أشكر لكم اكمالكم للتدوينة, وأعتذر عن الخطأ اللي حصل مع موقع قوقل بلوقر..
بهذا البارت راح تقرون عن:
1-infection and immunity module أو المعروف بـi&i
2-اختبار الفاينل
3-PBLs, شنو أهما؟
4-clinical skills, أول دليل حيّ انكم طلبة طب💓
5-نصائح دراسيّة عامـة.
6-خاتمة لطيفة
بسم الله نبدي..
Infecion and immunity i&i ~
هذا يعتبر أول موديول لكم بالكلية، اللي فات كله كان فاونديشن وشغلات بشكل عام بس بهذا الموديول كل اللي بتدرسونه بيصب بموضوع واحد وهو العدوى والمناعة. موديوليعني تحته كذا مواد، اناتومي باثو فارما إلى آخره.، وكلهم يخصون موضوع واحد او سستم واحد.
العدوى يعني بتتكرر وايد شغلات من مايكرو fb2, الزبدة إن إذا درستوا مايكرو عدل بfb2 راح يتسهل عليكم هالموديول حيييل! أما المناعة ف حيل حيل سهل، يتكلمون عنخلايا الجسم وشلون تكافح الاجسام الغريبة، يتكلمون عن امراض المناعة الذاتية، حيل انترستنق! شغلات غريبة وتونس. أغث شي بهالموديول أهو بارت الإنفكشن لأن فيه حفظوايد..
نوته مو وايد، قريب من ٦٥ نوتة، إي ترا ٦٠ يعتبر شوية والله😂 وحطوا ببالكم إن وايد شغلات مكررة بالنوت ف تمشي معاكم النوت بسرعة..
بتاخذون فيه لابات اناتومي وباثو بس عددهم بسييط يمكن ٢ بس؟ ومو داشين بالامتحان..
بتاخذون فيه PBLs بعد، بتكلم عن الPBLs بعد شوي إن شاء الله.
رغم إن هالموديول محتواه سهل وجذي، لكن أغلبنا نطيح فيه، والأسباب وايد أنا بتكلم عن اللي شفته..
سنة ثانية طويييلة ومنهكة، ف يمكن التعب يلعب دور بإن الواحد ما يبذل كل اللي باستطاعته،
امتحان i&i غالبًا يكون تحدي، مابي أخوفكم بس فعلًا يعتبر من أكثر الامتحانات اللي قريدات الطلبة تطيح فيه.. عشان جذي لا تتهاونون فيه ولا تقولون سهل، درسوه عدلوحفظوووا عدل، وبتسوون وايد زين صدقوني❤️
ما تحتاجون فيه كتب، حفظوا نوتكم عدل، الانفكشن ركزوا عليه لأن التركات تكون فيه، الدرق لست حفظووها عددل، وراجعوا كثر ما تقدرون..❤️
امتحان i&i امتحان واحد بس، وبيبر وحدة بس، تتكون من ١٠٠ سؤال، ٦٠ سؤال mcqs اللي تعرفونهم و٨٠ سؤال emqs, هالنوع من الأسئلة نفسه ترا النوع الأول بس بدال٤ خيارات يصير عندكم ٨ لا تخترعون وايد🌸
شدوا حييلكم❤️
PBLs, شنو أهما؟ ~
PBL=problem based learning..
عبارة عن، ماراح أقول كلاسات، لا بالعكس، قعدات. إي والله، قعدات وسوالف! مافيه رسمية كلش. تتقسمون قروبات صغار، كل قروب فيه تقريبًا ١٠ طلبة أو عدد مقارب لهذا،تقعدون بدائرة حول طاولة كبيرة، وتتناقشون.
يكون في 2 pbls بالأسبوع، أول واحد يعرضون عليكم حالة شخص مريض وجذي تحللونها مع بعض وتحاولون تشخصونها، وتالي يعطونكم تحاليلهم ومعلوماتهم الصحية وعادفي شخص من القروب يكون ماسك القعدة ويخليكم تتكلمون ويسألكم، وفي شخص يكون ماسك قلم سبورة ويكتب😂❤️ حيل حيل وناسة وتبادل أدوار وهمن تبادل النقاش ويصيراشتطاط أحيانًا وأصواتنا تعلى من الحماس إذا القروب قوي والدكتور يونس😂 وثاني واحد بالاسبوع كل واحد يتكلمعن تاسك معين ويشرحه سواء بوربوينت أو بس جذي بالكلاموالشرح بس لاازم كل شخص فيكميتكلم، محد يقعد ساكت!
الpbl يبني شخصياتكم حييل، لا تكونون خجولين وتستحون، اهو فرصة تتعلمون وتتهيؤون حق المستشفيات، وأيضًا ينمي فيكم الـcritical thinking ويخليكم تحللون الحالاتوتشخصون بعد❤️
راح تبدي كلاسات الpbl بنهاية fb2 وطول فترة i&i, ليين تتخرجون إن شاء الله من كلية الطب🙆🏽
الحضور إجباري، ورقة الحضور تكون موجودة بأول ١٠ دقايق بس من الpbl بعدها ياخذونها، اللي يطوفه توقيع 2 pbls ينحرم من الفاينل، وهالكلام يمشي على باقي السنين،فديروا بالكم وحرصوا عالحضور قبلها عشان ما يفوتكم التوقيع🙏🏼
كلينكل سنة ثانية😎 clinical skills ~
إيي بالضبط، هذا الوقت اللي راح تكشخون فيه وتحسون إنكم طلبة طبّ رسميًا💓
هني أخيرًا بتتعلمون:
-شلون تتعاملون مع المرضى
-شلون تفحصونهم، فحص البطن، استخدام السماعات الطبية "إيي راح تكشخون فيهم أخيرًا!😻"
-شلون تاخذون من المرضى التاريخ المرضي History taking
راح يشرحون لكم بقاعة المحاضرات بعدين تنزلون تحت وتطبقون..
كل المهارات الاكلينيكية اللي تنشرح ماراح تنعاد، ولازم تكون ببالكم لي سنة ثالثة، ف حرصوا تاخذون فكرة زينة عنهم❤️
الكلينكل راح يكون بآخر السنة لما تدرسون i&i, راح يطلعكم حييل من جو الضغط وينسيكم جزء كبيير منه، وفوق هذا يذكركم أنتو ليش قام تدرسون حاليًا، راح يبيّن لكم شكثرهدفكم قريب جدام عينكم وبس عليكم تركضون له شوي وما تتعبون من هالمراثون لحدّ ما توصلون خط نهايته💓
الحضور للكلينكل إجباري، والي يغيب عنه أكثر من مرة ما يحضر الفاينل، فـ ديروا بالكم🙏🏼
الـفـايـنـل FINAL EXAM ~
أكثر شيء مخوفكم أدري والله. حاطين ببالكم "شلون بنمتحن بسنة كاملة؟ متى راح يمدينا؟" بس راح تكتحنون بالسنة كاملة وراح يمديكم وراح تتذكرون كلامي😂👌🏼
الفاينل يعتبر حفرة سنة ثانية نوعًا ما، ليش؟ لإن عليه ٦٠٪. هل هذا يعني إن سنة ثانية ما تعدي إلا إذا درست لهالامتحان "قبلها" زين؟ لا. لإن التحضير للفاينل يبدي من أول يوملكم بسنة ثانية، درسوا عدل للفاينل من البداية! ثبتوا المعلومات عدل، حفظوا بطرق تسهل عليكم استرجاع المعلومات، حاولوا تسوون ملخص لكل نوتة أو عالأقل النوت السهلةحيل بحيث ما ترجعون لها وقت الفاينل وتكتفون بملخصكم، اللي يهمل طول السنة بيسصعب الفاينل وايد، يعني بالعقل شلون بتحشون فوق الـ٣٠٠ نوتة بفترة بسيطة قبلالامتحان؟؟ مستحيل، إلا لو كنتوا آلات! بس لو كنتوا منظمين من البداية ودارسين عدل وعندكم خطط واضحة، بتستسهلون هالـ٣٠٠ نوتة، وبيصيرون عليكم مثل شربة الماي❤️
-للفاينل، حرصوا تدرسون كل شيء، خلال السنة لا تقطون نوت عشان ما تاخذ منكم وقت بالفاينل، ونصيحة لو قاطين نوتة لا تدرسونها وقت الفاينل لأن ما يمدييي ويادوبتراجعون ما ينفع شغل دراسة من أول ويديد ووراكم زليون نوتك تراجعونهم!
-حلوا MCQs وااايد قبل الفاينل، واايد. حتى لو ما تمرر وايد بس راح يريحكم نفسيًا ويزيل الرهبة واللي تشكل أكبر عقبة للطلبة بالفاينل.
-نظموا وقتكم، سوولكم خطة وجدول واضحين، الخطة الواضحة تخلي الهدف أوضح وأقرب! وأقرب. حافظوا واحرصوا على صلواتكم، ابتعدوا عن المشتتات مثل السوشل ميدياوغيره، ادرسوا بمكان هادي، لا تاكلون أكل ثقيل، سووا رياضة، وعرفوا قيمة وقتكم زين.
-بتكون فترة ضغط وبتتعبون فيها وبتبجون بس دايمًا تذكروا إن كل شيء يعدي! وإنكم دشيتوا كلية طب ومو أي كلية، كلنا ندري شكثر كليتنا شديدة بس هم ندري إن إحنا مو أيطلبة!
أنتو قدها والله، الفاينل مو شي خارق وتعجيزي أنا مريت فيه ودفعتي مرت فيه واللي فوقنا كللهم مروا فيه، وأنتو بتمرون فيه وبتعدونه بإذن الله💓
نـصـائـح دراسيّة//نجوم بتضوّي لكم سنة ثانية✨~
١- الدراسة أول بأول، لا تراكمون وايد. حاولوا تدرسون يوم بيومه أو عالأقل لا تخلون أكثر من ١٠ نوت متراكمين عليكم.
٢- كل شيء يندرس، يتراجع عالأقل ٣ مرات. التريك كله بالمراجعة، تراجع وايد؟ تييب قريد أعلى.
٣- حرصوا على حضور المحاضرات، نوتوا مع الدكاترة، وفرغوا لما تحسون إن يحتاج تفريغ. كل دكتور حاولوا تسئلون الدفع اللي أكبر منكم هل يستاهل أفرغ له أو لا؟ وراحيقولون لكم. وإذا مالكم خلق تفرغون، لجنة التفاريغ أظن بتكون شغالة بدفعتكم ف تقدرون تاخذون منهم التفاريغ وأيضًا تساعدون فيهم.
٤- احرصوا على الفهم، والحفظ. مع بعض! فهم بدون حفظ ما يسوي شي وحفظ بدون فهم ما يوكل عيش! الحفظ حرصوا إن يكون بطريقة تسهّل على ذاكرتكم استرجاع المعلومة،ربطوا بشغلات منطقية، وحاولوا تكررون كثر ما تقدرون. التكرار يعلم الشطار.
٥- استخدموا مصادر غير النوت! استخدموا المواقع اللي ذكرتهم لكم فوق KenHub حق الأناتومي وSketchyMicro للمايكرو، أيضًا أي شيء ما تفهمونه كتبوه بيوتيوب.
٦-استخدموا أو حاولوا تستخدمون textbooks وشجعوا أنفسكم على هذا الشيء، بهذا الرابط جمعت لكم الكتب اللي كتبتهم لكم فوق كلهم، بصورهم، تلقونهم بالكويت بمكتبة جريرأو بمكتبة الجمعية الطبية أو من موقع hsbookstore.com وايد أنصح فيه.
٧- لا تتشتتون، لا تتشتتون بالمشاكل والأحداث، حاولوا تكونون مركزين على دراستكم كثر ما تقدرون.
٨- لا تستحون تطلبون مساعدة من أحد أكبر منكم أو من دكاتركم. وحرصوا على سالفة التواصل مع دكاتركم، أي شيء مو فاهمينه روحوا وسئلوهم، وناقشوهم.
٩- رتبوا أولوياتكم، ومو شرط تكون الدراسة الأولوية الأولى! بس هم لا تكون الأخيرة.. رتبوهم من البداية عشان تكون السنة واضحة جدامكم بدون ما تتشتتون
١٠-كونوا منظمين! سوولكم جداول، حفظوا مواعيد محاضراتكم، لا تتعودون عالغياب، خلوا عندكم دفاتر معينة مو كل شغلكم حوسة، اوراقكم خلوهم بفايلات مرتبة، عشان حزةالفاينل كل شي يصير واضح جدامكم وما تضيعون.
١١- اخذوا بريكات. كل جم يوم اخذوا بريك تنفسوا فيه طلعوا استانسوا، مو بريك يعني قعدوا بالكلية ولا تسوون شيء! لا بريك كامل، طلعوا من الكلية، مع أهلكم، روحوا مكانتحبونه وأكلوا أكل يعجبكم، المهم دايمًا عطوا نفسكم البريك اللي يذكركم انكم ليلحين عايشين ومو بس آلات تدرس..
١٢- لا تهمكم الدرجات وايد، حطوا ببالكم إن محد أحسن من أحد وكلنا قابلين للـA والـF بالتساوي، واللي يفرق بينا الاجتهاد مو الذكاء. محد فينا غبي. تذكروا إن كل شيء نصيب،يمكن اجتهدوا والله ما كتب لكم قريد عالي بهالامتحان بس عوضكم بشيء ثاني يخفى عن علمكم، لذلك استودعوا الله جهدكم وتوكلوا على الله ولا يكون القريد أقصى همكم وعمركملا تتضايقون أكثر من يوم على قريد! شدوا حيلكم وخلوا الباقي على الله..
١٣- لا تنسون تسوون باك آب حق فايلاتكم ونوتكم اذا كنتوا تدرسون بالآيباد، تكفووووون لا تضيع نوتكم لأن بتحتاجونهم بالفاينل
١٤- استانسوا بسنة ثانية، حتى لو طويلة ومتعبة، بس تذكروا إنها "سنة"، تبون سنة كاملة من حياتكم تضيع وإنتو تحاتون ومنضغطين؟ استانسوا بكل شيء، حتى بلحظات الضغطاستشعروا قيمة النعمة اللي انتو فيها وتذكروا أهدافكم. لا يعميكم التعب عن روعة اللي قام تسوونه وعظمته❤️
١٥- آمنوا بأنفسكم، وبأنكم تقدرون. أنا عن نفسي أؤنن فيكم جميعًا وأدري الله ما سخر أحد لهالمكان إلا وفيه القدرة لتحمله. هي سنة تحدّي فاخذوها بروح تحدّي، مو روح عذاب!
١٦- تذكروا إني أحب دفعتكم وااايد، وإني موجودة دايمًا لأي شيء تحتاجونه لو شنو كان صغير!
خاتمة ~
قبل ما أبدي خاتمتي،
في جم رابط راح يفيدونكم ماعرفت وين أحطهم بس بحطهم لكم هني:
درايف سنة ثانية دفعة ٢٠١٦
درايف تفاريغ دفعة ٢٠١٦
درايف مشروع القائمة الطبية all in one لدفعة ٢٠١٦
أعتذر على التأخير اللي صار، تأخرت بسبب ظروف منهم صحية ومنهم مزاجيّة للأمانة، وأنا إما أسوي الشيء بشغف كامل، أو ما أسويه. وأنتو تستاهلون الشغف كامل! لإن والله،والله، ماتدرون شكثر أحس بمسؤولية عظيمة تجاه دفعتكم وشكثر أحبها وشكثر ودي أساعدكم باللي أقدر عليه وأكثر!❤️موفقين حبايبي، وبدون ما أوصيكم، أنا دايمًا موجودة، كلموني بأي وقت تحتاجوني فيه🌸
حصّه.
AskFm: https://ask.fm/HISSA99
