السلام عليكم أحباب قلبي اللي صاروا سنة ثالثة
قبل ما أبدي، أبي أقولكم إني فخورة فيكم فرد فرد؛ لأنكم ما خلّصتوا سنة ثانية وتحمّلتوها إلا وأنتو أهل وكفء للياي من مشوار كليّة الطب اللي، عشان نكون صريحين مع بعض، متعب ومرهق. لكنكم كنتوا قدها، وبتظلون قدها!
بهذه التدوينة راح أتكلم باختصار -إي هالمرة بحاول صج أختصر لأنكم كبرتوا وأكيد فاهمين كل شيء وعندكم فكرة- عن سنة ثالثة، بس بإذن الله راح أوضح كل شيء محتاج يتوضّح، واللي عنده سؤال عقب ما يقرأ هالتدوينة لا يستحي يسألني.،
آوتلاين التدوينة/هذي التدوينة راح تحتوي الآتي بالترتيب نفسه:
١-مقدمة، شنو سنة ثالثة؟ شنو تفرق عن غيرها؟ شلون إهي غير عن كل شيء سويتوه قبل؟
٢-من شنو تتكوّن سنة ثالثة؟ شنو لازم نسوّي فيهم عشان نستفيد الاستفادة القصوى؟
٣-امتحانات سنة ثالثة.
٤-حديث وشرح مطوّل عن كل موديول، أهم المصادر
٥-تجربتي الخاصة بسنة ثالثة، ورسالة من القلب إلى القلب لدفعة ٢٠١٧ الغالية.
مقدمة، شنو سنة ثالثة؟ شنو تفرق عن غيرها؟ شلون إهي غير عن كل شيء سويتوه قبل؟~
سنة ثالثة، بالنسبة لي، أحلى سنة دراسية مرّت عليّ بكلية الطب ليلحين. ليش؟ لعدّة أسباب
-تعلمت من أخطائي بسنة ثانية، ف صارت هالسنة أوضح وأحسن بالنسبة لي.
-السنة متنوعة جدًا، وهالشيء يمكن البعض يعتبره سلبية، بس أنا شخص شويّ يمل من الروتين الدراسي وأحتاج شيء يشد انتباهي وأحب أنوّع، وسنة ثالثة نجحت بهذا الشيء!
-متعلقة جدًا بالطبّ أكثر من أي سنة قبلها، سنة أولى كانت حيل علميّة بحتة، ثانية كانت فاونديشن، ثالثة الطبّ الصجي!
-علّمتني الصبر باختصار. علمتني شلون أتحمّل لو شنو زاد الضغط عليّ
-بالنهاية لما خلّصتها، حسّيت بشعور انجاز عظيم والله، إني سويت شيء جبّار!
اعتقاد خاطئ: "الواحد لما يخلّص سنة ثانية يرتاح لأنها أصعب سنة"
❌❌❌
مابي أزعلكم، بس همّ مابي أعشمكم، ترا سنة ثانية كانت "دلع" كليّة الطب والله.
سنة ثانية جدًا سطحية مقارنةً بثالثة، أقل مجهود فيها بينجّح، ومجهود شويّة زيادة كان يخليكم تييبون قريدات عالية.
سنة ثالثة ما تتقارن بثانية، بولا ناحية، مجهودها دبل، كميّتها أدسم بألف مرة، امتحاناتها أصعب، يبيلها مجابل أكثر، قوّة أكبر، وصبر!
وهالكلام مو عشان أخوفكم وأبدي تدوينتي بسلبية، بس عشان أبيكم تبدون قراية وإنتو حاطين ببالكم إنها مو الشيء اللي تصوّر لكم "اهون من ثانية" بس هم مو لدرجة الصعوبة اللي يصورونها لكم بعض الناس. بإذن الله بكتب كل شيء يخص هالسنة، وتركّاتها، وما بتصعب عليكم هالأشياء كثر ما صعبت على غيركم. لما تدشون متوقعين شنو بيكون بهالسنة ومستعدين لها عقليًا ونفسيًا ما راح تكون عليكم صعبة هالكثر، وهذا الهدف الأساسي من تدوينتي. إنكم تستعدون عقليًا ونفسيًا للي ياي عشان ما تخترعون وتسوون زين خلال هالسنة.
بسم الله
من شنو تتكوّن سنة ثالثة؟ شنو لازم نسوّي فيهم عشان نستفيد الاستفادة القصوى؟~
الحين بتكلّم عن أجزاء سنة ثالثة
١-شنو بندرس فيها؟
موديولات modules، بتكلّم عن الترتيب اللي مشوا عليه بدفعتي واللي قبلي، إنتو أظن غيّروا عليكم الترتيب، الموديولات راح تكون:
Hematology/blood أمراض الدم
Cardiovascular system جهاز القلب والأوعية الدموية
Respiratory system الجهاز التنفسي
Endocrine system جهاز الغدد الصماء
Musculoskeletal system الجهاز العضلي الهيكلي
كل موديول راح يكون داخله كل المواد anatomy, physiology, biochemistry, pathology, إلى آخره. وكل هالمواد بتتكلم عن الجهاز اللي تدرسون وكل شيء يخصّه
٢-شنو نوعيّة الـ"كلاسات"؟
بسنة ثالثة راح تاخذون كلاسات متنوعة، يعني بتاخذون:
Lectures & Seminars
أكيد أنتو عارفينهم وعارفين نظامهم، الحضور يساعد بالدراسة وايد مو مثل سنة ثانية، بسنة ثالثة الشرح واضح وزين والدكاترة وايد زينين ويشرحون بضمير، نصيحة حضروا ونوتوا، أول شيء بتحسونه صعب إذا إنتو مو متعودين بس بعدين بترتاحون على هالنظام وبتشوفون الفرق على دراستكم. نصيحتي إن تحضرون، بس يبقى القرار لكم لإنكم أدرى باللي يناسبكم وإنتو بهالمرحلة
Anatomy labs
مو وايد، كل موديول يمكن ٢-٣ ما عدا msk أكثر "تقريبًا ٨-٩"، ضروري تركزون وتكونون دارسين قبلها، حاولوا تنوتون، كتبوا وصف بالورقة لنفسكم شلون الأشياء صايرة، ركزوا عدل! سئلوا الـTAs باللاب عن أي شيء تبونه، حاولوا تستغلون وقت اللاب مو بس تحضرون وتضيعون ساعة من حياتكم وتطلعون!
Pathology labs
بالنسبة لي كنت أحبه جدًا، لإنه عبارة عن cases نناقشهم لين نعرف شنو فيهم! إذا ماكنتوا فاهمين نوت الباثولوجي، مرات باللاب نفسه الناس اللي تشرح يفهمونكم النوت عددل! جد قسم الباثولوجي جبّار بالشرح. نصيحة حضروا أولًا لأن حضور ساعتين مو شويّة، ثانيًا التوقيع لبعض مو مضمون في دكاترة يكونون ماسكين الورقة، ثالثًا لأن الحضور و"الـتـنـويـت" مهمين حق امتحان الأوسبي! امتحان اوسبي باثولوجي عليه نسبة أعلى من الأناتومي، وسهل وحلو! مجرد تكونون حاضرين، دارسين النوت واللاب، خلاص! تمّت المهمة
بالنسبة حق تدرسون النوتة قبل اللاب أو لا، بصراحة أنا ما كنت أدرس، بس كنت لما أحضر أركز عدل؛ وأفهم النوتة وأنا مو دارستها! إذا ودكم تستعدون زيادة، درسوا النوت قبل اللاب، يصير اللاب تثبيت حق الحفظ والفهم بعد.
ولاء، ما يحتاج لابكوت كلّش أدري أول السنة بتسئلون هالسؤال
PBLs
كل موديول بتتغير قروباتكم الـpbl فيه، القروب تقريبًا فيه ١٠-١٢ طالب، كل أسبوع فيه 2 pbls, أول واحد يكون يوم الأحد.. تقرون الكيس، تعرفون شنو المهم منها، وتفهمون شفيه بالضبط
استغلوا وقت الـpbl بإنهم تتناقشون، نظام موديولات سنة ثالثة إن كل ويك يناقش شيء معيّن، ف كيس الـpbl بتكون متعلقة بموضوع هذا الويك! مثال بموديول إندو، الويك يكون عن الغدة الدرقية مثلًا، الكيس يكون عن وحدة فيها خمول بالغدة. كلكم بأول pbl ماراح تكونون تعرفون شسالفة، ف تناقشوا، سئلوا أسئلة، بحثوا. ولو قروبكم قوي، مرّات بتفهمون الويك كامل من أول pbl
🏼.
تشجعوا، قولوا أفكاركم، محد خبير فيكم! عادي إذا غلطتوا، عادي أحد ثاني يصحح لكم، جذي تثبت المعلومة اكثر.
ثاني pbl راح تقدمون فيه تاسكاتكم.
لما تسوون تاسكاتهم، سووهم بضمير، ولما تشرحون، استخدموا السبورة، أوراق، مجسمات استعيروها من قسم الأناتومي، مو بس بوربوينت أو أحد يقرا!
ولما تقدمون تاسكات وتحسون شيء مو واضح سئلوا بعض. في ناس شرحهم بتاسكاتهم أقوى من الدكاترة نفسهم، ركزوا معاهم وسئلوهم. لا تستحون من بعض بالعكس أنتو موجودين عشان تساعدون بعض!
لا تشوفون تجربة الـpbl إنها شيء مغصوبين عليه، وإن لو فاتكم توقيعين تعيدون السنة، شوفوها فرصة active learning وهي الفرصة الوحيدة اللي چذي طول السنة. الباجي كله قاعدين وأحد يشرح لكم وأنتو سرحانين. استفيدوا من الـpbl كثر ما تقدرون
ولما الدكتور يقول ملاحظات/معلومات يطلّعهم من أوراقه، نوتوهم.
مرّات يكون في أسئلة من الـpbl بالامتحان. إذا دكتوركم طيّب قولوله إن تبون تصورون منه أوراق الـpbl اللي عنده، ودزوهم للدفعة يستفيدون.
Clinical skills sessions
الپارت من سنة ثالثة اللي يحسسكم إنكم صج طلبة طب.
راح يكون الوضع إن تتقسم الدفعة لقروبين كبار
كل قروب يتقسم مرة ثانية حق قروبين أصغر
مثال:
Group 1 and group 2
Then groups 1A, 1B and groups 2A, 2B
وكل واحد من هالقروبات داخله قروبات صغيرونة بعد فيهم ٥-٧ طلبة هذولا بيصيرون ربعكم طول السنة
️
الكلينكل سكلز پارتين
پارت بالكلية على مرضى مو صجيّين
وپارت بالمستشفيات (أميري أو مبارك)
الأسبوع اللي يكون فيه group 1 بالمستشفى، group 2 راح يكون بالكلية، وتبدلون الأسبوع اللي وراه
انزين قروب 1 قلنا فيه قروبين صح؟ A and B مو؟
A=amiri
B=mubarak
وبعدين تبدلون مع بعض عقب اسبوعين
يمكن حوسة شوي بس والله ماعرف أشرح أوضح من جذي مع الوقت بتفهون شالطريقة وكل أسبوع بيحطون اللستة وكل واحد وين يروح ف راح تفهمون شالطبخة محد راح يضيع.
بالمستشفيات في توقيع وهذولا الأماكن اللي توقعون فيهم:
مستشفى الأميري:
أول ما توصلون روحوا الاصنصيرات, صعدوا الدور الثامن، لما توصلون الدور الثامن روحوا يمين، في غرفة داخل توقعون فيها ويكون في ريّال ماسك الورقة.
مستشفى مبارك:
طلعوا من بوابة ٨، لا تدشون مستشفى مبارك القديم، يساره في مبنى يديد لونه أسود، دشوا منه وبتلقون مكان التوقيع، ويدلّونكم ترا العمّال لو تسئلون
كلينكل الكلية:
راح يكون في مرضى چذبيين simulated patients يعلمونكم عليهم:
١-شلون تسوون فحص سريري physical examination يخص السستم نفسه، مثلا فحص القلب غير عن فحص الجهاز التنفسي.
٢-شلون تاخذون هستري، تكون غالبًا مجموعة كبيرة والدكتور يسأل إذا في أحد يتطوّع ياخذه.
٣-يشرحون بوربوينت حق بعض الشغلات eloops مهمين حيل حق الأوسكي.
نصايح بالكلينكل:
نصييييحة: نوتوا!!! عشان ما تتوهقون بالأوسكي، يعني جذي شرحوا حق نفسكم شلون الدكتور كان يقول/يشرح، كان يسوي الـexamination, شنو الخطوات. خلوا معاكم دفتر صغير، بالذات بالمستشفيات، سالفة تاخذون هستري بتليفونكم في دكاترة ما يحبونها ويشوفونها not professional.
وحاولوا تبادرون وتطبقون، إذا في هستري حاولوا تاخذون، إذا في examination قولوا للدكتور نبي نجرّب، جذي تزيد ثقتكم بنفسكم لي وقت الأوسكي. لا تستحون ولا تقولون "اوه بعدين نسوي" لا لأن اللي يصير إن بعدين كل شي يتراكم ويدش ببعضه وتخترعون
إذا عندكم وقت خلال الموديول بطلوا كتاب Macleod's واقروا عن السستم وجذي، أنا ماكنت أسوي جذي كنت أكتفي بالڤيديوات وقراءة سطحية بقوقل قبل الكلينكل، بس كان في ناس يسوون حركة الكتاب وتفيدهم، فعادي شوفوا شنو يناسبكم..
امتحانات سنة ثالثة
الحين عرفتوا من شنو تتكون سنة ثالثة؛ أكيد تبون تعرفون شنو يبون يختبرونكم عليه بالضبط؟
ف راح أقولكم باختصار
End of module exam
كل موديول تخلصونه تمتحنون عليه امتحان
كل امتحان عليه نسبة "ما يقولون جم بالضبط" بس الكبار قالولنا إن هذي النسبة "التقريبية" حق كل موديول
Blood 5.5%
CVS 7.5%
Respiratory 7.5%
Endocrine 7.5%
MSK 7%
التوتل لازم يكون ٣٥٪ من درجات السنة،
جم "بالضبط" حق كل موديول تسئلون د. اقبال أحسن بس فوق النسب التقريبية مثل ما قلت لكم.
الامتحان راح يحتوي كل شي خذيتوه ماعدا اللابات.
حتى كلينكل وpbl ممكن يكون منهم اسئلة بالامتحان.
OSPEs
كل اوسبي عليه ٥٪, وعندكم امتحانين
يعني توتل ١٠٪
احنا واللي قبلنا كنا:
OSPE I = blood, CVS, respiratory
OSPE II = endocrine, MSK
المواعيد يحددونها لكم، بس غالبًا بنهاية كل كورس.
الأوسبي راح يكون قسمين قسم اناتومي وقسم باثولوجي كل واحد بيوم بروح
Anatomy 2.3%
Pathology 2.7%
Total 5%
أوسبي أناتومي
امتحان المشرحة اللي متعودين عليه
الأسئلة مو حيل مباشرة مثل ثانية يعني لازم تدرسون النوت مع اللابات مو اللابات بروحهم ويحبون سؤال what’s the function
باثولوجي الامتحان بالـpc labs تحت.
اسئلة الامتحان بتكون بالكمبيوتر mcqs ويكون عندكم ورقة تظليل وتظللون اختياراتكم.
الامتحان يندرس من اللابات + الـنـوت اللي تتعلق بهاللابات! تكفون لحد يجذب عليكم ويقولون لكم لابات كافي وأنتو تصدقون وتدشون تنصدمون! تكفون.
في نوت باثولوجي ما عليهم لابات، هذولا ماله داعي تدرسونهم للامتحان، وسئلوا الcoordinator عشان تتأكدون من هالمعلومة.
وطبعًا بالامتحانين تحتاجون تلبسون لاب كوت ولبس رسمي وباقي الأمور المعروفة.
Final exam
أكثر پارت صعب علي أكتبه، بيوم من الأيام كان يشكل هالامتحان "المهمة المستحيلة" لإنه عبارة عن كمية كل السنة بامتحان واحد، ومو نفس ثانية مقسمين كل موديولين بامتحان. ف كان هالشيء صعب وايد، وكان لازم الواحد يرتب أولوياته عدل بالدراسة.
فاينل سنة ثالثة ما يتقارن بفاينل ثانية والله. كلّش.
عن تجربة، اللي دارس عدل طول السنة ارتاح وقت الفاينل، واللي كان يلعب وقاط نوت وايد كان على اعصابه ومو عارف شنو يرقع وشنو يخلي. لذلك حرصوا تدرسون عدل خلال الموديول نفسه ولا تقطون إلا اللي صج يسوى ينقط، لإن وقت الفاينل يا دوب يكفي مراجعة وتمرون عالموديولات كلها مو دراسة دراسة من أول ويديد.
الامتحان بيكون بيبر ١ وبيبر ٢،
Paper 1 MCQs
Paper 2 EMQs
وكلهم نفس الكمية "الموديولات كلها"، ويكونون ورا بعض. مثلا أحد وأثنين، جذي. مافي بريك.
والله وماراح أجاملكم التجربة ماهي سهلة كلش. ف اشتغلوا طول السنة عشان هاليومين اللي بيحددون مصيركم.
وصج مع إنها تجربة صعبة نفسيًا وجسديًا وكل شيء، إلا مقدور عليها بالاجتهاد طول السنة+استغلال وقت الفاينل عدل قبل الدراسة وتحديد الأولويات!
وجد جد شعور لما تخلصونه ما يتضاهى بأي شعور ثاني. جنه جبل شكبره وتسلقتوه ووصلتوا للقمة! تحسون لما تخلصون فاينل سنة ثالثة، كل شي بعينكم يهوون وتحسون كل شي مقدور عليه وهيّن.
نصايح لوقت الفاينل:
صكروا اذنكم عن بعضكم لإن غالبًا بتكونون منهارين وبتضايقون بعض بالاحباط
حطوا ببالكم إنه doable
استغلوا وقتكم عدل ولا تضيعونه
درسوا فارما أكثر من مرة لأنه مضمون "أنا ماسويت جذي وكليتها".
طول السنة حضروا لهالامتحان قبل ما تحضرون لامتحان الموديول نفسه، سوولكم سمريّات وتلاخيص؛ شرحوا بنفسكم السلايدات باختصار بجملتين جذي عشان لا ييتوا تراجعون حزة الفاينل تقرون اللي كاتبينه وتروحون للي بعده ما تضيعون وقت.
وحافظوا على صحتكم الجسدية والنفسية، ناموا عدل واكلوا زين
وأنا واثقة فيكم
OSCE ️
للأمانة، على كثر ما كنت خايفة و”متصرقعة“ منه، وكنت طول السنة أحاتيه وشايلة همّه، بس والله كان يونس وتجربة حلوة.
الامتحان التحضير له مو حيل سهل لأنه ٥ موديولات مع بعض وبجانب العموم كان مهمله طول السنة وهو الكلينل، مو لانهم مهملين بس لأن already ضغط فماعندنا وقت ندرس له أول بأول.
ويحتاج تدريب. تدريب. تدريب. تدريب
إي نعم،
تدريب
تدريب تاخذون هستري بسرعة
تدريب تسوون examination بسرعة
وتدريب تحلون بسرعة.
الامتحان ستيشنات وكل ستيشن لكم فيه ٥ دقايق تسوون المطلوب منكم
الامتحان يكون من ٣ أشياء
Physical examinations
History taking
Eloops
أولًا: physical examination
كل شي محدد وprecise يعني ما يقولوكم سووا CVS examination وخلاص! لا يحدد لكم شنو يبي بالضبط، مثلا أبيك يا طالب تفحص هالشغلة وهالشغلة.
وبعدها، الدكاترة عندهم اسئلة يسئلونكم اياهم وانتوا تجاوبون عليهم.
وكل خطوة وكل كلمة عليها درجات.
وعن تجربة، الـ٥ دقايق اللي كنت خايفة منهم كانوا more than enough, سويت الفحص فيهم، وجاوبت على الأسئلة ومرات كنت أقعد ارتاح شوي لي الستيشن اللي عقبه
شلون كل هذا؟ بالتدريب. كنا أنا ورفيجاتي نتيمع بالكلية ونتدرب examination على بعض لي بالليل، وصج هذا اللي فادنا، كنا نصحح حق بعض، ونساعد بعض، ونذكر بعض بالأشياء اللي كله ننساها.
شلون ندرس examination؟
١-كتاب Macleod's إذا عندكم وقت. كومسا كانوا مسوين سمري حق الكتاب وكان يختصر الوقت.
٢-ڤيديوات Macleod's موجودين بيوتيوب
٣-بوكلت طبية مال الphysical examination وايد فادني بعد.
٤- موقع وأبليكيشن geeky medics بس يبقى macleod’s مرجع الكلية
٤-دورة كومسا للأوسكي
٥-وللمرة المليون، التدريب.
ثانيًا: history taking
راح يكون في ناس تاخذون منهم هستري بالامتحان، تسئلونهم اسئلة وتكتبون كل شي يقولونه لكم
هذي عاد مهارة، ليش؟ لإن لازم تعرفون شنو تسئلون بالضبط.
عقب ستيشن الهستري في ستيشن اسئلة تخص الهستري اللي توه خذيتوه، مثلا ممكن يسئلونكم: "شلون المريض وصف ألمه؟"
عشان جذي لازم تعرفون شنو تسئلون+شلون تسئلون+بسرعة.
شلون تكتسبون هالمهارة؟
١-تدريب، تدريب، تدريب، دايما بالمستشفيات تطوعوا تاخذون هستري وبالكلية بعد ولا تستحون.
الكيسات اللي يشرحونها تحت تلقونها بدرايڤ السنين اللي أكبر منكم، تقدرون تاخذونهم وتتدربون عليهم.
شتسوون بالكسيز؟ بوقت دراسة الأوسكي
تقرون الكيس
تشوفون الاسئلة اللي تحت الكيس واجوبتها
تعرفون شنو المفروض تسئلون عنه بالضبط "تخيلوا المريض جدامكم، شنو شغلات حسيتوها مهمة وكان المفروض تسئلون عنها عشان تتوصلون لحلول بعض الأسئلة اللي موجودة تحت؟
ويعني.. تقدرون تسوون انتو واصدقائكم تدريب هستري مع بعض
وترا مو شرط تتكرر.. يمكن من هذي الكيسات اللي شكثرها، بس كيس وحدة تتكرر أو ولا كيس.
طبيعي.
الهدف منهم أهو التدريب وإن تعرفون نمط الـcases واسئلتها بالامتحان، مو إن تحفظونها وتتوقعونها كوبي بالامتحان كلش لا.
ثالثًا: آخر جزء من الامتحان eloops
اسئلة بتكون على الكمبيوتر وتجاوبونهم بالورقة اللي عندكم.
والاسئلة تيي من سلايدات البوربوينت اللي يشرحونهم لكم تحت
لازم تدرسونهم عدل وتعرفونهم+ تدرسون هالسوالف:
ECG and how to read it, this summary is done by Salman AlOtaibi and it's really helpful.
Chest x-ray and how to read it
Salman AlOtaibi made PowerPoint slides in which he explained everything related to chest x-ray and it was SO HELPFUL!!
اسئلة الامتحان ما طلعت منه!
وقت الاوسكي راح يدزون لكم إيديوسوارم التفاصيل شلون تشتركون وجذي، وأنصحكم فيه جد والله مو حسافة كلش كلش!
بشكل عام الـeloops ٩٠٪ منهم من سلايدات الكلينكل و١٠٪ من المنهج نفسه خلال السنة، وبتكونون توكم خالصين الفاينل ف المعلومات بمخكم ليلحين وسهالات إن شاء الله.
التوتر قبل الاوسكي طبيعي. بس حاولوا تهدّون نفسكم ولا تخلون التوتر يخرب كل تعبكم. دشوا الستيشنات بثقة وابتسامة وبتشوفون شكثر هالشي راح ينعكس على أدائكم
الحين بتكلم لكم عن موديولات سنة ثالثة، بخلي الكلام عنهم باختصار والمهم بس، وتكون كمرجع تردون له قبل ما تبدون أي موديول.. ~
قبل ما أبدي، أبيكم تعرفون إني قام أفرض إنكم already عندكم كتب تدرسون منها لبعض المواد ومصادركم الخاصة، بس لو في شيء حسيته special وفادني جدّ بكتبه لكم، حطيت لكم كتببمدونة سنة ثانية إذا تذكرون، واللي ما شراهم وهالسنة حاب يشتري كتب ويبدي يقرأ "وهالشيء أنا أنصح فيه" هذا الرابط في صور كل الكتب المهمة:
وعمومًا، كتب usmle والـreview books يفيدون جدًا حق أي مادة فأخذوا اللي تحبونه، وحق المواد الباجي أي كتاب يريحكم نظامه اعتمدوه "وتقدرون تغيرون خلال الموديولات"
الموديولات مثل ما قلت فوق ٥، راح أتكلم عنهم بالترتيب اللي مشى على دفعتي، إذا ترتيبكم غير عاادي ماتفرق
(1/5) Blood module - hematology
من أحلى وأسهل الموديولات.. القريد العالي فيه سهل جدًا والله. وايد حلو، قصير، وممتع. وسهل! سهل سهل. وتتعلمون منه وايد أشياء.
يتكون من ٥ أسابيع، لذلك حاولوا تبدون فيه ويك ١ أو ويك ٢ مو متأخر أكثر، عيب هالموديول إنه يكون ببداية السنة مع حوسة الانتخابات وكل شيء، ولما تخلص الانتخابات يبقى تقريبًا أسبوع-١٠ أيام عالامتحان! يعني كلش ما يمدي.
كل أسبوع يتكلم عن موضوع معين، مثلا أول أسبوع عن الأنيميا الغذائية، ثاني أسبوع عن نوع ثاني من الأنيميا، وهمن راح يتكلمون عن سرطانات الدم، وهكذا.
بكل نهاية أسبوع الكوردينتر د. صلاح الحمود يسوي wrap up session يوزع فيها عليكم أسئلة ويعطيكم چذي نص ساعة تحلونهم، وبعدين يرد ويناقش معاكم الأسئلة وليش جاوبتوا جذي وليش استبعدتوا چذي. وايد مفيدة وأنصح بالحضور! بس ديربالكم لا تورونه إنكم شطار بزيادة يمكن تاكلونها بالامتحان شوي
المصادر اللي فادتني:
١-يوتيوب، أي شي ماأعرفه ألقاله بيوتيوب شرح.
٢-كتاب first aid usmle step 1 مختصر چم كونسبت، يفيدكم بهالموديول وغيره
٣-بروجكت إكس project x - سلمان العتيبي مع إيديوسوارم. وايد مفيد حق الـimportant exam points. أنا شخصيًا استخدمه للمراجعة قبل الامتحان "بويكند الامتحان" وفادني يعني بتجميع الأفكار "تجميع الأفكار مهم جدًا بهالموديول". وحتى لو تبون تدرسون منه أيضًا مفيد، سلمان الله يعطيه العافية كاتب أغلب الأشياء المهمة.
٤-كتاب باثوما، يرتب الأفكار جددًا خصوصًا بأنواع الأنيميا وسرطانات الدم!
🏼
٤-راجعوا أسئلة الـwrap up session. الأسئلة أصعب من مستوى الامتحان بوايد، فلو عرفتوا تحلونهم يعني أكيد بتعرفون تحلون الامتحان عدل
وبس تقريبًا!
الأشياء الحلوة بخصوص هالموديول
قصير، واضح، معلوماته نشوفها بحياتنا اليومية "أنيميا وچذي"، المحاضرات ممتعة وأغلبها "٨٠٪" پاثولوجي. الموديول مرتّب بطريقة عجييبة ومفهومة. امتحانه يعتبر أسهل من باجي امتحانات السنة.
الأشياء الموحلوة "شوي يعني"
قصير وببداية السنة، يعني إذا نظامهم تدخلون بجو الانتخابات حيل، يمكن تتأزمون شوي حزة الامتحان. وبس هذي السلبية الوحيدة!
نصائح خاصة للموديول:
١-الحضور حلو ومفيد
٢-كيسز الـpbl حلوين حاولوا تفهمونهم وتربطونهم بالويك
٣-حاولوا تبدون دراسة مبچر وأول بأول
وهذا كل شيء يخص بلود
(2/5) Cardiovascular system
بالنسبة لي أحلى موديول بسنة ثالثة. بالنسبة لغيري أكره موديول بحياتهم
ف يعني، يمكن أكون متحيزة شوي وأنا أكتب عنه.
كارديو غير عن كل شي درستوه/بتدرسونه، الفيسيولوجي اللي بتاخذونه عن القلب والقلب شلون يشتغل يبيله مخ شغّال ومركز ومستمتع! والله وايد حلو الموديول بس يبيله وقت وجهد وتركيز.
أنا عن نفسي عشقته مو بس حبيته، كنت صج أدرسه وال مستانسة حييل.
الموديول كان على دفعتي بعد بلود مباشرةً، أنتو أتوقع غيّروا عليكم الترتيب؟ مادري والله.
بهالموديول راح تدرسون كل شيء يخص القلب والأوعية الدموية، ،حتى تخطيط القلب وشلون تقرونه
أناتومي
فيسيولوجي
بيوكمستري
پاثولوجي
فارماكولوجي
وهالمواد،
ومادة يديدة شوي.. كلينكل مدسن.
فيسيولوجي:
إذا ترتاحون لكتاب فيسيولوجي معين استخدموه، عادي يعني، مافي شيء معين أو بيعطيكم معلومات زيادة عن الثاني
ڤيديوات يوتيوب جبّارة
محاضرات د. نجيب تحصلونه بموقعه أو بيوتيوب
دورات عمر العثمان مع إيديوسوارم مفيدين جدًا ويختصرون عليكم وقت دراسة النوت، جربتهم وفادوني.
أنتو شوفوا شنو يناسبكم ويناسب وقتكم وكل شيء بالنهاية راح يوصل لكم المعلومة بس بطريقة غير. الفيسيولوجي أكثر مادة بتاخذ منكم وقت أثناء الدراسة بس عن نفسي كانت أكثر مادة أستانس وأنا أدرسها -مع الپاثولوجي طبعًا-
*ملاحظة، راح تاخذون سيمنارات فيسيو، هذولا مهمين وداشين بالامتحان ويندرسون حالهم حال النوت
🏼
پاثولوجي:
كتاب باثوما my top 1 مع الڤيديوات ملوته، يفيد حق كل الموديولات! جد جد جبّار
إذا ودكم تتوسعون اكثر وعندكم وقت، كتاب روبنز بعد وايد حلو.
كلينكل مدسن:
راح تاخذون محاضرة وحدة بالأسبوع تخص موضوعه، مثلًا هالأسبوع عن ارتفاع ضغط الدم؟ المحاضرة عن ارتفاع ضغط الدم. مهمة المادة مهمة مهمة مهمة. والدكتورة اللي تشرح شرحها عجيب. التفريغ نوعًا ما مهم. في تلخيص يوزعونه القائمة الطبية بعد وايد مفيد حق الدراسة/المراجعة/الفاينل.
الامتحان غالبًا بيركز على الثلاثة مواد اللي ذكرتهم فوق، إحنا امتحانا كان mainly pathology. وفي دفع أكبر منا كانوا يركزون هالفيسيو، أو كلينكل مدسن، أو نص نص، ف هالمواد يعني حرصوا عليهم وحاولوا ما تقطون منهم نوت.
المصادر المهمة ذكرتهم فوق عند كل مادة،
نصائح خاصة بموديول كارديو:
١-صكروا اذنكم عن كل الناس اللي يذمون الموديول. ماأجذب عليكم الموديول صعب ويبيله، بس والله العظيم صعوبته تقابله ١٠ مرّات متعة لو تفهمونه. صج متعب، ويبيله مجابل، بس جد يعني إحنا كطلبة شنو عندنا مسؤوليات غير الدراسة؟ ف خلاص يعني. الحلطمة الزايدة والدراما ما تنفع ولا بترفع قريدكم . سووا اللي عليكم، استمتعوا وإنتو تدرسون، وابدوا دراسة مبچر ولا تراكمون، وبتسوون وايد زين!
٢-بطلوا كتب، وتوسعوا بالفهم.
٣-ركزوا على المواد اللي كتبت عنهم فوق
٤-ابدوا حل امتحانات مبجر عشان تعرفون مستوى الامتحان وتستعدون له عدل، عمومًا بسنة ثالثة ما تتكرر أسئلة وايد فمو هذا الهدف من الامتحانات، بس اخذوا فكرة عن المستوى بشكل عام.
شدوا حيلكم فيه+ركزوا وصدقوني بيكون عليكم أسهل مما يقال لكم! والله جد جد ممتع وحلو والكلينكل ماله بتشوفون cases وايد مرتبطة باللي تدرسونه، جدًا بتستمتعوون
(3/5) Respiratory system
الجهاز التنفسي
الموديول نوعًا ما حلو وممتع، شخصيًا ما كان المفضل بالنسبة لي، لأنه كان بعد كارديو وأنا كنت حيل أحب كارديو ف زعلت شوي لأني خلصته؟ يمكن بالمقابل اللي حولي حبوه وايد ورفعوا فيه درجاتهم. الموديول متنوع، وفيه وايد نوت واايد وهذا عيبه الوحيد.، يبيله مجابل ودراسة أول بأول عشان ما يتراكم لأن كميته كبييرة.
المواد المهمة، بهالموديول؟ كل شيء! حرفيًا كل شيء.
فيسيولوجي يبيله نوعًا ما
أناتومي بعد
مايكرو إذا دارسينه بسنة ثانية عدل بيكون عليكم سهل، بس بالحالتين يبيلكم تحفظونه عدل!
پاثو،
بتاخذون بعد محاضرات كلينكل مدسن بس سئلوا الكوردينتر إذا في عليهم أسئلة الامتحان أو لا، دفعتنا كان ما عليهم أسئلة.
المصادر:
كل شيء ما تعرفونه، يوتيوب!
كتاب باثوما حق الباثو
كتاب berne and levy physiology مدح لي إياه د. زوران، وفعلًا فادني. حصلته أونلاين.
محاضرات د. نجيب حق فيسيو
إيجابيات هالموديول إنه متنوع ف يونّسكم. سلبياته نوت وااايد وليرننق توبكس ولابات والجدول كلّه مزحوم!
بس بشكل عام، مقدور عليه، ودرجات الطلبة ترتفع فيه وااايد
(4/5) Endocrinology
هالموديول بالذات، وايد حلو، ووايد خفيف عالقلب! كل شيء فيه مرتب. تحسون مخكم وأنتو تدرسونه مثل المكتبة كل شي موجود بمكانه الصح! مو حوسة أبدًا، كل ويك يتكلم عن غدة معينة، الأناتومي مالها، شلون تشتغل وشنو الهرمونات اللي تطلعها، الامراض اللي تحوشها، وهكذا حق كل غدة، الموديول جدًا جدًا ممتع وحلو، أنا أحبه عقب كارديو على طول من كثر ما أهو عجيب
نصيحة حاولوا تدرسونه أوّل بأول، كل ويك بويكه، عشان تترتب أفكاركم خلاله وتسوون زين..
المصادر مكررة من باقي الموديولات، وأنتو شوفوا شنو تحتاجونه وتوسّعوا فيه أكثر لين تفهمونه عدل.
الموديول يبيله فهم وترتيب أفكار.
الفارما تعتبر من أصعب الشغلات بهالموديول، ليش؟ لأن الأسامي شوي صعبة+وايد أدوية ووايد منهم يسوون نفس الشيء. الدرق لست طويييلة جدًا. والنوت اللي يسويهم الدكتور مافيهم كل المعلومات، فلازم تفرغون/تنوتون.
الفارما بهالموديول يبيله جهد وتكرااار وتأليف قصص شوي، بس مقدور عليه.
هالمديول دفعتي واللي قبلها يابولهم فيه أسئلة من الـpbl وايد، فحرصوا تعرفون منه المعلومات المهمة.
مثل ما قلت لكم، درسوه أول بأول عشان يثبت.
حرصوا عالفهم العميق، لا تسلكون بالمعلومات! توسعوا بالفهم وعمقوه بالقراءة والڤيديوات والأسئلة..
الامتحان يمكن البعض يستصعبه لأن أسئلته تختبر الفهم جدًا، ف يبيله مثل ما قلت لكم، أحد فااهم. وأتوقع إني وصيتكم عالفهم مليوون مرة بهالفقرة
ومن كثر ما هالموديول بسيط وواضح، حرفيًا هذا كل شيء عندي أقولكم عنه! وصدقوني بتحبونه وايد لما تدرسونه، لأنه جد حيل ممتع والله. بتشوفون بنفسكم
(5/5) Musculoskeletal system - MSK
عن نفسي، ما كان المفضّل بالنسبة لي إطلاقًا، لإنه حفظ حفظ حفظ. يعني الموديول فيه أناتومي شكثرر، وأنا الأناتومي مو مادتي المفضلة. أنا أفضل الفهم وأتوقع عرفتوا هالشيء لأن كارديو وإندو كانوا my favorites ; بس ماعلينا. على الرغم من الحفظ الكثير اللي بـmsk إلا إنكم راح تستانسون حيل لما تشوفون شكثر معلومات راح تعرفونها وتفهمونها عن عظامكم، عضلاتكم، مفاصلكم. هالشيء حيل يونّس! نوعًا ما يعني
الموديول يبيله شدّة حيل أقوى نوع، ومذاكرة أول بأول خصوصًا الأناتومي، نوت الأسبوع تندرس بنفس الأسبوع، ليش؟ عشان ما تروحون المشرحة إلا وإنتو دارسينهم.
فأول وأهم نصيحة:
درسوا نوت الأناتومي قبل المشرحة، دايمًا.
نظام المشرحة بـmsk مو TA يشرح لكم وچذي، لا. قروباتكم تمشي بالستيشنات، ويكونون حاطين labels على العيّنات، وأنتو تعرفون/تجاوبون عالأسئلة اللي بالـhandouts عندكم
Identify
What’s the function
Relationship with other structures
Innervation
Blood supply
Etc
هالشغلات مهم تعرفونها، بكل ستيشن حاولوا يكون قروبكم متعاون، وتعلمون بعض وتشرحون حق بعض.
الـmnemonic جدًا راح يفيدونكم بالأناتومي. جدًا. وحاولوا أحد من قروبكم يكون عنده الأطلس خلال المشرحة بعد هالشيء وايد راح يفيدكم.
مصادر تفيد للأناتومي بـmsk
-كتاب moore, بس عيبه إنه طويل وبياخذ وقت. بس حلو ويفهّم
-قناة دكتور نبيل ابراهيم يوتيوب nabil ebraheim
-موقع teach me anatomy جبّااااار وفي منه أبليكيشن حق الآيپاد TMAnatomy
-أبليكيشن complete anatomy عجيب جد جد جد. يوريكم شلون العضلة تتحرك ويفهمكم الـfunction مالتها عدل.
استخدموا الـflash cards وايد راح يفيدونكم بالتذكر، ومثل ما قلت لكم الـmnemonics!🏼🏼
حاولوا تدرسون الأناتومي عدل من الموديول حق الأوسبي، لأن وقت الأوسبي يادوب بتراجعون، فحاولوا دراستكم من البداية تكون قويّة وحفظكم قوي. والدراسة بقروبات تساعد شويّ بهالموديول، حلو جذي تقولون حق بعضكم الـmnemonics اللي تعرفونها، أو مثلا تريك عشان تصيدون شيء معيّن بالمشرحة، يعني
باقي مواد الموديول عاديّة وتندرس حالها حال أي شي ثاني..
وفي نوتة كلينكل مهمّة تاخذونها بأوّل ويك راح يشرحها لكم د. علي جراغ، هذي مهمة لامتحان الموديول+الأوسكي. ركزوا عليها، فرغوها، درسوها أكثر من مرة، فهموها عدل، أهم نوتة بالموديول كله.
الـpbl وايد مهم، وإيي عليه أسئلة بالامتحان.
الكلينكل وايد مهم بعد، وإيي عليه أسئلة بالامتحان.
إذا خذيتوا الموديول بجدية من البداية، وجابلتوه، وحفظتوا عدل، هني صج راح تستفيدون منه، وتستانسون. وصدقوني مافي شيء مستحيل!
وبچذي خلصت كلامي عن الموديولات
حديث من القلب إلى القلب ~
الحين أقدر أقول إنكم خلصتوا التدوينة، بس اللي حابّ يقرأ البقيّة اللي بتكلم فيه عن نفسي شويّ وشويّ كلام ”من القلب إلى القلب“، يكمّل.
سنة ثالثة حرصت فيها على شغلتين:
١-أفصل الدراسة عن حياتي
٢-أستمتع بالتجربة، مو بنتائج التجربة
الأوّل نجحت فيه، فصلت حياتي عن الدراسة تمامًا. لو تلاحظون، السنة اللي فاتت ما نزلت بتويتر، أو بأي مكان ثاني، أي شيء يخص الكلية ودراستي ووضعي الدراسي، وما تكلمت طول السنة عند أحد بخصوص دراستي، ولا طلبت مساعدة دراسية أبدًا. وهالشيء فادني من ناحية إني اعتمدت على نفسي أكثر، وتقوّيت أكثر بإني دايمًا كنت أحاول أحل مشاكلي بروحي وأشوف شكثر قوّة تحملي
الثاني، فادني حيل بإني خلّيت أولوية الاستمتاع بالشيء فوق إني أنطر نتايج تساوي التعب والبذل.. لأن الحياة مو چذي بولا شيء. طول هالسنة، ما بيوم اهتميت بقريد، أو چم يبت. كنت بس أشوف ورقة القريدات عشان أتأكد إني i passed وبالسيف سايد. وبس هذا كان المهم بالنسبة لي. مو الشيء المثالي اللي يعتقده/يسويه الشخص، بس هالشيء شال عنّي سترس التوقعات. شال عنّي سترس إني أحاتي شغلات مو بإيدي فعليًا!
بالكلينكل، كنت أحرص إني قبل ما أتعلم الشغلة كعلم، أتعلم الأخلاق. كنت أحرص عالـethics وايد وأنا بالمستشفى، وإن ضروري أربي نفسي عليها من بالبداية، ليش؟ لإني مو مثالية.. مابي تاخذني موجة العلم، وأنسى الأخلاق لما أوصل لمكان أحتاجه أكثر شيء.. إحنا بشر، وننشغل، وننسى. كنت أحس أو غصب أحسّس نفسي بالمسؤولية بكل مرة أدخل فيها المستشفى، وهالشيء ما خلّا تجربتي بالكلينكل "ونااااسة" وقلّل المتعة، بس عالأقل عرفت حجم الشيء اللي أقبلت عليه.
تعثرت كثيير، إي والله تعثرت كثير، وهالشيء نوعًا ما زعلني لإني كنت أتحجج بسنة ثانية بإني توني وماأعرف شسالفة، بسنة ثالثة بصير أحسن بس لاء، للأسف في شغلات صرت فيها أسوأ. بعدين استوعبت.. لحظة، منو قال إن تطوّرنا يكون بالنجاح وبإن الأمور تصير أحسن؟ إحنا حرفيًا نكبر وننضج عن طريق الخطأ.. إي والله، الخطأ.. إحنا كائنات تتعلم المشي الصحيح لما تتعثر، وهالشيء خفف شعوري بالذنب والتقصير بكثير أحيان.
على الرغم من إن الظروف ما كانت الأفضل طول السنة، بس كنت دايمًا أحاول أسوي أفضل شيء عندي. ومرات أفضل شيء عندي يكون ولا شيء عند الشخص الطبيعي، بس كنت أحاول. وشعور إني "أحاول" كان يراضيني لما أحس بالذنب بعدين. المحاولة -وحدها- وإنت بأضعف حالاتك، تكون أكبر من أعظم انتصاراتك!
يمكن هالكلام مو بس أنا مريت فيه، يمكن غيري بعد مر فيه، يمكن أحد منكم يمر فيه، فمابي أحد منكم يحس بالذنب، أو يتوقع الأحسن من نفسه كل ما يكبر، لا، عادي. كونوا زينين وطيّبين مع نفسكم ولا تجلدون ذواتكم بزيادة، وللمرة المليون: استانسوا بالتجربة
وككلمة أخيرة، من القلب إلى القلب يا أحباب قلبي، أنا واثقة فيكم جدًا، وأدري كل شخص منكم يستحق النجاح، والتطوّر للأحسن، وإنه يصير أقوى. أؤمن فيكم جدًا فرد فرد. وواثقة اللي بيعوّض بسنة ثالثة بيقدر يعوّوض، واللي بيصير أحسن بيصير أحسن! وطبيعي إذا بتتعثرون، وطبيعي إذا بتضيعون الطريق مرات، وطبيعي إذا الأمور ما مشت مثل ما تبون، وطبيعي إذا مو كل شيء انتهى بالنجاح.. لأن الأهم من كل هذا..
التجربة.
حصّه
٢٩ أغسطس ٢٠١٩
٢:٤٦ ص
If you have any questions, or ever need anything, contact me via:
