دليلك للسنة التمهيدية في كليات مركز العلوم الطبية (طب بشري - طب أسنان - صيدلة) - دفعة 2017

بدايةً، أهنئكم جدًا على قبولكم. وأبارك لكم هذا الوصول لهذا الهدف العظيم اللي أغلبكم يفكر فيه من سنين والحمدلله ربّي ما خسر تعب ولا سهر ولا دراسة. الطريق الياي مو سهل، لكن يسوى. مو صعب، لكن يبيله أحد يتعب معاه، حاولت أنقل لكم تجربتي الخاصة في هالسنة من كل النواحي بالتفصيل لإني بيوم من الأيام كنت بمكانكم أحتاج أحد ينقلها لي بصورة تفصيلية دقيقة. ماراح أطوّل عليكم بالكلام لإن التدوينة طويلة أصلًا! ولو تبون تعرفون عن تجربتي بسنة أولى أكثر, هذي التدوينة كتبتها بخصوص هذا الموضوع بعد. أولى العتبات السّبع. 

بعدها اخذوا نفس عميق, وبأجواء هادية ورايقة اقروا هالتدوينة بتركيز. أدري والله طويلة وايد بس حاولت إني أقسّم لكم إياها عدل بحيث لو ودكم تتخطون بارت وتروحون للي بعده في مسافات كبيرة بين الكلام وخليته على شكل فقرات بعيدة عشان عيونكم ما تتعب. وأبيكم تحطون ببالكم إن موضوعي هذا مبني على تجربتي الشخصية يمكن أنا غلط أو يمكن تجربتي ما تنطبق على البعض منكم, غرضها بشكل أساسي إن تشوفون خبرتي بس, مو إن تقتدون فيها 100% بالنهاية ترا السّر بالنجاح والتفوق بالجامعة هو فهمك لطريقتك الخاصة في الدراسة وترتيب أمورك.

السنة التمهيدية تنقسم إلى ترمين: ترم أول، وترم ثاني، كل ترم مواده منفصلة تمامًا عن الترم الثاني.

بدايةً قبل ما أشرح لكم، أبي أوضح جم شغلة وجم مصطلح، وراح أكتب لكم لستة بقرطاسية الجامعة في حال كنتوا محتارين فيها، وانفي اعتقاد غلط عن الانقلش بالكلية.

- مصطلحات وأماكن مهمّة:

نوتة: السلايدات اللي يشرحها الدكتور وهي مصدر دراستكم الأول وأحيانًا الوحيد.

طقة: جم مرة درستوا النوتة، داش الامتحان جم طقة؟ يعني جم مرة درست النوت قبل الامتحان، طقيتها طقتين، يعني درستها مرتين😂.

دورات: طلبة كبار وشطار بالمواد يشرحون لكم اللي ما تفهمونه، وايد مفيدين، بس لازم تعرفون حق منو تحضرون بالضبط وتحددون أولوياتكم لإنهم ياخذون جهد ووقت.

قاعة ١-٩٩: هذي بتقضون ثلاترباع سنة أولى فيها😂 والربع الأخير بقاعة ١-١٠٨ يمها بالضبط.

الريدنق روم: المكان اللي يدرسون فيه الطلبة، وفي مكتبات ب٤ أدوار تقدرون تدرسون فيهم بعد.

اللوبي: نقطة التجمع😂 مكان يوقفون فيه الناس اللي ماعندكم محاضرات ولا شغل، مادري شلون أشرح😂.

كوبي سنتر: مكان تحت قريب من المشرحة "ادري فيكم تحبون هالسوالف😂 بس لا تستانسون مو وايد قريب بس بنفس المكان يعني نفس الدور" هذا تاخذون منه نوتكم وإذا في مذكرات وتشترون منه manual البراكتكل مال الكمستري.

استراحة: موجودة بكل دور تقريبًا ماعدا الدور الأول. فيها قنفات ومخاد حق اللي يبي ينام أو ياكل أو يدرس كيفكم.

كافتيريا: مايحتاج أعلمكم عن مكان الأكل😂.

السكوير: يعني المربع، لا لا أتغشمر😂 مكان مفتوح فيه طاولات وجذي تقعدون فيه تاكلون تسولفون تدرسون تسوون اللي تبونه، ويسوون فيه إڤنتات، أكثر مكان أحبه بالكلية يشرح الصدر❤️.

وتقريبًا هذي أغرب المصطلحات🤔.

- بالنسبة للأدوات والقرطاسية:

الجامعة مرحلة جديدة بالحياة، والكل يقول إن خلاص كبرنا وما نحتاج مكتبة وسوالف يهال، بس بالنسبة لي لااازم وشيء أساسي أتقضى من المكتبة قبل كل ترم ببعض هالأشياء، لإن الجامعة تظل مرحلة دراسية تحتاج جهد مضاعف وتنظيم مضاعف مو لإن محد يتابع دفاتركم وأوراقكم أول بأول تهملون! لا. ولإني أحب أكون منظمة وأعتمد على نفسي وما أحب أغراضي تضيع أو تكون مشتتة أو شكلهم مو مرتب وما يشجع عالدراسة وما أحتاج أستعير شيء وعشان ما أتوهق لإني أحب أعتمد على نفسي بكل شيء، أيضًا باللستة راح أكتب لكم بعض الأدوات والأجهزة اللي راح تهمكم بالجامعة بشكل عام. نبدي:

١-قلم ٤ ألوان، يفضل تشترون منه ٢، واحد معاكم وواحد سبير وهم إذا أنتو من النوع الي يكتب وايد نفسي ماراح يكفيكم، وأقلام ثانية منوعة جافة أو سائلة أو جل عشان تستخدمونهم، وكوريكتر حق رايتنق الانقلش.

٢-أقلام رصاص HP2 لإن راح تحتاجونهم بكل امتحاناتكم تقريبًا، ضروري يكون عندكم علبة خاصة فيكم عشان تستخدمونها طول السنة، أنا علبة وحدة كفتني مع إني كل امتحان آخذ قلم جديد😂،  ولا تنسون المساحة، والبراية.

٣-دفترين سلك ١٠٠ صفحة واحد حق الإنقلش وواحد حق استخدامكم العام، أو دفتر واحد جامعي كبير حق كل شيء. وأوراق مسطرة حق الرايتنق مو دفتر! لا لا، أوراق جذي تكون بروحها، بدال ما تشقون أوراق كل شوي وتصير أشكالهم معفسة. تحصلونهم بالكوبي سنتر بعد.

٤-أقلام هايلايت، لااازم، حق الأشياء المهمة بالنوتة.

٥-دباسة ضروري لإن وايد بتصير إن النوت تتبطّل دبابيسها, اخذوا وحدة قوية تقدر تدبس أوراق وايد مع بعض. ومسطرة، المسطرة ٣٠ سم زينة حق رايتنق الإنقلش، لا تاخذون وايد قصيرة, راح تحتاجونها بامتحانات الرايتنق بس.

٦-طابعة، إذا ماعندكم أحس ضروري توفرونها لنفسكم، لإن أفضل تكون نوتكم ملونة عشان تنفتح نفسيّتكم.

٧-لابتوب. ضروري! راح تحتاجونه بالكمبيوتر، وحق كل شيء تقريبا لما بتسوون سيرتش على شيء معيّن أو بتطالعون فيديوات يوتيوب، وعشان تحملون عليه نوتكم وتطبعونهم. عاادي أي نوع يفي بالغرض أهم شيء يريحكم أنتو ومناسب لميزانيتكم ويكون خفيف مو ثقيل. 

اللابتوب تقدرون تستبدلونه بآيباد. راح أتكلم عن الآيباد آخر شيء.

٨-ستيكي نوتس، وflags عشان تحطونهم عند الأشياء المهمة أو الأشياء اللي مو فاهمينها عشان تسئلون فيها بعدين، وclips بأشكالهم، وايد أحيان بتحتاجون أشياء تمسك أوراقكم بدون ما تدبسونهم. هذي أشكالهم للي ما يعرفهم.

٩-فايلات، حق كل مادة فايل عشان تحطون نوتها داخل وما يضيعون بالبيت. أنا الكورس الأول كنت أستخدم الفايلات الكبار اللي فيهم سحّاب، كل مادة فايلين: واحد فيه نوت الميدتيرم والثاني نوت الفاينل. بعدين الكورس الثاني حق البيولوجي لإن النوت زادت قمت أستخدم له الفايل الكبير اللي داخله أظرف عشان شكل النوتة يبيّن وعشان سهل أوصلّهم، أما الـbbe لإن نوت شوي كنت أستخدم طريقة الكورس الأول، ولازم يكون عندكم الفايلات الشفافة الف اضية اللي تدخلون فيهم أوراقكم أنا كنت أستخدمهم أحط داخلهم نوتي ملوت كل يوم عشان ما يتعفسون، أنا شوي منظمة يمكن زيادة عن اللزوم😀.

١٠- پلانر، بالنسبة لي ضروري، تكتبون كل يوم شنو لازم تسوون وجذي، وشنو أهدافكم وخططكم سواء اليومية-الأسبوعية-الشهرية، وفي بلانرز تكون عليهم عبارات تشجيعية وجذي وايد يفيدون❤️. مالي من Ban.do حيل عجيب ويشوق وفي ستكرات وعبارات لطيفة! ومو بس جذي، يبدي من شهر سبتمبر السنة الحالية إلى شهر ١٢ السنة اللي بعدها يعني حيل يظل أكثر من سنة "١٧ شهر"، وهذا شكله تحت وحطيت لكم صورة عن الرسمات اللي داخله حق كل شهر. إذا قدرتوا تشترون منه اشتروا، أنا شريته من مندوبة بالانستا وصلته لأهلي بالرياض وهم دزولي إياه بعدها، وإذا ما قدرتوا عادي في بدائل وايد. وأحس لازم يكون عندكم رزنامة عشان تحددون عليها التواريخ المهمة سواء وحدة كبيرة تعلقونها على طوفة أو اللي تصير مثلثة كل ما تخلصون شهر تقلبون صفحة تحصلونهم بمكتبة جرير-العجيري-السنافر-أو إذا تبون أشياء كيوت آمازون وغيره عندهم سوالف تشوّق من برا. وطبعًا وأكيد تقدرون تستبدلون هالأشياء بآپليكيشنز على الجوالات ولكني شخصيًا أفضّل الورقيين أحسهم جدّيين أكثر.

١١-كالكوليتر أو آلة حاسبة، راح تحتاجونها حق الفيزكس والكمستري والبيولوجي والـBBE ومرات حتى امتحانات الانقلش الريدنق يكون فيه calculations بسيطين بس وقت الامتحان الواحد يتنّح😂، المهم يعني مهمة حيل ف خشوا مالتكم مالت الثانوي وخلوها معاكم طول الوقت بالجنطة.

١٢-فايل أو جنطة تحطون فيهم أغراضكم وقت الجامعة، عشان ما يضيعون مع الحوسة وعشان ما تتعبون وأنتو ماسكينهم، في أكاونتات بالانستا يسوون اللي على أحرفكم وأسماءكم، وترا عادي ومو عيب ولا فشلة لو تبون تستخدمون backpacks أنا كنت أستخدمهم أريح وايد من الفايلات. 

١٣-لو تبون تستغنون الطابعة واللابتوب والأجندة والدفاتر ووايد أشياء ثانية، أقترح عليكم تشترون آيباد، وأنصحكم بآيباد برو اختاروا الحجم اللي يناسبكم سواء العادي أو الكبير شوي لكنّي شخصيًا أحس الكبير أحسن لإن قياسه نفس قياس ورقة A4، صفحات النوت تكون فيه واضحة، إيي معاه قلم تقدرون تنوتون فيه اللي تبون، فيه برامج حلوة تكتبون فيهم مع الدورات وتقدرون تسجلون فيه الدورات أو اللكجرات، تقدرون تنزلون عليه آبليكيشنز الأجندة والتنظيم وجذي، وفي برامج ثانية عجيبة عجيبة تغنيكم عن كل شيء، وحتى بالسنوات الياية راح تستفيدون من بعض برامج الanatomy وجذي حيل يونسون. بس ها! مو تنزلون عليه تويتر ومادري شنو! خلوه بس جذي حق دراسة، وبالعطلة سووا فيه اللي تبونه. الآيباد حق الدراسة وايد وايد حلو ويسهل لكم حوسة النوت وجذي وما أعرف أحد استخدمه وتحسّف! بس أنا ما استخدمته ليش؟ لإني ليلحين متعلقة بالأشياء الورقية😆 ولو استخدمتوا آيباد لا تنسون تسوون pack up حق كل شيء ببرامج تخزين سحابية مثل قوقل درايڤ او دروب بوكس أو بوكس وهالسوالف، عشان إذا اخترب فجأة أو علق فجأة تفتحون ملفاتكم من جهاز ثاني وانتو مرتاحين.

-ملاحظة صغيرونة: ستل راح تحتاجون أوراق/دفتر حق رايتنق الانقلش لإن ما يرضون بالآيباد وامتحاناتكم عالأوراق، ركزوا🤔.

تقريبًا هذي الأشياء المهمة والأساسية وحاولوا تكون عندكم كثر ما تقدرون ما تتصورون شكثر راح تسهل حياتكم الدراسية لو كانت عندكم🙆🏽.

- بالنسبة حق الانقلش بالكلية واستخدامه:

مو ضروري تكونون بلابل بالانقلش عشان تمشون بالكلية، مو شرط تعرفون وتفهمون كل شيء، مع الوقت بتكتشفون إن قدرتكم الاستيعابية قاعدة تزيد وقام تاخذون عالكلمات وتفهمون كل آكسنت يمر عليكم مهما كان غريب😂 شوي شوي بتقدرون تتكلمون وتسئلون مع التعوّد، شوي شوي بتقرون صفحات بدون ما تترجمون ولا شيء. أول شيء طبيييعي تترجمون وايد أشياء بعدين عاادي تمر عليكم نوتة ما تترجمون فيها ولا شيء. وايد ناس دشوا ما يعرفون يركبون جملة على بعضها وماشاءالله تخرجوا دكاترة، أنتو اللي تفرضون نفسكم واللغة ما هي إلا وسيلة للتواصل تتطور مع الوقت. إذا حييل ضعاف أنصحكم بالعطلة تقوون لغتكم بالأفلام والمسلسلات والكتب وغيره، كل واحد وشنو هوايته بس يدخل فيها إنقلش شوي، وتسوون تمارين محادثة، يعني لو تعرفون أحد شاطر بالانقلش كلموه، أو تعرفوا على ناس من النت وسولفوا معاهم، أو جذي حاولوا تقولون قصة أو سالفة بالانقلش وسجلوا صوتكم وأنتو تقولونها، شوي شوي بتشوفون إنكم قاعدين تتقوون. أنا بيوم من الأيام كنت أكثر شيء شايلة همه بالكلية هو اللغة واليوم أقولكم إنها أبدًا أبدًا مو عائق أمام أحلامكم والله❤️.

نبلّش الحين نتكلم عن الجد والدراسة.

نبلش بالترم الأول، وبمواده. الترم الأول ما كان محبّب لقلبي للأسف، كان متعب ومنهك وغلطت فيه بوايد أشياء وسببت عوائق لنفسي وهذا من أحد أسباب كتابتي لهذهِ التدوينة، مابي أحد يغلط أغلاطي، وأبيكم تنتبهون لإن الكورس الأول سهل جدًا والله ما أبالغ لكم، بعد ما خلصته أقولكم إياها بكل صراحة إنه سهل.

راح يكون كلامي عن الترم الأول مقسّم إلى:

١-المواد ونبذة عميقة عنها وعن كل دكتور ونظامه، صعوباتها، طريقة دراستي لكل منها.

٢-اخطائي بهذا الترم اللي ندمت عليها.

٣-ملاحظات تهم مصلحة الدفعة.

٤-نصائح دراسية عامة تساعدكم في تنظيم وقتكم.

نبلش بأول شي: المواد. بهذا الترم راح تاخذون ٥ مواد (إنقلش١٨١، كمستري، بيوفيزكس،كمبيوتر، مادة إختيارية)😁.

راح أتكلم عن المواد العلمية أولًا.

CHEMISTRY ~

كمستري: أحلى مادة، هالمادة تنقسم درجاتها إلى ٣ أشياء (ميدتيرم، فاينل، لاب) عليها ٣ كريدتس، مهمة حق المعدّل نوعًا ما.

هالمادة جدًا محببة لقلبي واللي يتعب عشانها يلقى، بس جدًا تختلف عن الثانوي لإن الفهم فيها ٩٠٪‏ أكثر من الحفظ، المحتوى سهل جدًا ومفهوم وأغلبه إذا مو كله موجود بيوتيوب (قناة خان أكاديمي ممتازة جدًا للكمستري).

الكتاب مهم يكون عندكم لإن شرحه وايد حلو ويفهّم، بالنسبة لي استخدمته كذا مرة وفي ناس ما بطلوه ولا مرة وعادي يابوا درجات، مو شرط لي أنا من النوع اللي أحب أفهم بعمق.

راح أتكلم عن بارت اللاب والبراكتكل لإنه أحلى شي بسنة أولى كلهااا! ببداية الكورس راح يقسمونكم لقروبات صغيرة، كل قروب ٢٠ تقريبًا، ويمسكونكم تيتشرز، باللاب راح تطبقون بعض الأشياء اللي خذيتوها بالنوت، حيل وناسة وتسوون كل شيء بروحكم من الألف لي الياء، البراكتكل يعلمكم وايد أشياء منها إن يثبت فهمكم وإن يخليكم تستمتعون بالتعلم والمادة وإنه يعلمكم شلون تكونون مسؤولين عن أدواتكم ونظافة مكانكم، لازم تلبسون لابكوت بكل مرة! ما يدخلونكم اللاب بدونه، وعقب كل براكتكل في كويز صغير وبسيط تسوونه متعلق بالتجربة عليه ١٪‏ من المادة، وراح تاخذون ٥ براكتكل ف توتل ٥٪‏ من المادة، كل كويز عبارة عن مادة unknown تطبقون اللي درستوه بالبراكتكل عشان تستنجون خواصها، مضمونين حيل وسهليين بس مو معناته محد ينقص فيهم، لازم تنتبهون.

الميدتيرم راح تدرسون فيه كمية سهلة جدًا ومتكررة معاكم بالثانوي وأساسيات الكمستري لا غير.

راح تدرسون عن الروابط الكيميائية، التهجين، الاحماض والقواعد، الغازات وقوانينها، قواعد الإتزان، لوشتالييه، المحاليل، وبداية في الكيمياء العضوية، وجم شغلة ثانيين، كلها مواضيع مكررة خذيتوها بالثانوي بس بالإنقلش هالمرة😂 اللهمّ لازم تشغلون مخكم شوي وتعتمدون على جانب الفهم مو الحفظ نفس أيام الثانوي لإن اللي يحفظ ويدش امتحان الكمستري ماراح إييب قريد، كمية الميدتيرم حسافة الواحد ما يطلع فيها بـA صراحةً أو A- عالأقل.

الكمستري ما كنت أحب أروح دورات وايد له، ومو أي أحد تحضرون له دورات كمستري! اللي نظامه يمشي عالنوت سلايدة سلايدة لا تحضرون له، روحوا حق اللي يعطيكم الكونسبتس والأفكار.

الدكاترة اللي راح يشرحون لكم كمستري كمية الميدتيرم وشنو نظامهم:

١-د.جيمس، اللي راح يشرح لكم أغلب نوت الميدتيرم، هممم، مادري. كشخص حيل كيوت أهوا، بس شرحه ونوته بوادي وأسئلة امتحاناته بوادي ثاني. يركز حيل حيل عالفهم أكثر من الحفظ ومستحيل يسأل حفظ إلا بنوتة الأحماض النووية اللي بكمية الفاينل، إذا ما تبون تحضرون له مو ضروري لإن حضوركم وعدمه واحد صراحةً.. بس تعجبني طريقة تفكيره بالأسئلة اللي يحطهم لإن صج يفرقون بين اللي فاهم واللي حافظ وهني يطيحون المستجدين😬.

٢-د.داونسي، ناار، وايد حبّيت شرحه، والأمثلة اللي يعطيهم، ويقولكم جذي هذا لا تحفظونه، هذا خلوه عنكم، ماراح أسأل بهذا، وريال عند كلمته، حيل عجيب!

٣-د.أسامة، هذا حبيب سنة أولى❤️❤️❤️❤️ من أحسن الناس اللي يشرحون كمستري، يعطي وورك شوب بعد، أنصحكم تحضرون له، شرحه كلمة جبّار شويّ عليه! أنصحكم تحضرون له طبعًا وتنوتون معاه وترا يقولكم هذا مهم وهذا لا، ونوته جدًا مرتّبة وواضحة وسئلوه باللكجر ترا حييل يعطي ويه ويستانس وروحوله بالمكتب يشرح لكم أي شيء مو فاهمينه بأي نوتة حتى لو هو ما يشرحها ما يقصر😍.

- وراح يكون في ثلاث نوت learning topics يعني ما ينشرحون لكم بس ينزلون بالكوبي سنتر أو الموقع وأنتو تدرسونهم بروحكم حق الامتحان بس حيل حيييل سهلين ومضمونين وعليهم دورات حضروهم.

كمية الفاينل بدون مجاملات صعبة نوعًا ما لا تستهينون فيها أبدًا أبدًا لإنه يعتبر نقلة نوعية من البساطة اللي بكمية الميدتيرم إلى التعقيد وربط المعلومات اللي راح تلاحظونه حيل فيها.

كمية الفاينل تركز على الكيمياء العضوية+الكيمياء الحيوية، طلبة مدارس الحكومة جدًا متأسسين وبشكل قوي بالأولى لكن الثانية جديدة بالنسبة للكل, وطلبة المدارس الخاصة يبيلهم يشدون حيلهم شويّ.

الكيمياء العضوية راح يعطونكم نوت/محاضرات تتكلم عن المجموعات الوظيفية والتفاعلات ووو.. كل شيء خذيتوه بالثانوي راح يتكرر، وجم شغلة يديدة، يوتيوب راح يكون صديقكم الصدوق وتطبيقات الوورك شوبز، مهمّين.

اللي راح يدرسونكم:

١-د.بينوڤ، أسئلته تعقد بالنسبة لـ٩٩٪‏ من الطلبة، ليش؟ لإنها فهم، مستحيل يسأل عن شيء حفظ بنوته! والناس داشين عبالهم العضوية حفظ ويلا😂 لا أبدًا مو جذي نظامه، حضروا معاه ونوتوا كل كلمة يقولها لإن إييب من كلامه بأفكار امتحاناته! ركزوا، حتى لو صوته واطي بس ركزوا معاه وسئلوه ماراح يقصّر، راح يعطيكم كذا نوتة فاينل بالعضوية والحيوية، نوتة بروتينات وايد وايد ركزوا عليها.

٢-د.جيمس أقين!😂 هالمرة راح يعطيكم نوتين، واثنيناتهم حيوية، وحدة تتكلم عن الانزيمات (حيل تشوق💓) ووحدة عن الاحماض النووية (تشوق أكثر وأكثر) واسئلته بالفاينل ألطف من الميدتيرم بوااايد ومضمونة، وهالمرة نوته فيها جانب حفظ مو بس فهم ديروبالكم وحفظوا هالمرة.

٣-د.تشنق، واي😭💗💗 لطيف جدًا جدًا. والله مادري شلون أوصف لطافته، أسئلته تتفوّل بالامتحان، شرحه حلو بس يبيله أحد يصيد الآكسنت ماله لإنه من شرق آسيا (أتوقع صيني)، نوته واضحة حيل، حتى لو تدرسونها بروحكم راح تفهمون شنو سالفتها ما تحتاج دورات بالنسبة لي، تحسونهم فاضيين بس أهو صج ما يبي غير هالمعلومات بس ومستحيل يطلع عن النوتة. عسسل.

٤-د.أسامة راح تشوفونه مرة ثانية😍👏🏼 راح يعطيكم نوتة عن ترابط الفلزات مع بعض وجذي نوتة حييل سهلة حضروا معاه اللكجر ونوتوا وانتبهوا على شنو يركز وأضمن لكم تفولون أسئلته بالامتحان!❤️❤️

طريقة دراستي للكمستري، أحضر المحاضرات وأنوت، إذا ما فهمت شيء كنت أروح حق د. أسامة أو د.محمد الأنصاري وأسألهم وما يقصرون كلش، أحضر الوورك شوبز (صج ماعليهم حضور بس والله نصيحة حضروهم لإن مهمين حيل حيل، كنت أول شي أحضر مع أ.منى بستكي عجيبة بعدين لما بلشنا عضوية حضرت مع د.أسامة جبّاار شرحه للعضوية ويعطي طرق تثبّت التفاعلات ويلخص لكم التسميات بكل وورك شوب). دورات تقريبًا ما حضرت إلا حق إيديوسوارم/سلمان العتيبي كان يشرح معاهم وأتوقع بيشرح لدفعتكم بعد، شرحه وايد قوي بالكمستري ماشاءالله👏🏼. والحمدلله ربّي منّ علي بدرجات عالية بالكمستري💓، وطقة وحدة ترا ما تكفي! وهالشيء حق كل المواد مو بس الكيم! عالأقل طقتين أقل شي.، والأسئلة القديمة مهمة مهمة مهمة مهمة، لا تدشون امتحان إلا وأنتو حالين ملوت 5 أو 4 سنين قبل دفعتكم وايد يتكرر.

BIOPHYSICS ~

البيوفيزكس، نفس الكمستري عليه ٣ كريدتس، أول شيء كنت ما أحبها وكنت استصعبه ووايد أخاف منها وكل يوم أبجي عند أمي منها😂، بعدين شوي شوي حبيتها حييل، هالمادة الحلو فيها إنها مو معقدة وتنحب ولما تندرس  عدل الواحد ياخذ حقه فيها.

الكتاب جدًا جدًا مهم وحاولوا من بداية السنة تشترونه من شويخ قبل ما يخلّص، ليش؟ لإن د.ليلى ود.علي شعيب اللي راح يشرحون لكم كمية ميدتيرم بعد كل نوتة بيحطون لكم جم سؤال هوموورك تحلونه، هذا لااازم وضروري تحلونه! ضروري ضروري ضروري، اسئلة الامتحانات وأفكارهم منهم. راح يكون عندكم مثل وورك شوب بس حق نوتة الفيزكس كل ما تلخصون منها، مثلا اليوم انشرحت لكم نوتة؟ بنفس الاسبوع راح يدش عليهم تيتشر اسيستانت ويعطيكم فيها مسائل، لازم تحلونهم ضروري.

كل أسبوع راح تاخذون محاضرتين بيوفيزكس، المحاضرة الاولى تنشرح فيها النوتة، والثانية مسائل. بالنسبة للدورات، حضروا دورة أو ثنتين (أنا حق كمية الميدتيرم من الخرعة كنت أحضر ثنتين، وحدة كان يشرحها طلال الاستاد يشرح بالتفصيل كل شيء بالنوتة ويخليني أفهم مضمونها، ووحدة حق خالد الراجحي يعطي مسائل الامتحانات وطريقة أسئلة النوتة وبجذي أكون ضامنة فهم+حفظ والحمدلله).

عقب ما تخلصون المحاضرتين+تحضرون دورة أو ثنتين (اللي يريحكم طبعًا) لازم تدرسون النوتة، وتحلون كل مسائلها، الهوموورك وملوت الوورك شوب واللي يعطونكم إياهم بالدورات (مسائل خالد الراجحي عجيبة👌🏼).

اللي راح يشرحون لكم كمية الميدتيرم:

١-د.ليلى حبيب، راح تشرح ٣ نوت، أسئلتها حلوة بس بالفاينل يابت لنا جم سؤال يبيلهم ناس فاهمين مو حافظين، فركزوا وأهم شي حلوا الهوموورك مالها واقروا تشابتر الكتاب اللي يخص محاضرتها، شرحها مو حيل حلو ما كنت أحبه ولا كنت أندمج بمحاضراتها، بس نوتها بالنسبة لي أحلى نوت بالفيزكس👌🏼.

٢-د.علي شعيب، شرحه عجييييب! يخليكم تندمجون غصب، ومرات يكتب عالسبورة حتى، حرصوا انكم تنوتون معاه باللكجر القوانين اللي يضيفها وجذي، واسئلته بالامتحان كلها من الهوموورك والتتوريال وتتفوّل.

توتل نوت الميدتيرم ٧ نوت بس، درسوهم أول بأول لإنهم صج ٧ كرقم لكن محتوى كل واحد منهم عميق ويبيله فهم، أنا كان معدّل دراستي وقتها نوتة باليوم حتى لو طقة ثانية، كنت لازم أستوعب كل حرف وكل مسألة وكل فكرة.. درست عدل والله لكن تقديمي بالميدتيرم صج كان فوق الآڤرج الحمدلله لكن مو ذاك الزود مقارنةً بمستواي الأكاديمي.. ليش؟ بكل بساطة كنت خايفة، خايفة حييل لدرجة وقت الامتحان أكتب المسائل بالآلة الحاسبة غلط ومادري شنو😂 بس الحمدلله على كل حال وفوّلت الفاينل وارتفع قريدي 👏🏼.

الميدتيرم عبارة عن ٤٠ سؤال والوقت حيل ضيّق بالنسبة لهم لإنهم عبارة عن مسائل، لازم تتدربون عدل عشان يكفيكم الوقت، ولا تسوون غلطتي وتخافون لإن يعني فكروا فيها بالعقل درستوا النوت والمسائل والكل شي صدقوني ماراح إييبون لكم شغلات من الفضاء وأنتو توكم سنة أولى.

نصيحة ثانية، إذا ما فهمتوا شيء لا تستحون تروحون وتسئلون الدكاترة بمكاتبهم، بس بليز يعني لا يكون سؤالكم غبي أو سطحي يبيّن إنكم صج مو دارسين النوتة ولا مستوعبين شنو قاعدين تسئلون أو عميق بزيادة ويعقّد وتدرون ماراح إيي بالامتحان بس يعني شوفونا شطّار لإن ترا الوضع مو مدرسة والشاطر يعرف اللي له واللي عليه، كونوا دارسين قبلها، لإن ترا اهما دكاترة مو مدرسين ثانوي فلازم تحترمون هالشيء، وهالشيء يمشي على كل المواد، بالعربي يعني لا تصيرون صيدات😁.

كميّة الفاينل راح يشرح لكم د.علي شعيب نوتة وحدة بس أو نوتة ونص، وباقي الكمية راح يشرح لكم د.علي بورسلي عن الMRI, يخرع صح؟ نفس شعوري أول ما عرفت😂 الفاينل ٦٠ سؤال، د.علي بورسلي بإيده ٣٠ سؤال، هالأسئلة تتفوّل وربّ الكعبة من كثر ما إهي عسل عسل عسل، اللهمّ يبيله تكونون حافظين النوت صامّينهم صمّ حتى الهوامش، نوت MRI عبارة عن ٦ نوت، أول نوتين مقدّمة عن العلماء وجذي، عادي لو تحضرون دورات لهم مع أحد أحد لإن مافيهم أفكار، أما الـ٤ نوت الباجين عميقين شويّ وشخصيًا حضرت دورات لهم مع عبدالعزيز عكرمة بس وشرحه كان حيل حلو ماشاءالله وفهمت منه كل شيء.

الفاينل وايد أسهل من الميدتيرم للي دارس وشاد حيله مع إن أسئلة د.ليلى كانت وايد أصعب مقارنةً بأسئلتها مالت الميدتيرم، وممكن حيل يتفوّل.

ثانيًا راح نتكلم عن المواد اللي مو علمية *ما لقيت تقسيمة ثانية😆*

 COMPUTER ~

الكمبيوتر، أكره هالمادة، آسفة يمكن لازم هالتدوينة عشان تشجعكم لكن فعلًا والله ولا مرة حسيت بحب أو ذرة اهتمام تجاه هالمادة😂 بس جذي همّ عالقلب وداشة عرض، الحلو إن نوت الميدتيرم ثنتين بس ووحدة بس جذي مقدّمة لازم تدرسون منها سلايدتين، والفاينل زيدوا عليهم نوتين بعد.

المادة فيها جزئين: نظري وعملي (براكتكل).

النظري عمومًا يشرحه دكتور واحد، النوت تتكلم عن وايد أشياء جذي داشة ببعضها، أحسن شيء فيهم إنهم مو وايد. طبعوهم ملوّن مو تصوير أبيض بأسود! لإنه يحط وايد graphs فيصير شكل النوتة خايس ويضيّق الخلق لو أبيض وأسود. نوته تحتاج ترجمة أحيان لإن ينتقي كلمات مادري شلون. نوتوا معاه باللكجر أو حاولوا. مشكلته حتى لما تسئلونه ما يبرّد الجبد بالجواب، شرحه مو حيل حلو، بس حضروله شوفوا شنو يبي منكم بالضبط.

بالنسبة للعملي؛

كمية الميدتيرم العملي ماراح ينشرح لكم راح يعطيكم رابط فيه فيديوات تعليمية عن بعض برامج مايكروسوفت وراح يحدد لكم مهارات معيّنة يبيها بالامتحان.. ودي اقولكم سهالات بس بالنسبة لي كان همهم هم😭😂.

والفاينل راح تبدون تنزلون مختبرات pc lab تحت ويدربونكم مدرسّين على شغلات ثانية (شلون تقرون بحث طبي وتطلعون منه المهم-شلون تبحثون عن مقالات طبية-الخ) وعملي الفاينل مو داش فيه عملي الميدتيرم.

بالنسبة للامتحان، الامتحان سواء فاينل أو ميدتيرم بيكون مقسّم حق قسمين:

قسم نظري أسئلة MCQs من النوت ومرات من الفضاء على كيفه😂 -واضح حيل حاقدة- على دفعتنا كانوا الساعة 1 ومدة الامتحان ساعة.

وعقب ما تخلصون راح يقسمون الدفعة جزئين، جزء ينزل تحت الساعة ٢ لي ٣ يمتحن عملي، وجزء من ٣ لي ٤، المهم إن كل جزء امتحانه ساعة، لازم تخفّون إيدكم+تسيڤون كل شيء تسوونه، بساعة لازم تسوون جم مهارة ب٤ برامج تقريبًا فلازم تكونون سريعين ومتدربين وسريعين سريعين سريعين.

الحلو إن المادة عليها كريدت واحد بس؛ يعني حتى لو يايبين فيها D ماتأثر بالمعدّل كلش كللش وحتى لو يايبين فيها A ماكو فايدة، هذا الجانب المريح. درجتي بهالمادة كانت زينة بس الله يهداني لو حابة المادة جان يبت أعلى😂.

 ELECTIVE ~

المواد الاختيارية، عليها 3 كريدتس نفس البيوفيزكس والكيم لذلك مهمّة. لها نظام غير ثابت ويعتمد على دفعتكم، بس بقولكم اللي أعرفه:

النظام القديم كان إن كل كورس ينزلون الثلاث مواد، حقوق يكون الساعة٨، مسؤولية وميديا الساعة٩، وأنتو تختارون اللي تبونه.

دفعتي شنو سووا فيهم؟😂 مانزلوا مسؤولية أول كورس، فكان فيه شعبتين حقوق شعبة ٨ وشعبة٩ كل شعبة دكتور غير، ونفس الشيء الكورس الثاني شعبتين مسؤولية وحدة٨ ووحدة٩ بس هالمرة الأثنين نفس الدكتور.

الدكتور على كيفه يقسّم الدرجات وجذي حرفيًا كل شيء بإيد الدكتور، سمعوا كلامه وصمّوا الكتاب وامتحنوا😆 الميديا ماعندي فكرة عنه صراحةً بس قالولي المادة مليقة شوي 😂. بس في اعتقاد إن الميديا لإنها بالإنقلش ف أحسن شيء يدخلونها الإنقلش سكولرز، وهالشيء غلط، وايد ناس من حكومة ما يحبون الحفظ الوايد اللي بالمواد العربية (لإن صج قرقة وحفظ وايد) ف دشوا ميديا وخذوا درجات عالية ماشاءالله🙏🏼 فهذا اعتقاد خاطئ تمامًا❌.

ثاني اعتقاد خاطئ بس مو قصدي فيه التحبيط؛ إن المواد الاختيارية مواد سهلة ومضمون فيها الـA. غلط غلط غلط وأنا طحت بهالفخ! إهي بيسكلي تعتمد على حظكم مع الدكتور، ونظام اسئلته، وطريقة توزيع درجاته. والمواد مو سهلة كلش ولا بسيطة، أنتو بتدرسون كتب يدرسونها طلبة حقوق من الجلدة لي الجلدة مع بعض الأشياء الملغية، يعني مو تخلون له يوم واحد! ترا ما يكفي. -مرة ثانية: كلامي مو للتحبيط بس عشان تشدون حيلكم وتسوون كل اللي عليهم وتبذلون أسبابكم❤️.

 ENGLISH ~

أخيرًا بتكلم عن الإنقلش، هذا راح يكون الحديث عنه مطول ومفصّل أكثر، ليش خليتها آخر شي؟ لإن هالمادة بصوب وكل مواد سنة أولى بصوب، وأكثر مادة تلعب بالمعدّل، ومقسّمة درجاتها لعدة أشياء ومحتاجين تضمنون كل بوينت عشان ما تييبون قريد نازل وينخسف معدّلكم، بهالمادة لو أنتو لنفرض إنكم يايبين بكل المواد straight A's بس يبتوا فيها B راح تفرق وايد وايد بمعدلكم. كلامي عشان أخوفكم؟ لا، لإن مابيكم لما تبدون المادة وتشوفون أقسام المادة سهلة ويصير فيكم سهل مو لازم ندرس كل يوم، لاا بالعكس.

الانقلش أكثر شيء يعتمد على ٣ شغلات، بقولكم الأهم ثم المهم.

أولًا: عليكم وعلى اجتهادكم وجهدكم اللي تبذلونه وعدم اهمالكم، هذا اللي يفرق. عادي بنت ألف مستواها وايد أقل من بنت باء بس ألف تييب A وباء تييب B بسبب اجتهاد الأولى واهمال الثانية.

ثانيًا: مدرسكم وقواعده اللي لازم تتبعونها وتسوون اللي يقول عليه، حتى لو what he or she says does not make sense to you سووا اللي يقولونه، لا تعاندون، كسبوا مدرسينكم من البداية بتعاملكم واهتمامكم حتى لو كان مدرس محد يحبه ويتقبله بتكونون جدًا راضين عنه وعن تعامله معاكم، ومالكم شغل بكلام أحد والناس اللي فوقكم واللي كبركم عن مدرسينكم! انتو اكتشفوا شخصياتهم بنفسكم واتبعوا قواعدهم واحترموهم وعطوهم الانتباه بالكلاسات وبتشوفون شلون بيميزونكم ويساعدونكم حتى لو كان طبعهم ممل-جاف-قاسي-إلخ. ضروري تعرفون سايكولوجية مدرسينكم وتكسبونهم بالتعامل الحلو من البداية❤️.

ثالثًا: مستواكم باللغة الانجليزية، وبناء على ذلك كمية اجتهادكم. مثلًا لو وحدة يايبة بقدرات الانقلش درجة ٧٠ مثلًا لازم تشد حيلها أكثر من اللي يايبة ٩٠ وفوق، ضروري أساسياتكم تكون قوية وتأسيسكم باللغة صح، صح يقولون ما يفرق وهذا انقلش طبي بس ترا يظل انقلش!!! لازم يكون عندكم حصيلة لغوية ومرونة باستخدام الاساليب والكلمات وغيره. إنزين إحنا مستوانا مو ذاك الزود بالانقلش شنسوي؟ بسيطة. شدوا حيلكم من البداية ودرسوا عدل القرامر، اشتروا كتاب قرامر اللي بيقولون لكم عنه وكل يوم اقروا منه شوي، درسوا الـgeneral vocab من البداية، واستخدموا ترجمة من انقلش إلى إنقلش عشان تتقوّون، لإن والله هالمادة تلعب لعب بالمعدّل والمشكلة إن بإيدكم مليون شيء تسوونه عشان تييبون قريدات عالية ف حاولوا تسوونهم من البداية يعني حساافة لو ما شديتوا حيلكم، وتذكروا إن it's never too late to be good at English ❤️.

شنو لازم تسوون؟ لازم تحضرون كل كلاس+تتدربون كل يوم بالبيت حق الرايتنق (كل يوم كتبوا فقرة وشوفوا أغلاطكم)+تسوون reading & listening كثر ما تقدرون وتستغلون وقت الكلاس لما يسوون معاك مو تلعبون بفوناتكم+ تنوتون مع التيتشر بالكلاس+تدرسون فوكب عدل عشان تفولونه وتضمنون ال١٠٪‏ مالته+تراجعون القرامر بشكل دوري حتى لو أنتو أصلًا شطار بالإنقلش.

تقسيمة المادة كالتالي؛

١-فوكب، ١٠٪‏ من المادة.

 راح يعطونكم كتاب لازم تدرسونه بروحكم، لو تقدرون درسوه بالصيف وارتاحوا منه، سهل حيل تحفظونه حفظ ونفس الاسئلة تيي بالامتحان؛ وراح يعطونكم لستة كلمات general vocab هذي اللي يكون فيها صعوبة بالامتحان فدرسوهم من البداية وحفظوا الـdefinitions ملوتهم مو معناهم بالعربي!! ديربوبالكم.

راح تمتحنون امتحانين فوكب؛

كل امتحان عليه ٥٪‏، واللي تمتحنون فيه بأول امتحان خلاص مو داش بثاني امتحان (أحلى شي😋).

مو سهل يتفوّل بسبب الـgeneral vocab لكن حاولوا ما تغلطون أكثر من غلطتين أو ٣ ماكسمم.

٢-قرامر، ٥٪‏ من المادة، راح تمتحنون قرامر مع ثاني فوكب، طريقته غريبة شوي، يعطونكم ١٠ جمل تمام؟ كل جملة يحطون على ٤ أشياء منهم خط A B C D وآخر شي لما تخلص الجملة يحطون E- correct يعني الجملة مافيها ولا غلطة، فلازم تنتبهون، لان في احتمال يكون في غلط بالجملة (بواحد من الـ٤ أشياء اللي حاطين تحتهم خط) واحتمال هم تكون صح فلازم تصيدونها👌🏼.

٣-رايتنق، ٣٠٪‏ من المادة، بس لا تحاتون مو كلهم مع بعض😂

بقولكم شغلة، منهج الانقلش عمومًا مقسّم لـ٣ أشياء

-أول قسم procedure يعني مثلًا جراحة أو شيء يتكلمون عنه ويشرحون خطواته، وهذا تسوون عليه رايتنق عليه ٥٪‏ بس لإن توكم بالبداية ومو متعودين، سهل حييل.

-ثاني قسم definition يعني يشرح مرض معين واعراضه وعلاجه وتشخيصه واسبابه، ومن هالكلام، تكتبون عليه فقرة وعليه ١٠٪‏، سهل بعد ❤️❤️.

-ثالث قسم اسمه compare and contrast نفس ثاني قسم بالضبط لكن الفرق انكم هالمرة تتكلمون عن مرضين مو مرض واحد وتقارنون بينهم وجذي بكلمات معينة عشان جذي يمكن يعتبر هذا أصعب واحد بس يعطونكم له وقت وايد تتدربون فيه.

 راح يدربونكم على كل شي بالرايتنق، صدقوني احنا مثلكم بيوم ماكنا عارفين شي ومخترعين والحمدلله دشينا وتدربنا وصرنا زينين حيل👏🏼 حرصوا كل يوم تكتبون رايتنق وتقارنونه بالmodel paragraph وتخلون اللي يدرسكم يصلح لكم، لو ما يرضى طلبوا منه بأسلوب حلو hello Ms/Mr. (....) Could you please take a look at my paper and correct it? ودايمًا طلبوا منهم نصايح بخصوص اللي تكتبونه لإن بالنهاية أهما اللي بيصلحون لكم أوراقكم وهم أدرى بمستوياتكم.

لو رضوا رضوا وإذا ما رضوا ميخالف تقدرون تعتمدون على نفسكم أو تخلون رفيجاتكم يصلحون لكم لو كانوا شطار بالرايتنق.

تدربوا وحسبوا حساب كل شي سبلنق آرتلكز كل شي كل شيء ومو يصير فيكم هذا عليه شوية عادي، أنا وحدة كل أغلاطي كانت هالأشياء السخيفة وحتى التيتشرز كانوا يعصبون مني لإني لولاهم جان مفولة الرايتنق😂، وصدقوني بتسوون وايد زين والله👏🏼.

٣-midterm and final عليهم 55%

راح يكونون بمهارتين، reading and listening

نبلّش بالريدنق.

الريدنق كلش كلش مو نفس مال الثانوي، المقالة تكون طبية وتكون اما procedure, definition, compare and contrast مو شي برا عنهم، وعدد الاسئلة كبير (١٨ سؤال) فلازم تحلونهم كلهم بوقت ٤٥ دقيقة تقريبًا أو أقل وهالشي بتتمكنون منه من خلال التدريب المكثف (حطوا تايمر وحاولوا تخلصون فيه) وتقدرون تبلشون بهالشيء من العطلة. طريقتي بالحل كانت إني أشوف الأسئلة وأدور على أجوبتهم بالفقرة لإن لو بتقرون الفقرة اللي عبارة عن صفحتين أو أكثر بيضيع وقتكم، كلش مو نفس الثااانوي. وآخر ٥ اسئلة بالفقرة دايمًا أحلهم اول شي عشان أضمنهم، وهم عبارة عن اسئلة هالضمير يشير حق أي كلمة/شنو أقرب معنى حق هالكلمة/شنو ضد هالكلمة/ حيل سهلين ومضمونين ف بلشوا فيهم وبعدين شوفوا الباجي، ولا تغيرون إجاباتكم إلا لو كنتوا ١٠٠٪‏ متأكدين!! بليز لا تغيرون إجاباتكم!!

اللسننق؛ حيل حيل سهل ومضمون ويتفول غالبًا، يقرون عليكم موضوع (ايضًا يكون واحد من ال٣ مواضيع) ولازم تكتبون *كل شيء* يقولونه، ويردون بعدين يقرونه مرة ثانية، بعدين يقرون عليكم الأسئلة (١٢ سؤال) كل سؤال مرتين، والاختيارات تكون مطبوعة عندكم ف تختارون، سهل تحلونه لو انتو كاتبين كل شيء لو أغلب الاشياء👏🏼.

طريقتي باللسننق كانت: بأول قراءة أكتب كل شيء بلون اسود مثلًا، وبثاني قراءة أضيف الأشياء اللي نسيت أكتبها بلون ثاني أحمر مثلا. (مرات ترا ما يمدي تكتبون كل شي على طول روحوا عند النقطة اللي وراها لاا تعلقون عشان ما يضيع عليكم وايد كلام)، بالامتحان كنت أستخدم وايد صفحات كل صفحة فيها فقرة، عشان ما يدش الكلام ببعضه.

الميدتيرم عليه ١٥٪‏ من المادة، طبيعي لو نزلتوا فيه لا تتحبطون، أنا يبت فيه أقل درجة بكل الامتحانات اللي امتحنتهم بالانقلش😂 وبعدها قام مستواي يزيد لإني تدربت أكثر وصدت نظام الأسئلة لين وصلت مرحلة إني أفوّل الامتحان الحمدلله👌🏼.

الفاينل مصيري، عليه ٤٠٪‏ من المادة، ممكن طول الكورس ما تكونون نازلين حيل وبالفاينل تغلطون وايد وتييبون قريد نازل، الفاينل بشكل عام ما إيي سهل ومباشر ويبيله تركيز لإنهم يبون يصيدونكم، اللي لازم تسوونه إن يومها تكونون مروقيين وتدشون القاعة واثقين من نفسكم مبتسمين وتضحكون عشان تدشون جو مع الأسئلة. الفاينل راح يتكون من ٣ اقسام، ريدنق ولسننق، وآخر شي ١٠ اسئلة writing application نفس فكرة القرامر لكن الفرق إنهم يحطون لكم آوتلاين فيختبرون فيكم مهارتين (الرايتنق+القرامر) لو أنتو شاطرين بهالمهارتين راح تييبون فيه وايد وايد زين، وأيضًا راح يدربونكم على كل شيء بالكلاس لاا تحاتون😍❤️.

 مادة الإنقلش لعبتها بالتدريب، تتدربون طول الكورس بتاخذون قريد عالي (حتى لو A ترا مو مستحيلة) بسهولة، بتهملون طول الكورس وبتشوفون نفسكم وتستهينون   بهالأشياء إن نسبتهم قليلة راح تطيحون؛ لخريجين الثانويات الحكومية ترا مو مستحيل تييبون A والله، بس بنفس الوقت لا تخلونه هاجس إلا تييبون A أو خلاص، ترا A- وB+  يعتبرون توب وفوق التوب بعد.

وبجذي نكون خلصنا حديثنا عن المواد,الحين بنتكلم عن الحياة شوي 😂. 

 مثل ما وعدتكم بتكلم عن أغلاطي بهالكورس عشان تتفادونهم.

١-ماكنت أدرس أول بأول😬؛ فكليتها قبل الميدتيرمز، مع إني لما فكرت فيها كان عندي الوقت وكل الوقت إن أدرس بس أنا كنت عايشة جو التعبانة والخايفة اللي ماااله داعي، لا تسوون نفسي وإذا أحد منكم صايرله جذي خل يدش يكلمني عشان أزفه وأعطيه محاضرة😂.

٢-كنت خايفة طول الوقت وأحاتي، لايك سيريسلي حصّه؟ شنو يخوف؟ ماافي شي يخوّف والله. امتحانات الكورس الأول لما أفكر فيها استوعب إنها كانت پيس أوف كيك، سهلين حيل.

٣-كنت أضغط على نفسي وكنت حاطة ببالي إني لازم أقعد بالكلية أدرس لين الساعة ١٠ بالليل عشان أييب زين لإني ماراح أقدر أدرس بالبيت، صيدة😂 هالكلام كان وقت الميدتيرمز، بعدين  لما خلصت الميدتيرمز صرت الساعة ٣ أخلص محاضراتي وأرد البيت أتغدا مع أهلي وأريح شوي وأقوم أدرس ولا بعد أقعد أدرس بالصالة مرتاحة أكثر وأتحرش باللي رايح واللي راد😂. إلا لو كان عندي دورة ماكسمم تخلص الساعة ٦ أو ٥ ونص وأرد بيتنا عقبها.

٤-كان عبالي إن مهم أحضر كل دورة، هالكلام أيضًا كان وقت الميدتيرمز بس، لحدّ ما وقت الفاينل ما كنت أحضر إلا حق الفيزكس والكمستري درسته بروحي إلا نوتين سجلت مع إيديوسوارم وحضرت لهم دورات لإنهم كانوا شويّ يبيلهم فهم وجذي (منهم نوتة البروتينات اللي قلت لكم عنها)، والكورس الثاني ما حضرت دورات إلا حق جم شغلة بس، أحسن شي الاعتماد عالنفس، وحجي قوقل موجود، وحبيب القلب يوتيوب نفس الشيء، والكتاب صديقكم، والدكاترة موجودين بمكاتبهم روحولهم بالساعات المكتبية ملوتهم أو إذا تستحون دزولهم إيميلات.

٥-كنت وايد شايلة هم هالفاضي ونظامي إما A أو بزعل، صراحةً أهو ليلحين نظامي لإني حيل نيردة😂 بس يعني فلّيتها شوي عقب الكورس الأول، وروّقت أكثر، وأدائي صار أحسن بالامتحانات.

٦-لا تغيرون إجاباتكم بالامتحانات! بالإنقلش كنت أغيّر إجاباتي بالريدنق بعدين اكتشف إن درجاتي مو حيل توب، آخر شي بانقلش ١٨٢ بالكورس الثاني قلت مستحيل أغيّر إي إجابة إلا لو كنت ١٠٠٪‏ متأكدة وصرت أييب عالي وايد وأفوّل! أهما دايمًا جذي طريقة الاسئلة تبي تصيدكم، ف ثقوا بأول إجابة ولا تشككون بنفسكم. وكل المواد الثانية: لا تغيرون فيها إجاباتكم، من أول مرة حلوا عدل وفكروا أو شيروا بمنطق وبعدها خلاص لا تغيرون, راجعوا مرة وطلعوا من الامتحان بسرعة لو حسيتوا انكم بادين تغيرون إجابات وايد وتجيبون العيد بأنفسكم, نفسي بفاينل الbbe كان صعب صعب صعب. طلعت قبل الوقت بساعة كااملة عشان ما أعفس الدنيا وأغيّر شيء حتى الدكاترة انصدموا شفيها هذي شكلها ماحلت شيء😂 والحمدلله كان أحسن قرار بحياتي لإني يبت فيه درجة وايد عالية الحمدلله بس لإني وثقت بنفسي وما غيّرت إجاباتي. خلاص أنا دارسة عدل وحليت بناء على دراستي واستودعت إجاباتي الله وطلعت, ليش أضيّع تعبي بشك وتوتر؟ حيل ما يسوى.

٧-درسوا عدل من أول مرة، مو تقولون أول طقة بس جذي قراءة بعدين قبل الامتحان ندرس عدل🌝 لا. درسوا من أول مرة جنه باجر امتحانكم وركزوا عدل.، عشان الطقة الثانية تصير خفيفة -وعادي جدًا تنصدمون إن جنكم مو دارسين أصلًا😂- بس أهون من إن يكون امتحانكم عقب أسبوع وتوكم تدرسون صج. بعد الطقة الثانية تبدون تحلون أسئلة قديمة، بعدها قبل الامتحان بيومين أو ثلاث تبلشون طقة ثالثة اللي إهي عبارة عن مراجعة سريعة للنوت وسكان على الأسئلة القديمة.

ملاحظات مهمة وتهم مصلحة الدفعة:

١-سجلوا المحاضرات بأجهزتكم بدون ما الدكاترة يدرون مو جذي أشكرا! ترا ممنوع ممنوع ممنوع.

٢-لا تورون الدكاترة الأسئلة القديمة والتفاريغ!!! مستحيييل وإلا ترا يعصبون عليكم ويغيرون الأسئلة على حظكم، سمعنا وايد قصص عن غباء ناس راحوا يسئلون الدكاترة بأسئلتهم القديمة ف صعّبوا الامتحانات على دفعتهم، شيء بسيط مو محسوب حسابه جذي ضر بالدفعة، ف ديروبااالكم.

٣-بالنسبة للحضور. اجباري اجباري اجباري ما عدا جم شغلة بسيطة يقولون لكم عنهم. ولو تعديتوا ساعات غياب معينة "٢٠٪‏ من المادة" تنحرمون من الفاينل وتاخذون FA وتنطردون من الكلية لإنكم سنة أولى. ف مو تتهورون! عندكم حلين، إما إن تداومون كثر ما تقدرون عشان إذا احتجتوا تغيبون، أو تخلون أحد يوقع لكم (بس هالطريقة فيها شبهة دينية لإن ما يجوز، ف ديروا بالكم وسئلوا شيخ أحسن)؛ ولو سويتوها لا يشوفونكم الدكاترة وأنتو توقعون لبعض. ترا فيها مشكلة كبيرة وتوديكم بداهية😅.

 نصائح عامة للدراسة وللحياة الجامعية عمومًا, ولكم خصوصًا كطلبة في كليات طبيّة مو بأي كلية ثانية وهذا ليس تحقيرًا لباقي كليات الجامعة والتخصصات لكن كليتنا تتطلب شوية أشياء زيادة.

١-درسوا أول بأول، صعبة أول شي صح؟ الحين أقولكم الطريقة. أنا بالبداية كنت طول الأسبوع ما أدرس، وبالويكند أحاول أدرس اللي خذيته هالأسبوع، بالكورس الأول راح تاخذون ٣ نوت بالأسبوع بس، هذولا بسهولة يخلصون بالويكند. 

٢-درسوا فوكب ولا تنسونه، ودرسوه بالعطلة إذا قدرتوا لو كل يوم صفحة، من وين تييبون الكتب؟ بالأورينتيشن اللي بيسوونهم القوائم راح يعطونكم إياهم، لو كل يوم صفحة بتخلصونهم بالراحة، ومنها بعد جذي تتحمسون للدراسة الياية❤️ لو ما قدرتوا عاادي، بس هاا من أول يوم دوام تبلشون كل يوم صفحة صفحة صفحة لين تخلصون الكمية عشان تردون تراجعون مرة ثانية وتثبتون الحفظ👏🏼.

٣-ساعدوا غيركم. بقولكم تجربتي الشخصية بخصوص المساعدة، أنا من أول ما انقبلت ماسكة أكاونت حق دفعتنا وأساعدكم بكل شي معنويًا دراسيًا كل شيء وصرت لاحقًا ممثلة الدفعة والحمدلله. لا تصيرون أنانيين ولا تاخذكم سالفة مابي فلان يصير أحسن مني. والله العظيم إني أحس توفيقي بسنة أولى وتفوقي الأكاديمي بفضل الله ثم بفضل مساعدتي لدفعتي طول السنة ودعواتهم لي.

٤- خلكم سطحيين مع الكل، زملاء مع الكل فقط لا غير، لا تحطون أحد بمرتبة الصديق إلا لما فعلًا تعرفون هذا شنو ومنو وشنو قلبه. سطّح علاقاتك تكن حبيب الكل. ولا تعطون أسراركم لأحد ولا تأمنون.

٥-حطوا ببالكم أن لو مهما كنتوا كيوت وطيبين في ناس بيكرهونكم جذي بدون سبب ويمكن حتى يأذونكم. ليش؟ لإنهم مرضى الله يعينهم على نفسهم وعلى مرضهم. أنا صارتلي جم سالفة بسنة أولى بهالموضوع وكنت صج أنصدم لإني مالي شغل بأحد مع ذلك ما سلمت، اللي تعلمته إن لازم أعطي كل شيء طاااف وأهم شي دراستي وبس.

٥-توكلوا على الله أهم شي وآمنوا باسمه (الوكيل) اللي ما يعجزه شيء، آمنوا بنفسكم وبطموحاتكم وأحلامكم وإنكم ما وصلتوا إلا لانكم قدها.

٦-كل الدراسة اللي تدرسونها (أسباب)، وكلهاا دون التوفيق اللي من الله هباء، صدقوني كلنا شطار وكلنا درسنا بس ما فكرتوا ليش ناس إييبون ماشاءالله A's وناس لا؟ هذا توفيق من الله مو لإنه يملك قوى خارقة. لذلك دائمًا وأبدًا اسئلوه التوفيق.

٧-راح تمر عليكم أيام صعبة وسيئة، احتسبوا الاجر، تكلموا عند أحد لا تخشون شيء بقلبكم، وأنا موجودة أسمعكم مثل ما استمعت حق الناس اللي بدفعتي وساعدتهم مع إني وحدة منهم وفيهم وحالي من حالهم, وميخالف مرات راح تضحون بوايد أشياء بس كله لما تشوفون درجاتكم عالية راح تنسوونه!

٨-النصيحة الذهبية: مالكم شغل بأحد وبدراسته، عليكم من نفسكم، مالكم شغل بكلام أحد هذا صعب/هذا معقد/ما قدرت عليه لإن هذي تجارب وكل واحد يقدر يخلي تجربته ناجحة لما يخلي قناعاته ناجحة👌🏼. وyou are what you believe you are. للمرة المليون: لا. تسمعون. كلام. أحد.

وأخيرًا أعتذر عن الإطالة ولكن حبيت أنقل لكم تجربتي بالتفصيل وبنفس الوقت بكل اختصار بس شكله ما قدرت😂😅 ولنا حديث لاحق بخصوص الكورس الثاني ومواده بإذن الله.

كلموني إذا احتجتوا أي شيء، ولا تستحون مني رجاءً، لو عندكم أي سؤال/استفسار/بوح/تحلطم/انهيار أنا موجووودة طول الوقت، وتحت حاطة أكاونتي بتويتر+الآسك.

أسأل الله العلي العظيم أن يوفقكم في بداية مشاوركم بهذه المهنة الإنسانية، الله يسهل عليكم كل صعب ويزيل العقبات عن طريقكم🐣❤️.

please feel free to ask me anything you need, and you can contact me via

twitter: @iShiho_ and

ask.fm: https://ask.fm/HISSA99

حصّه

الأربعاء 21يونيو2017

12:03م