتوب. أحسه مهم.  راح تحتاجونه بالكمبيوتر، وحق كل شيء تقريبا لما بتسوون سيرتش على شيء معيّن   أو بتطالعون فيديوات يوتيوب، وعشان تحملون عليه نوتكم وتطبعونهم. 

اللابتوب تقدرون تستبدلونه بآيباد. بالبارت اللي بعد بارت القرطاسية.

٩ - ستيكي نوتس، وflags عشان تحطونهم عند الأشياء المهمة أو الأشياء اللي مو فاهمينها عشان تسئلون فيها بعدين، clips بأشكالهم، وايد أحيان بتحتاجون أشياء تمسك أوراقكم بدون ما تدبسونهم

١٠ -فايلات/بايندرز. حق كل مادة فايل عشان تحطون نوتها/أوراقها داخل وما يضيعون. أنا الكورس الأول كنت أستخدم الفايلات الكبار اللي فيهم سحّاب، كل مادة فايلين: واحد فيه نوت الميدتيرم والثاني نوت الفاينل. بعدين الكورس الثاني حق   البيولوجي لإن النوت زادت قمت أستخدم له الفايل الكبير اللي داخله أظرف عشان شكل   النوتة يبيّن وعشان سهل أوصلّهم، أما الـbbe لإن نوت شوي كنت أستخدم طريقة   الكورس الأول، ولازم يكون عندكم الفايلات الشفافة الفاضية اللي تدخلون فيهم أوراقكم أنا   كنت أستخدمهم أحط داخلهم نوتي ملوت كل يومعشان ما يتعفسون، أنا شوي منظمة يمكن   زيادة عن اللزوم.

١١- پلانر، بالنسبة لي ضروري، تكتبون كل يوم شنو لازم تسوون وجذي، وشنو أهدافكم   وخططكم، وفي بلانرز تكون عليهم عبارات تشجيعية وجذي وايد يفيدون️.   مالي من Ban.do حيل عجيب ويشوق وفي ستكرات وعبارات لطيفة! ومو بس جذي، يبدي من شهرسبتمبر السنة الحالية إلى شهر ١٢ السنة اللي بعدها يعني حيل يظل أكثر من سنة   "١٧ شهر"، وفي اللي نظامهم يكون بدون تواريخ ومنظمينهم على شكل كل اسبوع شنو فيه وهذا انا حبيته اكثر لما صرت بسنة ثانية، وطبعًا وأكيد تقدرون تستبدلون هالأشياء بآپليكيشنز علىالجوالات ولكني شخصيًا أفضّل الورقيين أحسهم جدّيين أكثر وعشان اعرف اللي لي واللي علي دايمًا.

١٢ - آلة حاسبة، راح تحتاجونها حق الفيزكس والكمستري والبيولوجي والـbbe ومرات حتى امتحانات الانقلش الريدنق يكون فيهcalculations بسيطين بس وقت الامتحان الواحد يتنّح، المهم يعني مهمة حيل ف خشوا مالتكم مالت الثانوي.

١٣ - فايل أو جنطة تحطون فيهم أغراضكم وقت الجامعة، عشان ما يضيعون مع الحوسة وعشان ما تتعبون وأنتو ماسكينهم، في أكاونتاتبالانستا يسوون اللي على أحرفكم وأسماءكم،    وغالبًا القوائم بعد يوزعون حزة الانتخابات، كل واحد ياخذ فايل على الجهة اللي يرتاح لها

تقريبًا هذي الأشياء المهمة والأساسية وحاولوا تكون عندكم كثر ما تقدرون ما تتصورون   شكثر راح تسهل حياتكم الدراسية لو كانت عندكم.

الآيباد، واستخدامه بالدراسة ~

شيء غريب صح؟ متأكدة ٩٠٪‏ منكم أول ما قروا "الدراسة بالآيباد" قالوا لا، مو إحنا، مستحيل، مو متعودين، مستحيل تكون دراسة، مستحيل ندرس عليه. معاكم وحدة كانت مثلكم وأكثر بعد، كنت مستحيل أتقبل فكرة إني أهد نوتي وأوراقي وأخلي كل شيء عالآيباد، مستحييل. لحد ما دخلت سنة ثانية، شوي شوي القاعة صارت كلها آيبادات، ظليت أنا وعدد بسيييط اللي ندرس عالأوراق، شفت مميزاته، فعلًا الناس اللي تدرس عالآيباد مستمتعين بمميزات وايد، بلا هم طباعة ولا حبر يخلص ولا   تدبيس، قبل المحاضرة بخمس دقايق تنزلون النوتة عندكم ويمشي الحال🤝 واللي ما يمديه ينزل النوتة، تقدرون تدزونها حق بعض airdrop. يمكن مو حيل تحسون بقيمة هالشي بس بسنة ثانية مثلًا النوت تنزل/تتغير قبل المحاضرة بخمس دقايق ف حيل حيل حيل مفيدة. بعدها قررت أشتري آيباد، وكلش ما تحسفت ولا ١٪‏ والله️ بالعكس، صار فيني أنا ويييني عن هالاختراع من زمان! إي لهالدرجة. 

أدري صاير فيكم شلون ندرس عالآيباد؟ والله نفس دراستكم العادية بس بدون أوراق، في برامج تسمح بهالشيء، تكتبون بالقلم، تغيرونحجم الخط، لونه، تستخدمون هايلايتات، تضيفون صفحات/تحذفون، وايد أشياء ووايد خيارات متاحة لكم. إنزين أوكي سولفت لكم وايد عنالآيباد، شلون تنظمون وضعكم فيه أو إذا أحد وده يجرب يدرس عالآيباد شنو يسوي؟ الحين أقولكم.. 

١- آيباد

 أي نوع آيباد؟ لا، مو أي نوع. لازم يكون آيباد برو، المقاسات اللي تريحكم، في آيباد مقاس ٩ انش وفي ١٠ انش هذولا بالنظركلش مابينهم فرق، مقاس الآيباد اللي متعودين عليه. وفي مقاس ١٢.٩ انش وهذا مقاسه مقاس شاشة لابتوب وورقة A4، أنا هذا  مقاس ايبادي. ليش خذيته وأهو حيل كبير؟ لأن أريح حق عيني، لأن أقدر اقسم الشاشة بالنص، عيوبه إنه كبير، ثقيل شوي، ويحتاج مكان   بالجنطة مثلًا. ف أنتو شوفوا شنو احتياجاتكم واستخدامكم وبناء على هالشيء قرروا شنو الحجم اللي يناسبكم

٢- Apple Pencil هذا ينشبك بلوتوث مع الآيباد
  وتقدرون تكبون فيه عالايباد بعد، حيل سلس، حيل سهل، لازم تشترون الايباد والقلم مع بعض عشان تدرسون فيهم مع بعض

٣-تسوون لكم إيميل بقوقل "gmail"  في حال ما عندكم

 وتستخدمون فيه البرامج المفيدة بقوقل مثل قوقل درايف، هذا تحطون عليه فايلاتكم ونوتكم وتحملون عليه الشغلات المفيدة بحيث يسيفها. نزلوا ابليكيشن قوقل درايف على الآيباد.

٤-تنزلون برامج للدراسة notability or good notes 

 شنو يعني؟ يعني برنامج تنزلون عليه النوتة وتقعدون تنوتون عليها وتدرسون، وبالبرنامج تقدرون تسوونفايلات حق كل مادة وجذي وترتبون شغلكم البرامج للدراسة هي برنامجين مشهورين صراحةً بين الطلبة ، الأول notability والثاني good notes, البرامج بفلوس ويعتبرون غالين شوي بس حلال فيهم كلللل فلس هذولا مهمين حييل. اختاروا منهم برنامج واستخدموه وثبتوا عليه، أنا عن نفسي استخدم notability لإني احسه اسهل مرتب اكثر، ولان فيه خيار التسجيل اثناء التنويت ف اقدراسجل المحاضرة على نوتي نفسها بالايباد بدون ما احتاج اسجلها على   فوني مثلًا، ف انتو شوفوا شنو يريحكم. ولا تنسون تسوون خيار باك آب ببرنامجكم على قوقل درايف عشان يسوي باك اب أول بأول وما تضيع نوتكم عشان لو الايباد صار فيه شيء لااا سمح الله.

عشان ما تحتارون وايد بالتفكير وانتو ليلحين مل جربتوا ولا شفتواحد، ف بحط لكم فيديوات مسوين مقارنة بين البرنامجين، اذا فضيتوا وصار ودكم تشوفون شوفوا

• https://youtu.be/HFu0FJHJBG4
• https://youtu.be/98CMjb1WEnE

٥-برامج متنوعة مفيدة للدراسة والجامعة

مثل برنامج scan حق الصفحات في واايد اختاروا اللي يريحكم، برنامج ترجمة انا عن نفسي مااستخدمت غير قوقل ترجمة كافي وزيادة، يوتيوب، برنامج فلاش كاردز لو تحبون، برامج ايميل "جيميل وآوت لوك"، قوقل درايف، دروب بوكس."

٦-خلوه الايباد للدراسة بس!

 من صجي والله، لا تنزلون عليه لعبة أو نتفلكس أو أي شيء ثاني ممكن يشتتكم! 

انزين حصه، الحين شرينا ايباد وكل شيء، هل معناه خلاص ما تستخدم  أوراق؟ امبلا، راح  تستخدمون أكيد، راح تستخدمون حق الانقلش، ومرات اثناء دراستكم بتحتاجون تكتبون وتنسخون وتسوون تلاخيص  وجذي وأنا افضّل الاوراق بمثل هالوقت، يعني ما ردكم بتحتاجون الأوراق.. 

ويمكن بسنة أولى ماتحسون بقيمة الآيباد حيل، بس بسنة ثانية النوت بتصير اضعاف الاضعاف والطباعة بتزيد وجذي، بتعرفون قيمته عدل.

حصه سؤال ثاني، نشتريه من البداية؟ صراحةً احس لا، ليش؟ أخاف تشترونه وبعدين ما ترتاحون له وتتوهقون، ف أفضل شيء اشتروه على الكورس الثاني لو أنتو محتارين حييل، ليش انزين   الحين قام اكتبه بتدوينة الكورس الأول؟ عشااان الله يسلمكم اللي وده يشتري من                 الحين يشتري ونرضيكم كلكم️️ أو تدرون شلون، اللي حيل حيل متردد خل يخلص سنة اولى ويشتريه حق سنةثانية لإن مثل ماقلت لكم بتعرفون قيمته عدددل أدري طولت السالفة وهي قصيرة

اللي عنده أي سؤال يخص الآيباد لا يتردد! ادري شوي الموضوع ما يدش العقل شلون انا طول عمري ادرس بكتب وفجأة آيباد، انا موجودة دايمًا لأي سؤال️️

الكورس الثاني ~

أدري إن المدونة كلها كانت عن الكورس الأول، لإنه فعلًا محور حديثنا وهذا اللي يهمكم حاليًا، بس بنفس الوقت أدري وايد منكم عنده فضول بخصوص الكورس الثاني، وأنا كلش مو هاملته، عندي تدوينة ثانية كاملة عن الكورس الثاني، لكن عشان ما أطولها زيادة وماتتشتتون، ماراح أكتب وايد عنه إلا إنه  حيل أخف وأحلى، واللي فيه فضول يقرا؛ هذا رابط  المدونة اللي تخص الكورس الثاني

دليلك للسنة التمهيدية في كليات مركز العلوم الطبية ~ الفصل الدراسي الثاني

رسائل من طلبة دفعة ٢٠١٧ ~

أدري إني صرت قديمة شوي، وصارلي سنتين من كنت بسنة أولى، ف يمكن تحتاجون دافع معنوي من ناس قبل شهر تقريبًا كانوا مازالوا بسنة أولى وقبل سنة بالضبط كانوا فرحانين بقبولهم مثلكم، عشان جذي بحطلكم الحين  جم رسالة من جم بنت، كلام من قلبهم لكم.

"الف مبروك دفعه ٢٠١٨ قبولكم في ارقى صرح تعليمي في جامعة الكويت .. كل شخص فيكم لازم يعرف ويؤمن بفكره ان الانسان عشان يوصل لاحلامه لازم يمر بشويه صعوبات وضغوطات عشان يستاهل الحلم الي كان يطمح انه يوصل له من زمان  و قبولكم في الكلية ماهو الا بداية لتحقيق حلم سعيتوا له من سنين طويلة وهو حلم الطب .. مهنه الطب مهنه إنسانية عظيمة اهي اسلوب حياة كامل اهي طريقة في التعامل مع الناس من حولنا اهي اكثر من مجرد مهنه .. الأطباء يضحون اكثر من غيرهم في سبيل راحه الغير الطبيب اهو الحكيم اهوالمعلم اهو الأخ واهو الصديق وعشان جذي درب السبع السنين راح يكون في صعوبات وتحديات كبيرة بس بنفس الوقت خلال هالدربراح تتعرفون فيه على ناس وايد راح يساعدونكم و يوجهونكم حق الطريج الصح اذا تعثرتوا وراح تكسبون صداقات وتمرون بتجارب ماتنسي .. الكلية من كثر ما اهي صغيرة الكل فيها يعرف بعض وكل دفعة راح تساعد الدفعة الي قبلها و تنصحها .. بسنة اولى الاكيد انأغلبكم راح يمر بفترة يحس فيها انه ضايع واقولها لكم وأعيد انها فترة بس وتعدي لان الانسان لمن ينتقل من مرحلة مثل الثانوي لي مرحلةيديدة مختلفة واهي الجامعة اكيد راح يواجه فيها صعوبات بالبداية لين ما يتأقلم و ياخذ عالوضع ومن بعدها كل شي راح يتسهل الموضوعمجرد وقت فلا تتحبطون من البداية .. نصيحة زيادة يمكن مو اي احد راح يقولها لكم ( لا تأخذون كلام من ايي احد بخصوص طريقةالدراسة واطبقونها بالحرف لان مقدار استيعابكم و الظروف الي راح اتكونون انتو فيها وقت الدراسة حق هالمادة تفرق عن الشخص اليسمعتوا منه هالكلام فحلو انكم تسمعون من الكل بس ما اتطبقون الا الي تشوفونه انتو صح ويناسبكم ).. كلمة اخيرة لكم الله يوفقكم و يسهلعليكم مسيرتكم في الكلية يا دكاترة المستقبل️️" 

-غلا المزرم, طبّ بشري

"سنة أولى تعتبر الخطوة الأساسية بكلية الطب ليش؟ مو لأن محتواها مهم طبيًا ، لأن بتخلي الطالب يعيش جزء بسيط من كمية و حالة ومادة الطب تمهيداً للسنين الياية ، شنو يعني ؟ يعني سنة أولى بتخليكم تحددون نظام دراستكم مع السنين الياية ، شلون بتوازنون بين حياة الطب وحياتكم العادية ، شلون تنظمون وقت دراستكم، لأن صج أن بالثانوي كان عندكم نظام تمشون عليه بالدراسة بس الثانوي كانتمرحلة دراسية لجميع الفئات أما الطب مخصص للنخبة لذلك ممكن دراستكم تختلف لأن المنهج مختلف. 

سنة أولى كانت تجربة غريبة وعجيبة و حلوة و لا تخلون أحد يخرب عليكم خوض هالتجربة ، مو أي نصيحة تكون فعّالة سمعوا كل النصايح و شوفوا اذا تناسبكم ولا لا. 

رسالتي لدفعتكم و الدفع الي بعدكم الطب صج مساره صعب و لكن اذا صعبتها على نفسك رح تصعب عليك و اذا آمنت بنفسك رح ترتفع وتسمو و ترتقي ف دايماً احرص على أنك تكون متفائل و ثابت حتى بالأوقات لما الجو العام يكون مبحط و سلبي لأن اذا أنت استهنت بنفسك ماكو أحد بيرفعك غير نفسك."

-مرام الغربه, طبّ بشري

"أهلًا.. مبروك القبول جميعًا! 

سنة أولى من أخف السنين بالكلية، والأغلبية يعتبرونها أحلى سنة من وايد جوانب. طبعًا أكيد أول شي ببالكم وأكثر شي تحاتونه اهو نظامالدراسة والنوّت والمواد. أحب أطمنكم، إنها تقريبًا مشابهة للثانوي، بس مو تسيبون! درسوا عدل، وحاولوا إنكم تدرسون أول بأول عشان تييبون قريدات وتطلعون بمعدل حلو بسنة أولى. ابدوا صح دراسيًا. والكل بيكون موجود ويساعدكم بأي شي تحتاجونه بالدراسة، بتشوفون هالشي لما تداومون بالكلية بإذن الله.

النقلة من الثانوي للجامعة، فيها شوي مشاكل، مشاكل صغيرة لا تحاتون، وايد منا يكون حاط توقعات عالية، وخصوصًا بالناس، فشوي ينصدم. مو الكل أخلاقه حلوة ولا الكل يتمنى لكم الخير، طبعًا في وايد من الناس الطيبة، بس الواحد أحسن له يختار أصدقاءه صح ويرسم حدود بين الناس ويكوّن له سمعة طيبة. هذي من أهم النصايح! الشي الثاني، عمركم لا تقارنون نفسكم بغيركم، لا بطريقة الدراسة ولا بأي شي. لما تدش الكلية، قد يحوشك الاحباط إنك يوم من الأيام كنت من أشطر الناس بالمدرسة والحين تحس نفسك من أسوء الطلبة. لا تستلمله الاحباط، واوثق بنفسك. أنت دايمًا تقدر وأنت دايمًا غير وتجربتك غير ورحلتك غير. فاستمتع فيها قدر الامكان وخلها تكون مميزة. 

موفقين يا رب"

-أنوار الجسار, طبّ بشري

"اول شي حابه اقولكم مبروك قبولكم يا دكاتره المستقبل اجتهدوا وتعبتوا وسهرتوا ليالي عشان مسج يكون فيه مبروك تم قبولك في كلية الطب والحمدلله لقيتوا نتيجه تعبكم هذا ومشوار الطب يبيله صبر لا تستلمون من اول عثره تواجهكم حاربوا من اجل حلمكم وطموحكم لا تسمعون لتحبيطات الناس وتحبيط نفسك لان فيه اوقات بتقول لنفسك  انا ما اقدر اكمل ، ماراح اقدر على طب ،الطب صعب عشان جذي لا تستلمون للتحبيطات هذي لان انتوا اقوياء وابطال ولا تخافون من الفشل لان فشل جزء من النجاح و حاربوا وبذلوا كل ما فيكم من طاقه لان الطب يستاهل والله  وتذكروا بعد انه الله يعطي اصعب معاركه لأقوى جنوده وبالنسبه حق سنه اولى خاصة اهيا يبي لهاااا مجابل بسسنه اولى كلش مو صعبه بس الصعب فيها التأقلم على وضع ونفسيه لان فتره انتقالية من مرحله لمرحله مختلفه تمااااماا ف هذا اكثر شي واجهته بصعوبة سنه اولى اهيا السالفه التأقلم اما  بالمواد مو صعبه مثل ما قلت تجابلون بتلقون نتيجه تعبكم والله يوفقكم ويسهل عليكم سنتكم الاولى في الطب وانتوا قدها وفالكم القريدات العاليه يارب️"

-رحاب الوسمي, طبّ بشري

" شعوري بسنة اولى كان عبارة عن شغلتين، حماس و ضياع ! 

طبعاً الحماس كله يكمن بسالفة اني انقبلت طب و خلاص انا med student و من قدي، اما الضياع بلش يوم بلّشت الدراسة الجديّة بسعدّت والله، تعلمت ان سنة اولى جداً سهالات حق الشخص اللي راح يعطي من قلبه .. ومو مستاهله خوف او توتر لانها سنه حلوه وتقدرون تستغلونها حيل حيل وتطلعون طاقاتكم و اشتطاطكم  كله بالدراسه، راح تحوشكم انهيارات و وبتضحون بجم طلعه بس حيييل يسوى،اصلا وناسه لأن   ماراح تحسون انكم طلبة طب الا اذا ماقدرتوا تطلعون و لا ما قدرتوا تروحون زوارة بحجّة  ان عندكم دراسة ! السنة اللي بتمر عليكم حيييل حلوه و بتتعرفون على ناس معدنهم ذهب و بتنضجون حيل والله بعد كل يوم يمر عليكم بسنة اولى، وازنوا بين حياتكم الطبيعية و بين حياة الكلية ، درسوا و عطوا من قلبكم و اهم شي حطوا ببالكم ان  دراسة اسبوع قبل الامتحان كلش ما تنفع، درسوا درسوا! 

الله يوفقكم يا زملاء المستقبل و يعينكم عاللي بيواجهكم .. تفاءلوا دايماً و حطوا ببالكم ان  كلكم بهالمعركة سواء، مشوار الطب حلو و انتو نخبة الطلبة فلا تخلون شي يعكّر مسيرتكم ! 

الله يجعل الخير رفيق دربكم 🤲."

-ياسمين العازمي, طبّ بشري 

"السلام عليكم دفعة ٢٠١٨، معاكم الإنسانة اللّي صارت "رسمياً" طالبة طب سنة ثانية باللحظة اللي وصلتكم فيها مسجات قبولكم بالكليّة، ألف مبروك، كبرتوا وكبّرتونا يا أحباب!

سنة أولى بالنسبة لي سهلة ولا صعبة؟ سنة أولى "جديدة"! وهذا أفضل وصف لها، صعوبتها تكمن في إنها نقلة نوعية من حياة الثانوية لي حياة الجامعة اللي مختلفة تماماً، المطلوب منكم إنه "تتعوّدون" على الحياة اليديدة وبس، ومهما استغرقتوا وقت طويل على ما تتعودون لازم ماا تتحبّطووون! عن نفسي الدراسة ما توّهقت فيها لأنه لقيت إنه الكمية والصعوبة تزيد تدريجياً ومو كل شي مرّة وحدة، الدورات والطلبة اللي يشرحون لنا شيّ حييييل سّهل عليّ، الكورس الاول كانت حياتي زحمة لأنه الدورات كانت شي اساسي عندي، بس بالكورس الثاني قمت اروح بس حق النوّت اللي كلش ما فهمتها وتعودت وفهمت شلون ادرس بروحي، إذا فيه أشياء تحسفت عليها وأبيكم ما تطيحون فيها اهو اني ما درست أول بأول بالبداية وهالشي من كثر ما قالولي إنه المواد سهلة اهي صج سهلة، بس ماكو شي ما يبيله تعب وشدّة حيل، لا تضغطون على نفسكم بس لا تماطلون بالتأجيل، وثاني شي لا تسمعون كلام اللي يقولون لكم اعتمدوا عالدورات ولا تحضرون كلاسات، صج الدورات تغني عن المحاضرة لكن لا تعوّدون نفسكم إنكم ما تحضرون، حضروا عشان تتعودون على طريقة شرح الدكاترة وكلامهم لأنه حيل غير عن نظام أبلات ومُدرسين الثانوية، وشوفوا من الدكتور اللي يفّهم ومنو لاء بنفسكم مو من كلام أحد، وأفضل نصيحة أقدّمها لكم اهي إنه "كل شيّ بوقته حلو" ! عيشوا كل سنة وانتو تفكرون فيها اهي بس، وما تحاتون كلام اللي أكبر منكم عن السنوات القادمة، اجتهدوا وشدّوا حيلكم بالمادة اللي تدرسونها بدون ما تفكرون شلون بتعدّون مادة ثانية بتاخذونها الكورس الياي، صدقوني جذي بترتاحون،  وفي ظلّ كل هالدراسة لا تنسون "تستمتعون"! استمتعوا ترا سنة أولى جداً ممتعة وجميلة! 

بالختام، دايماً أحب أقتبس أبيات الشّعر اللي تقول 

" وكلُّ مُحاربٍ في الطبِّ يبقى..على الأيامِ أكرَمُنا جِهادا

فيا هذا الطبيب إليكَ شِعري..على التمييزِ نَصباً والمُنادى

لَقد شُرِّفتَ عن غيرٍ كثيراً..كَما رَمَضان شُّرِفَ عن جمادى" "

- ملاك الهندال, طبّ بشري

نصائح من القلب إلى القلب، وخاتمة ~

الحين وصلت لآخر التدوينة.. أدري كانت طويلة وقراءتها خذت منكم وقت فأشكركم من كل قلبي على قراءتكم لها.. وبما إن وصلنا للنهاية والختام راح أحط لكم نصائح عامة للدراسة وللحياة الجامعية عمومًا وكلية الطب خصوصًا.

١-درسوا أول بأول

 صعبة أول شي صح؟ الحين أقولكم الطريقة. أنا بالبداية كنت طول الأسبوع ما أدرس، وبالويكند أحاول  أدرس اللي خذيته هالأسبوع، بالكورس الأول راح  تاخذون ٣ نوت بالأسبوع بس، هذولا بسهولة يخلصون بالويكند. أو تقدرون تصيرون أشطر مني وتدرسون كل نوتة بيومها، لو تقرونها بس وتترجمون الكلام وتسوون تلاخيص وتحفظون المهم. هذي أكثر نصيحة بتنقال لكم وأصعبها تطبيقًا.. الشاطر صج هو اللي بيطبقها، وبيرتاح بالنهاية وبيرتاح لما يشوف قريداته.

٢-درسوا فوكب ولا تنسونه ودرسوه بالعطلة إذا قدرتوا لو كل يوم صفحة، من وين تييبون الكتب؟ بالأورينتيشن اللي بيسوونهم القوائم راح يعطونكم إياهم، لو   كل يوم صفحة بتخلصونهم بالراحة، ومنها بعد جذي تتحمسون للدراسة الياية️ بيقولون لكم هذي بتخرب عليكم عطلتكم ومعقدة حدها ومالكم شغل فيها، صح كلامهم بس عن نفسي تمنيت لو مسوية هالشي بالعطلة وماراح أحرمكم من هالنصيحة صراحةً.

ولو ما قدرتوا عاادي بيمديكم وزياادة، بس هاا من أول يوم دوام تبلشون كل يوم صفحة صفحة صفحة لين تخلصون الكمية عشان تردون تراجعون مرة ثانية وتثبتون الحفظ 

٣-استغلوا اليوتيوب عدل

 كل شيء تقريبًا موجود باليوتيوب خصوصًا الكمستري، بس كتبوا الموضوع ويطلع لكم   فيديوات ، ماراح احصر لكم قنوات معينة لإن اليوتيوب بحر واااسع واستفيدوا من            اللي تشوفونه يناسبكم ويوصل لكم الفكرة والفيزكس هم تلقون جم كونسبت بجم قناة، والكورس الثاني  بعد حق البيولوجي اليوتيوب واايد مفيد🏼

٤- درسوا عدل من أول مرة

مو تقولون أول طقة بس جذي قراءة بعدين قبل الامتحان ندرس عدل لا. درسوا من أول مرة جنه باجرامتحانكم وركزوا عدل.، عشان الطقة الثانية تصير خفيفة -وعادي جدًا تنصدمون إن جنكم مو دارسين أصلًا- بس أهون من إن يكون امتحانعقب أسبوع توكل تدرسون صج. بعد الطقة الثانية تبدون تحلون أسئلة قديمة، بعدها قبل الامتحان بيومين أو ثلاث تبلشون طقة ثالثة اللي إهي عبارة عن مراجعة سريعة للنوت وسكان على الأسئلة القديمة.

٥ -ساعدوا غيركم.

 بقولكم تجربتي الشخصية بخصوص المساعدة، أنا من أول ما انقبلت ماسكة أكاونت حق دفعتنا ,اساعدهم بكل شي معنويًا دراسيًا كل شيء وصرت لاحقًا ممثلة الدفعة والحمدلله. لا تصيرون أنانيين ولا تاخذكم سالفة مابي فلان يصير أحسن مني. والله العظيم إني أحس توفيق بسنة أولى وتفوقي الأكاديمي بفضل الله ثم بفضل مساعدتي لدفعتي طول السنة ودعواتهم لي. 

٦ -حطوا ببالكم

 أن لو مهما كنتوا كيوت وطيبين في ناس بيكرهونكم جذي بدون سبب ويمكن حتى يأذونكم. ليش؟ لإنهم مرضى الله يعينهم على نفسهم وعلى مرضهم. أنا صارلي جم موقف بسنة أولى وحتى سنة ثانية  بهالموضوع وكنت صج أنصدم لإني مالي شغل بأحد مع ذلك ما سلمت، اللي تعلمته إن لازم أعطي كل شيء طاااف وأهم شي دراستي وبس لأن الناس وسوالفهم ما يخلون.

٧ -توكلوا على الله

 وآمنوا باسمه (الوكيل) اللي ما يعجزه شيء، آمنوا بنفسكم وبطوحاتكم وأحلامكم وإنكم ما وصلتوا إلا لانكم قدها.

٨ -اطلبوا التوفيق

كل الدراسة اللي تدرسونها (أسباب)، وكلهاا دون التوفيق اللي من الله هباء، صدقوني كلنا شطار وكلنا درسنا بس ما فكرتوا ليش ناس ماشاءالله A's وناس لا؟ هذا توفيق من الله مو لإنه يملك قوى خارقة. لذلك دائمًا وأبدًا اسئلوه التوفيق.

٩ - احتسبوا الأجر 

راح تمر عليكم أيام صعبة وسيئة، احتسبوا الاجر، تكلموا عند أحد لا تخشون شيء بقلبكم، وأنا موجودة أسمعكم مثل ما استمعت حق الناس اللي بدفعتي وساعدتهم مع إني وحدة منهم وفيهم وحالي من حالهم.. 

١٠ -مالكم شغل بأحد

ولا بدراسته، عليكم من نفسكم، مالكم شغل بكلام أحد هذا صعب/هذا معقد/ما قدرت عليه لإن هذي تجارب وكل واحد يقدريخلي تجربته ناجحة لما يخلي قناعاته ناجحة. وyou are what you believe you are. للمرة المليون: لا. تسمعون. كلام. أحد.

وأخيرًا أعتذر عن الإطالة ولكن حبيت أنقل لكم تجربتي بالتفصيل وبنفس الوقت بكل اختصار بس شكله ما قدرت 

كلموني إذا احتجتوا أي شيء، ولا تستحون مني رجاءً، لو عندكم أي سؤال/استفسار/بوح/تحلطم/انهيار أنا موجووودة طول الوقت، وتحت حاطة أكاونتي بتويتر+الآسك.

أسأل الله العلي العظيم أن يوفقكم في بداية مشاوركم بهذه المهنة الإنسانية، الله يسهل عليكم كل صعب ويزيل العقبات عن   طريقكم ️. 

please feel free to ask me anything you need, and you can contact me via

twitter: @ishiho_ and

ask.fm: https://ask.fm/HISSA99

حصّه  

الأحد ٨ يوليو ٢٠١٨ 

 ٢:١٢م